Мыекъопэ «Зэкъошныгъэм» иешIэкIо анахь лъэшхэм ащыщэу Анатолий Абрамовым ишIэжь фэгъэхьыгъэ зэнэкъокъур аухынкIэ бэп къэнагъэр.
Кубокым икъыдэхын фэбэнэнэу командэ 16-мэ зыкъагъэлъэгъуагъ. Непэрэ мафэм къэнагъэр 4. Арышъ, финалныкъохэр гъэшIэгъоныщтых, зэIукIэгъухэм шъуяплъынэу зэхэщакIохэм стадионэу «Юностым» шъурагъэблагъэ.Финалым и 1/4-м къыдыхэлъытэгъэ ешIэгъухэм анахь къахэбгъэщын плъэкIыщтыр «Ошъутенэмрэ» «Факелрэ» язэIукIэгъу. «Ошъутенэр» хэпшIыкIэу нахь лъэшыгъ, 6:2-у текIоныгъэр къыдихыгъ. «Ансар» ыкIи «МФОК-у Ошъутен» зыфиIорэ командэхэм яешIэгъу 0:0-у аухыгъ. Пчъагъэр зэрэзэфэдизым къыхэкIэу текIоныгъэр къыдэзыхыщтыр пенальтикIэ къэнэфагъ, мызыгъэгум «Ансарыр» нахь лъэшыгъ. «Легионыр» 4:0-у «Оазисым» текIуагъ, «Кавказыр» «Спортмастер-2-м» дешIагъ ыкIи 4:1-у ешIэгъур къышIуихьыгъ.
Финалныкъом къыдыхэлъытагъэу жъоныгъуакIэм и 23-м сыхьатыр 5-м зэдешIэщтых«Ошъутенэмрэ» «Легионымрэ». Ащ ыуж пчыхьэм сыхьатыр 6-м «Ансарымрэ» «Кавказымрэ» зэIукIэщтых.