КIэдыкiуей Еркъан хамэщI щыпсэу адыгэ усакIуэщ. Тыркум 1969 гъэм къыщалъхуащ, Узун-Яйлэ, Шыджэбэхъуей къуажэм къыщыхъуащ. Еркъан электрикыу еджащ икIи а IэщIагъэм иролажьэ. Унагъуэщ, бынитI иIэщ.
2018 гъэм фIыуэ илъагъу Хэкужьым къыщыдэкIащ «Хэкум сепсэлъэжу» и усэ тхылъыр. Ар къыдигъэкIащ усакIуэм и тхыгъэхэр интернет напэкIуэцIхэм зыкъом щIауэ щыщIэзыджыкI, усакIуэ, тхакIуэ, «Горянка» газетым и редактор нэхъыщхьэ Къаныкъуэ Заринэ. Зытетхыхьхэр, и усэбзэр, и гупсысэ къэIуэтэкIэр и гум дыхьати, хамэ къэралыр псэупIэ зыхуэхъуа адыгэ усакIуэм и IэдакъэщIэкIхэр зэхуэхьэсауэ щыIэн хуейуэ къилъытащ, абыхэм Хэкум къэIу джэ макъыу зэхэлъ усэ тхылъ къищIыкIащ. Тхылъым и IуплъапIэри и напэкIуэцIхэри абы къыщыкIуэ усэхэм пэджэж тхыпхъэ-сурэтхэмкIэ игъэщIэрэщIащ дакIуэ-бзакIуэ Сэралъп Мадинэ. Тхылъым итщ КIэдыкIуей Еркъан и усэхэр, гупсысэхэр, усэ хуитхэр. УсакIуэм и тхэкIэр щхьэхуэщ, адыгэ дунейм пэджэж къару щабэ щIэлъу — Мадинэ и тхыпхъэхэри абы екIупсщ.«Еркъан Хэкумрэ и лъэпкъэгъухэмрэ псалъэкIэ ялъэIэсыну и нэ къикIыу итхахэр хэмыгъуэщэжын, цIыху нэхъыби еджэн папщIэ, дауи, зыгуэрым къритхыкIыжын хуейт. А гупыж дыдэр хэт иIами, къыхилъхьэ, къыпищэ хъуну си гугъэщ — Еркъани абы хуэдэу езыр-езыру тхэным зыхуезыгъэса адрейхэми ядэIэпыкъун хуейщ… АпхуэдизымкIэ сыдихьэхырт и тхэкIэмрэ и гупсысэ зэкIэлъыгъэкIуэкIэмри, къыщистхыкIыжым и псалъэ къэпсэлъыкIэхэр схъуэжакъым, литературэбзэм измыгъыхьэу къэзгъэнар куэд мэхъу. Къасщтэм, седжэжу сиIэну сыхуейти, езыри хэплъэжа нэужь, тхылъ цIыкIуу къыдэзгъэкIыну сехъуэпсащ», — щыжеIэ Заринэ «Хэкум уепсэлъэфыныр» псалъащхьэр иIэу тхылъым хэзыгъэгъуазэ хуищIам.«Тыркум щыпсэу ди къуэшхэм къабгъэдэкIыу къыдэпсалъэ КIэдыкIуей Еркъан къиIуатэмрэ и хъуэпсапIэмрэ къызэрыддэгуашэмрэ уигу нэмысынкIэ Iэмал иIэкъым — мыр къызэрыдэпсэлъэжыр ди адэжьхэм я бзэщ, ди нэхъыжьхэм я псэ къабзагъэр зыщIэлъ гупсысэщ къыдигъащIэр», — жиIащ тхылъым къеджа нэужь уэрэджыIакIуэ, Урысей Федерацэм щIыхь зиIэ и артист Нэхущ Чэрим.