Ныбэ А.
Урысыем щыпсэурэ чIыдэлъф лъэпкъ цIыкIухэм я Мафэу хэгъэгум щыхагъэунэфыкIыгъэм хы ШIуцIэ Iушъом щыпсэурэ шапсыгъэхэри хэлэжьагъэх.
Ащ фэдэ лъэпкъэу 47-рэ хэгъэгум ис, пстэумкIи нэбгырэ мин 50 икъупэрэп. 2000-рэ илъэсым гъэтхапэм и 24-м УФ-м щыпсэурэ чIыдэлъф лъэпкъ цIыкIухэм языкI реестрэ гъэпсыгъэным фэгъэхьыгъэ унашъо къыдэкIыгъ. Ащ хагъэхьагъэх хы ШIуцIэ Iушъо шапсыгъэу къалэу Шъачэрэ ТIопсэ псэупIэ коимрэ къызэлъаубытырэ чIыпIэхэм ащыпсэухэрэр.— УФ-м и Президентэу Владимир Путиныр кIэщакIо фэхъугъэу апэрэу мы мэфэкIыр хагъэунэфыкIы. Ар зэрагъэнэфагъэр Урысыем щыпсэурэ чIыдэлъф лъэпкъ цIыкIухэм абзэ, якультурэ, яхабзэхэм якъызэтегъэнэн къэралыгъом ынаIэ тыригъэтыным ылъэныкъокIэ лъэбэкъушхоу щыт. Урысыем игушъхьэ баиныгъэ къэзгъэпсырэ лъэпкъ зэфэшъхьафыбэ ти Хэгъэгу зэрэщыпсэурэр ащ джыри зэ тыгу къегъэкIыжьы. Лъэпкъ зэхэхьэ зэфэшъхьафыбэу тиIэм зыкIыныгъэр агъэпытэ, ныбжьыкIэхэр яхэгъэгу шIу алъэгъоу пIугъэнхэм фытегъэпсыхьэгъэ Iофышхо ашIэ, социальнэ, культурнэ ыкIи общественнэ мэхьанэ зиIэ проектхэм, гуманитар Iофтхьабзэхэм япхырыщын хэлажьэх. Тикъалэ щыпсэухэрэм ыкIи хьакIэу къэкIуагъэхэм сыгу къыздеIэу сафэгушIо, — къыIуагъ Шъачэ имэрэу Андрей Прошуниным.— ТэркIэ мы мафэр тIо зэголъэу мэфэкI, илъэс 37-кIэ узэкIэIэбэжьмэ, 1989-рэ илъэсым мэлылъфэгъум и 30-м, тиобщественнэ организацие гъэпсыгъэ хъугъэ, — къыхигъэщыгъ чIыпIэ Адыгэ Хасэм итхьаматэу КIакIыхъу Мэджыдэ. – ТиIофшIэн зытегъэпсыхьэгъэ лъэныкъохэм апшъэ тшIыхэрэм ащыщ лъэпкъ культурэм изегъэушъомбгъун, кIэлэцIыкIу IыгъыпIэхэмрэ еджапIэхэмрэ ныдэлъфыбзэр ащарагъэшIэныр, тыкъызщыхъугъэ чIыпIэм тыщыпсэуныр, тихабзэхэр къызэтегъэнэгъэнхэр, типсэупIэхэм социальнэ ыкIи экономикэ гумэкIыгъоу яIэхэр дэгъэзыжьыгъэнхэр, хы ШIуцIэ Iушъом щыпсэурэ шапсыгъэхэм ятарихъ къэухъумэгъэныр. ЧIыдэлъф лъэпкъ цIыкIу статусэу тиIэм Конституцием фитыныгъэу къытитыхэрэр пхырытщынхэ амал къытеты.
МэфэкIымкIэ къоджэдэсхэм къафэгушIуагъэх ПсышIопэ районым иадминистрацие ипащэ игуадзэу Светлана Кириченкэр, ШэхэкIэй псэупIэ кой администрацием ипащэу Шъыжъ Мурат ыкIи Шъачэ и Къэлэ ЗэIукIэ идепутатэу Хъущт Заур.ПсэупIэм инахьыжъхэу ыкIи хьэкIэ гъэшIуагъэу къэгущыIагъэхэм шапсыгъэ лъэпкъым зыми фэмыдэныгъэу хэлъым икъэгъэнэжьынкIэ мы мэфэкIым мэхьанэшхо зэриIэр къыхагъэщыгъ, ятарихъ, абзэ, яшэн-хабзэхэр зэрагъэшIэнхэу, къызтекIыгъэхэм яшIэжь фэшъыпкъэнхэу ныбжьыкIэхэм къяджагъэх. ПсышIопэ район администрацием ирэзэныгъэ тхылъхэмкIэ къыхагъэщыгъэх къуаджэм ицIыф чанхэр, предпринимательхэм, гъэсэныгъэмрэ культурэмрэ яIофышIэхэм ащыщхэр.ШэхэкIэишхом иобщественнэ ыкIи икультурнэ щыIакIэ чанэу къыхэлэжьэрэ Мыгу лIакъом хэушъхьафыкIыгъэу «тхьауегъэпсэу» къыраIуагъ. Ащ илIыкIохэу Iофтхьабзэм хэлэжьагъэх АР-м и Къэралыгъо Совет — Хасэм идепутатэу, хэбзэихъухьанымкIэ, законностымкIэ ыкIи чIыпIэ зыгъэIорышIэжьыпIэхэм яIофхэмкIэ икомитет ипащэ игуадзэу Мыгу Адам, предпринимателэу Мыгу Ибрахьим ыкIи лIакъом щыщ ныбжьыкIэхэу Ислъамрэ Руслъанрэ.МэфэкI Iофтхьэбзэ шъхьаIэхэр лъэпкъ культурэм и Гупчэу ПсышIуапэ дэтым щыкIуагъэх. Ащ къекIолIагъэхэр шапсыгъэхэм ялъэпкъ шъуашэхэм, музыкальнэ псэуалъэхэм, IэшIагъэхэм якъэгъэлъэгъон еплъыгъэх.Шъачэ имэр игуадзэу Александр Митниковымрэ Къэлэ ЗэIукIэм ипащэу Виктор Филоновымрэ мэфэкIым фэшI къафэгушIуагъэх. Адыгэ Хасэр илъэсыбэ хъугъэу шIуагъэ къытэу администрациеми, депутатхэми зэрадэлажьэрэм, къалэм хэхъоныгъэхэр ышIынхэм, ащ изэтегъэпсыхьан, хэушъхьафыкIыгъэ дзэ операцием хэлажьэхэрэм апае шIушIэ IэпыIэгъоу атIупщырэм, нэмыкIыбэхэм чанэу къазэрахэлажьэрэм афэшI къызэрэфэразэхэр къыхагъэщыгъ. Муниципальнэ тынэу «Почет и уважение сочинцев» зыфиIорэ тамыгъэр къыратыжьыгъ КIакIыхъу Мэджыдэ. Джащ фэдэу мы организацием хэтхэм ащыщхэр, культурэм иIофышIэхэр рэзэныгъэ тхылъхэмкIэ къыхагъэщыгъэх.
НЫБЭ Анзор.