ШIэныгъэ-технологическэ проектхэмкIэ дунэе зэнэкъокъоу «Большие вызовы» зыфиIорэм Мыекъуапэ игурыт еджапIэу N 10-м щеджэрэ Виолетта Куманяйкинар хэлэжьагъ ыкIи текIоныгъэ къыщыдихыгъ.
Гъэсэныгъэ гупчэу «Сириусым» зэнэкъокъум икIэух едзыгъо щыкIуагъ. Урысыем, Белоруссием, Казахстан ыкIи Таджикистан ащыщ ныбжьыкIэхэм яIофшIэгъэ 1300-м ехъу къыщагъэлъэгъуагъ.АР-м гъэсэныгъэмрэ шIэныгъэмрэкIэ и Министерствэ къызэрэщаIуагъэмкIэ, Адыгеим икIэлэеджакIоу Виолетта Куманяйкинам «Генетика и биомедицина» зыфиIорэ лъэныкъомкIэ зыкъыгъэлъэгъуагъ. Иушэтын коронарнэ атеросклерозым фэгъэхьыгъ.Виолеттэ шъолъыр гупчэу «Полярис — Адыгея» зыфиIорэм ишIэныгъэхэм зэращыхигъахъорэм ишIогъэшхо къэкIуагъ. Къыгъэлъэгъогъэ проектым Iоф дишIэнэу мыщ щыригъэжьэгъагъ. Гъэхъагъэу ышIыгъэм пшъэшъэжъыер къыщыуцущтэп, мы темэм нахь зыригъэушъомбгъунэу рехъухьэ.ТиныбжьыкIэхэм ятекIоныгъэхэм зэрарыгушхохэрэр АР-м и ЛIышъхьэ пчъагъэрэ къыхигъэщыгъ. Адыгеим сэнаущыгъэ зыхэлъ ныбжьыкIэхэр щэпсэух ыкIи ахэм ягъэхъагъэхэм ахагъэхъонымкIэ ящыкIагъэр зэкIэ аIэкIэлъ. IэпэIэсэныгъэм имызакъоу, лъэпкъ проектэу «КIэлэцIыкIухэр ыкIи ныбжьыкIэхэр» зыфиIорэм ыкIи Урысыем иполитическэ партиеу «Единэ Россием» илъэпкъ программэ къатырэ амалхэр къызфагъэфедэх.