«Сытым тепсэлъыхьми: ар адыгагъэуи, лъагъуныгъэуи, нэгъуэщI гурыщIэуи, зы хьэпшып гуэруи щрети, зи гугъу ищIыр сурэт Iэрытхым хуэдэу нэгум къыщIегъэувэ. Телъыджэщ, и «хъыринэ» дызэрытIысхьэм дыщыщIиупскIэурэ, и макъамэ зэхуэмыдэхэм дыщIегъэдэIу, итIанэ дегъэгупсысэ. Ди къэпсэлъыкIэм къыщыгъэпсэужын хуей псалъэ куэди хыдолъагъуэ усэхэм», — жеIэ КъБКъУ-м адыгэбзэр щезыгъэдж Езауэ Мадинэ, Еркъан и IэдакъэщIэкIхэм теухуауэ.Дунейм и щэху куэдым зэпхыплъ гупсысэ жанкIэ IулIащ КIэдыкIуей Еркъан и тхыгъэхэр. Гурэ псэрэкIэ мэусэри, ахэр гум щIэх ноIус икIи узыщIагъэдэIукI. ЩIыуэпсыр и псэлъэгъу пэжщи, уафэм, вагъуэм, мазэм, къэкIыгъэхэм я хьэлыр фIыуэ ещIэ. Абыхэм усакIуэм и пэжыр япщIэхэлъщ. Тхыгъэхэр гъуджэ пэлъытэщи, дэтхэнэми усакIуэпсэр къощ. Ар нэхущ — зыри щыгъэпщкIуакъым, щыбзыщIакъым. Гу лъыботэ сатырхэр адыгэпсэкIэ зэрыпсыхьами. Дыкъыздеджэм, ди нэгум щIэтщ дуней телъыджэ: дигъэунэхуу, дигъэгупсысэу, дигъэгугъэу! КIэдыкIуейм и IэдакъэщIэкI зыбжанэ дыкъевгъаджи, щыхьэт дытевгъэхъуэж усакIуэм и Хэку лъагъуныгъэм.Нобэ тIощIрэ зырэщДэнэ щыIэ си гурыфIыгъуэхэр?Хэт сфIрикIута?Хьэмэрэ сфIэвгъэпщкIуа?Пхъуантэрамэ — къыдэфхыж,матэрамэ — къивгъэщэщыж.Си кIэныр зэрыздзэн жыхафэгу,си чыныр щызгъэжэн мыл,хъыринэ сыщещIэну зы жыг къудамэ…Дэнэ?Ядыгъуа, яукIа си сабиигъуэр,си жьэм Iурылъа агъэ-быгъэри дэнэ?Нобэ тIощIрэ зырэщ…СфIагъэкIуэдар,къыткIуэцIаукIыхьыжари сабиигъуэт…Сэ абы щIымахуэ жэщхэмжезмыIэфа шыпсэхэр,пцIанэу къытенауэси тэмакъым фIэлъ и таурыхъхэр,си бзэгупэм къытена и къуажэхьхэр,къебжэкIхэр згъуэтыжмэ,мис ахэмкIэ зызгъэнщIыжынут.Хэсшэнут пщIантIэм, мыр уи жыгщ,уи псэ жыг…Узмыгъуэтыжурэ кIуащ ари…Уэри укIуащ, урахуащ уи унэ.ИIэ, къэгъэзэж.Дызэрыгъэгъуэтыж.Дижьарэ яжьэ дыхъуами,Хэкужь бжьамийр къытIууамэ,дыхъужынут…Нобэ тIощIрэ зырэщ…Нобэ.Шу закъуэукIуэцIрыпшамиУи дунейр уи хэкуми уи цIыхуми, уи гугъэхэр псым зэрыхомыкIутэжар арамэ, уэ ухакIута пэтрэ, псы зылъомыгъэIэсар ягъэшхуэщ зыгуэрхэм я дежкIэ. Гъэ мин Iэджэхэм я анэмэт а уи лъэпкъ щIыхь зехьэкIэрамэ, уи лъэпкърэ уи культурэрэ иужь уитмэ, ар зыфIэягъэхэм уэри ягъэ пщагъэхъужу, хыфIыуагъэдзэжыным хущIэкъум уафэри щIылъэри яубыдамэ, зы махуэ нэхъыбэ упсэуну, зы уэрамым ней-нейуэ къыздоплъхэм, уи зы уэрэд къыщыхэбдзэныр сыту IэфI!Зэщхь щымыIэн ар, абдеж ущизакъуэнуми…Тхыгъэри сурэтриГУГЪУЭТ Заремэ ейщ.