Гъэзетэу «Шапсыгъэм» имаф

Тарихъым инэкIубгъохэр зэпырытэгъазэх. Илъэс 35-рэ хъугъэ шъолъыр гъэзетэу «Шапсыгъэр» игъэзетеджэмэ зягъусэр.

«Шапсыгъэм» иапэрэ номер итхьапэхэр уахътэм гъожьыбзэ ышIыгъэх. Илъэс щэкIырэ тфырэкIэ узэкIэIэбэжьмэ къалэу Сыхъум къыщыхаутыгъагъэхэм тарихъ осэшхо джырэкIэ яI. А шIэжь хъугъэ-шIагъэм ишыхьатыгъэх хы ШIуцIэ Iушъом щыпсэурэ адыгэ-шапсыгъэмэ яя III-рэ зэфэсэу поселкэу ПсышIуа­пэ щыкIуа­гъэм илIыкIуагъэхэр. А уахътэм хэтыгъэмэ агу къызэрэкIыжьырэмкIэ, лъэпкъ гъэзетэу къиныгъо­хэм апэшIуекIозэ гъунэгъу Абхъазым къыщыдагъэкIыгъэр зыубытыгъэхэм анэпсхэр къашIуакIощтыгъэх, нэбгырэ пэпчъ къыгурыIощтыгъ джы шапсыгъэмэ общественнэ макъэ яIэ зэрэхъугъэр, шъхьэихыгъэу ыкIи шъыпкъагъэ хэлъэу ягумэкIыгъохэм зэратегущы­Iэшъущтхэр. Мыщ фэдиз илъэсхэм гъэзетыр къыдэзгъэкIырэр шапсыгъэмэ яобщественнэ организациеу «Адыгэ Хасэр» ары. Илъэс щэкIым къехъугъэу ащ ипэщэ КIакIыхъу Мэджыдэ ренэу хегъэунэфыкIы тызэкъотмэ тызэрэлъэшыр.«Шапсыгъэм» иапэрэ номер икъыдэгъэкIын социальнэ мэхьанэу иIэр къагурыIозэ, ар къадэхъуным яIахьышхо нэбгырипшI пчъагъэмэ халъхьагъ. Ахэм ащыщых а лъэхъаным Абхъазым ипрезидентыгъэу Владислав Ардзинбэ, общественникхэр, республикэм инаучнэ ыкIи итворческэ интеллигенцие, гущыIэм пае, зэлъашIэрэ тхакIоу Баграт Шинкубэ ыкIи нэмыкIхэри.— Гъэзетэу «Шапсыгъэр» хы ШIуцIэ Iушъом щыпсэурэ адыгэхэмкIэ осэшхо зиIэ хъугъэ-шIагъэу тарихъыкIэм хэхьагъ, — къыкIегъэтхъы КIакIыхъу Мэджыдэ. — Ащ инэкIубгъохэм къарэхьэх цIыф гъэшIэгъонхэм, тичIыгогъухэу лъытэныгъэ зыфашIыхэрэм, зэлъашIагъэ­хэм апае тхыгъэхэр, джащ фэдэу къуаджэмэ социальнэ-экономическэ гумэкIыгъоу яIэхэр, шIэжь тарихъыр, тилъэпкъ игушъхьэ ыкIи икультурнэ кIэн зыфэдэр, нэмыкIхэри.Гъэзетым икъыдэгъэкIын пэIухьащт мылъкур икъоу зэраIэкIэмылъым пае къымыгъанэу, шапсыгъэмэ я Адыгэ Хасэ иамал къыхьырэр зэкIэ ышIагъ ыкIи ешIэ. Апэрэ илъэсхэм нэбгыришъэ пчъагъэмэ яIэпыIэгъу ишIуагъэкIэ гъэзетыр къыдэкIыгъ. Адыгэ лъэпкъым ымакъэу ар алъытэзэ яшIуагъэ къырагъэкIыщтыгъ. Аужырэ уахътэм гъэзетыр къыдэкIы къэралыгъом ифинанс IэпыIэгъукIэ — Краснодар краим игубернатор игрант ишIуагъэкIэ.2003-рэ илъэсым къыщыублагъэу гъэзетым иредактор шъхьаIэр Адыгэ Республикэм изаслуженнэ журналистэу, Краснодар краим сэнэхьат IэпэIэсэныгъэмкIэ изэнэкъокъоу «Пшызэ идышъэ къэлэм» илауреатэу Ныбэ Анзор. Къэбар гъэшIэгъонмэ алъыхъухэ­зэ гъэзетым илIыкIохэр дунэе форумхэм, конференциехэм, научнэ, культурнэ ыкIи спорт Iофтхьабзэхэм ахэлажьэх. Хы ШIуцIэ Iушъом щыIэ къуаджэхэм ренэу яхьакIэх, цIыфмэ заIуагъакIэ, ягумэкIыгъохэр зэрагъа­шIэ, ахэр гъэзетым къыхаутыжьых.— Шъачэ ижурналистикэ зиIахьышхо хэзылъхьагъэ тичIыгогъухэр нэбгырипшI пчъагъэ мэхъух. Апэрэ сатырым хэтых «Шапсыгъэ большевикым» щылэжьагъэхэр» — Советскэ Союзым и ЛIыхъужъэу Феодосий Иотка, фронтовикхэу ЦунтIыжъ Хьарунрэ ОгъулI Хьамедэрэ. Ахэм къакIэлъыкIуагъэх лъытэныгъэшхо зыфашIырэ журналистхэр, — еIо Ныбэ Анзор.Зичэзыу мэфэкI мафэр «Шапсыгъэм» щылэжьэрэ купым анахь къапэблэгъэ цIыфхэм, яныбджэгъухэм, яIофшIэгъухэм ыкIи ягъэзетеджэхэм адегъэмэфэкIы. Мы мэфэ шIагъом ипэгъокIэу тиIофшIэгъоу, республикэ гъэзетэу «Адыгэ макъэм» ижурналистэу, «Шапсыгъэм» иредактор шъхьаIэу Ныбэ Анзор щытхъуцIэу «Краснодар краим изаслуженнэ журналист» зыфиIорэр къыфагъэшъошагъ, ар къэзыушыхьатрэ тхылъымрэ бгъэхалъхьэмрэ Краснодар краим игубернаторэу Вениамин Кондратьевым къыритыжьыгъэх.