ПщIэ зыхуэсщI си лъэпкъэгъухэ, си хэкуэгъухэ!
Адыгэхэм (шэрджэсхэм) дежкIэ накъыгъэм и 21-р щыгъуэкIэ гъэнщIащ: 1864 гъэм а махуэм иухащ цIыху минищэ бжыгъэхэм я гъащIэр зыхьа, илъэсищэкIэ екIуэкIа Кавказ зауэр. Абы лъандэрэ илъэси 162-рэ дэкIащ, ауэ а лъапсэрых зауэр тщыгъупщэркъым, ди лъэпкъым къыхуихьа гуIэгъуэхэр дигу ихужыркъым. ИлъэсищэкIэ мыужьыхыу екIуэкIа зауэм лъэпкъыр кIуэдыпIэ иришащ: мащIэ дыдэщ адэжь лъахэм къинэжар, нэхъыбэр мафIэ лыгъейм хэкIуэдащ е хамэ щIыпIэхэм щыхипхъащ. Тыншакъым хэхэсыныр натIэ зыхуэхъуа ди лъэпкъэгъухэм я гъащIэр — я бзэм ирипсэлъэну, я хабзэр зэрахьэну Iэмал кърамыту къэгъуэгурыкIуащ, ауэ зыхагъэшыпсыхьыжакъым, къызэтенащ. БлэкIа гузэвэгъуэшхуэм ущегупсыскIэ, укъэмыскIэнкIэ, уи гущIэм зимыгъэзэнкIэ Iэмал иIэкъым.ЗэуапIэм икIуэдахэмрэ лъыгъажэм зи щыIэныгъэр зэтрикъутахэмрэ илъэс къэс накъыгъэм и 21-м дигу къыдогъэкIыж. Накъыгъэм и 21-р щыгъуэ-щIэж махуэу щагъэуващ Адыгейми, Къэбэрдей-Балъкъэрми, Къэрэшей-Шэрджэсми. Щыгъуэ Iуэхухэр щокIуэкI Краснодар икIи Ставрополь щIыналъэхэм, Абхъазием, Тыркум, Иорданием, Сирием, Израилым, Германием, Америкэм и Штат Зэгуэтхэм, нэгъуэщI къэралхэми.Ялъэгъуа нэщIэбжьэхэм адыгэхэр зэращIыкIакъым, я анэдэлъхубзэр фIагъэкIуэдакъым, я щэнхабзэр IэщIагъэхуакъым, я къежьапIэхэр щагъэгъупщакъым. Нобэ адыгэхэр Урысейм и лъэпкъыбэ унагъуэм ящыщ зыщ, мамыру и гъунэгъу лъэпкъхэм ядэпсэу зы жылагъуэщ. Адыгэхэр дэнэ щIыпIэ щымыпсэуми, зы тхыдэрэ зы щэнхабзэмрэ зэраIэр ягъэгъуащэркъым, зыр адрейм щIэгъэкъуэн хуэхъуу, сыт щыгъуи зэкъуэту, зэрыIыгъыу зэдэщыIэщ. ХамэщIым къикIыжа ди лъэпкъэгъу минхэр Хэкум щопсэу, къекIуэкI хабзэмрэ псэукIэмрэ зрагъэзэгъащ, унагъуэ щащIащ.Урысейм къищынэмыщIауэ, адыгэхэм къэралыгъуэ щаIэу дунейм зы щIыпIи щыIэкъым. Къэралым и пашэхэр хущIокъу лъэпкъым и щэнхабзэ хъугъуэ-фIыгъуэхэр зэрихъумэным икIи зэрызригъэужьыным, апхуэдэуи хамэщI щыпсэу ди лъэпкъэгъухэм адэжь лъахэм къыхуаIэ пыщIэныгъэхэр зэригъэбыдэнуми иужь итщ.Мы махуэм дэ къыткъуэтщ Къэбэрдей-Балъкъэрым и лъэпкъыбэр. Ар зыхыдощIэ, абы щхьэкIи дэтхэнэми фIыщIэ яхузощI. Ди щIыналъэм сыт хуэдэ Iуэхугъуэ щедмыгъэкIуэкIми, ди зэхуакум илъ зэныбжьэгъугъэр хъумэным икIи гъэбыдэным, ди къэкIуэнум теухуауэ диIэ жэуаплыныгъэр нэсу къыдгурыIуэным хуэгъэпсауэ щытын хуейщ. УзэгурыIуэмэ, узыпэмылъэщын гугъуехь зыри щыIэкъым.Кавказ зауэм и тхыдэм дерс куэд къыдат. Абыхэм нэхъыщхьэу дызыхуагъасэр Iущыгъэмрэ зыр адрейм пщIэ хуэщIын зэрыхуеймрэщ. Лъэпкъ зэгурыIуэныгъэращ лъахэм зиужьыным и шэсыпIэ нэхъыщхьэр. Аращ къызыхэкIар Президент Путин Владимир 2026 гъэр Урысейм и лъэпкъхэм я зэкъуэтыныгъэм и илъэсу къилъытэнри.Щалъхуа лъахэр яхъумэу зи псэ зыта ди адэжьхэр дэ зэи тщыгъупщэнукъым икIи Кавказ зауэм хэкIуэда псоми ди щхьэр яхудогъэщхъ. Апхуэдэ гуауэ къэмыхъужын папщIэ, дэ ди къалэнщ а фэеплъыр дымыгъэкIуасэу тхъумэну.ИремыкIуэдыж зауэм зи щхьэ хэзылъхьа ди нэхъыжьхэм я фэеплъыр!Къэбэрдей-Балъкъэрым и цIыхубэми дунейм адыгэу (шэрджэсу) тетхэми мы махуэр ящызыгъэгъупщэн гуауэ ямылъагъуну, ди япэ итахэм дащIыхуэфэщэн ехъулIэныгъэхэр диIэну си гуапэщ. Дэтхэнэ зы унагъуэми и жьэгу мафIэр зэхремыкIыж, гуфIэгъуэрэ фIыгъуэрэ диIэну сыфхуолъаIуэ!Дунейпсо Адыгэ Хасэм и тхьэмадэСЭХЪУРОКЪУЭ Хьэутий.