НыбжьыкIэхэр агъэкIотагъэх

Гъэтхэ дзэ дэщыгъом къыдыхэлъытагъэу, Уры­сыем и УIэшыгъэ КIуачIэхэм къулыкъур ащы­зыхьыщт ныбжьыкIэхэм язичэзыу куп тыгъуасэ гъогу техьагъ.

Нэбгыри 5-у мэфэкI шIыкIэм тетэу агъэкIотагъэхэр ошъогу зыкъэухъумэжьынымкIэ апшъэ­рэ дзэ училищэу Ярославль дэтым ащагъэх.Iофтхьабзэу АР-м идзэ комис­сариат щыкIуагъэм хэлэжьагъэх гъэцэкIэкIо хабзэм, патриотическэ ыкIи общественнэ органи­зациехэм ялIыкIохэр, дзэ къулы­къум иветеранхэр, ны-тыхэр.Iофтхьабзэр къызэIуихыгъ дзэ комиссар шъхьаIэм иIэпыIэгъоу Одэжьдэкъо Руслъан.— АР-м идзэ комиссариат ипащэу Александр Авериным ыцIэкIи, сэ сшъхьэкIи шIу­фэс шъосэхы. Непэ къулыкъур зыхьынэу ежьэгъэ ныб­жьыкIэхэр анахь агъэлъэпIэрэ училищым зэращэхэрэм рыгушхонхэу щытых. Дзэ-политикэ Iофхэм язытет зэрэдунаеу зыщыкъин уахътэм дзэ къулы­къушIэхэм яухьазырын мэхьанэшхо иI. ШIэныгъэу шъуагъэгъотыщтыр зэри­фэшъуашэу жъугъэфедэн зэрэфаем шъунаIэ тежъугъэт. Хэгъэгур къэухъумэ­гъэныр пшъэрылъ шъхьаIэу хъулъфыгъэм зэриIэр зэкIэми тэшIэ, ар щытхъу хэ­лъэу жъугъэцэкIэн, узынчъэу къэжъугъэзэжьынэу шъуфэсэIо, — къыIуагъ Одэжьдэкъо Руслъан.Къыблэ дзэ шъолъырым изэ­хэт стратегическэ командование иинспектор куп хэтэу, гене­рал-майорэу Александр Дорофеевым ныбжьыкIэхэм закъыфигъэзагъ. Хэгъэгум ыпашъхьэ пшъэдэкIыжьэу ахьырэр агъэцэкIэным игъо къэсыгъэу зэрэщытыр ащ хигъэунэфыкIыгъ. Хъулъфыгъэм ишэн-зекIуакIэхэр дзэ къулыкъум щыпсыхьагъэ зэрэхъурэр ащ къыхигъэщыгъ. Мы мафэм къыщегъэжьагъэу ахэр зэрэдзэкIолIхэр къагурыIозэ, щытхъу хэлъэу япшъэ­рылъхэр зэшIуахынхэу, якомандирхэм ядэIунхэу, зыфэсакъы­жьынхэу, зэрэдэкIыгъэхэм фэ­дэу ны-тыхэм къафагъэзэ­жьынхэу къафэлъэIуагъ.— СыдигъокIи тишъо­лъыр дзэ къулыкъушIэхэм ягъэхьазырынкIэ къахэщы, тикIалэхэм сыдигъуи ящытхъу арагъаIо. Шъори тыкъэшъумыгъэукIытэ­жьэу, джащ тетэу шъузе­кIон фае. Тятэжъ пIашъэхэу ТекIоныгъэр къытфыдэзы­хыгъэхэм зэрахьэгъэ лIы­хъужъныгъэр тарихъым къыхэнагъ, ар шъуищысэтехыпIэн фае. ГумэкIыгъо шъуиIэу зыхъурэм шъуянэ-­шъуятэхэм афэдэу, тисо­вети зыкъыфэжъугъэзэн шъулъэкIыщт, — хигъэунэфыкIыгъ АР-м иветеранхэм я Совет итхьаматэу Къоджэ Аслъан.ГущыIэр лъигъэкIотагъ апшъэ­рэ дзэ училищым илIыкIоу Вла­дислав Макаровым. Илъэсныкъорэ ныбжьыкIэхэр мыщ зэ­рэ­щырагъэджэщтхэр, нэужым къэралыгъом иошъогу гъунапкъэ­хэм къулыкъур зэращылъагъэ­кIотэщтыр, хэушъхьафыкIыгъэ дзэ операциер зыщыкIорэ чIы­пIэм зэрамыщэщтхэр къыхи­гъэщыгъ.Ны-тыхэм ацIэкIэ Анна Шамрай, къулыкъур зыхьынэу ежьэгъэ ныбжьыкIэхэм ащыщэу Сергей Сухотепловыр къэ­гущыIагъэх.Нэужым концерт программэм еплъыгъэх. Ащ къыкIэлъыкIоу къэзэрэугъоигъэхэр щагум дэзэрэщагъэх, ныбжьыкIэу гъогу техьагъэхэр агъэкIотагъэх.Iэшъынэ Сусан.