Социальнэ зэзэгъыныгъэм иятIонэрэ республикэ фестивалэу «Гугъэм имаф» зыфиIорэм игъэхьазырын Адыгеим ыкIэм щыфэкIо. Мыекъуапэ дэт къэлэ паркым идэхьэгъу дэжь жъоныгъуакIэм и 23-м сыхьатыр 11-м ар щыкIощт.
Социальнэ зэзэгъыныгъэр яIэубытыпIэу зиIоф къызэIузыхыгъэхэм яIэпэщысэхэм яермэлыкъ мы чIыпIэм щызэхащэщт. Жюрим хэтхэми, цIыфхэми ахэм уасэ къаратын, текIоныгъэ къыдэзыхыщтхэр къыхахын алъэкIыщт. Фестивалым къыдыхэлъытагъэу зэнэкъокъу зэфэшъхьафхэр зэхащэщтых, Адыгеим итворческэ купхэм концерт къатыщт.— Фестивалым къекIуалIэрэ пэпчъ ышъхьэкIэ Iофэу къызэIуихышъущтыр къыхихын, къэралыгъо IэпыIэгъоу къыфыхагъэкIыщтыр зэригъэшIэн, зыгъэгумэкIырэ упчIэхэр специалистхэм аритын ылъэкIыщт. ЗыкIэхъопсыщтыгъэхэ Iофыр щыIэныгъэм щыпхырызыщыгъэ цIыфхэм ягъэхъагъэхэм мы Iофтхьабзэм нэIуасэ шъуащыфэхъущт. ШъуищыIакIэ зэшъухъокIынымкIэ социальнэ зэзэгъыныгъэр амалышIоу зэрэщытыр фестивалым нэрылъэгъу къышъуфишIыщт, — къыщаIуагъ Адыгэ Республикэм IофшIэнымрэ социальнэ хэхъоныгъэмрэкIэ и Министерствэ.2025-рэ илъэсым нэбгырэ 1047-мэ социальнэ зэзэгъыныгъэ адызэхагъэуцуагъ, ащ щыщэу зэзэгъыныгъэ 333-р бын-унэгъо Iужъухэм адашIыгъ. 2026-рэ илъэсым Адыгеим щыпсэурэ унэгъо миным ехъумэ социальнэ зэзэгъыныгъэмкIэ IэпыIэгъу арагъэгъотыщт. Лъэпкъ проектэу «Унагъу» зыфиIорэм диштэу ащ пае сомэ миллион 250-м ехъу къыхагъэкIыгъ. ГъэрекIорэм егъэпшагъэмэ, проценти 10 фэдизкIэ ар нахьыб.