Адыгеим щеджэщтых

Сэнэхьат ухьазырыныгъэмкIэ шъолъыр программэу «Хер­сонщинэм и ЛIыхъужъхэр» зыфиIорэм хэлэжьэнэу къыхахыгъэ нэбгырэ 12 Адыгеим къэкIуагъ.

Мэфи 10-м къыкIоцI ветеранхэр ти­шъолъыр щыIэхэу экономикэм, шъолъыр ыкIи муниципальнэ гъэIорышIэным афэ­гъэхьыгъэу яшIэныгъэхэм ахагъэхъощт.ХэушъхьафыкIыгъэ дзэ операцием иветеранхэм яеджэн иящэнэрэ едзыгъо икъызэIухын фэгъэхьыгъэ Iофтхьабзэм хэлэжьагъэх Херсон хэкум игубернатор иапэрэ гуадзэу Павел Шувалкиныр, АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, Къэралыгъо Советым — Хасэм и Тхьаматэ игуадзэу, Урысыем и ЛIыхъужъэу Цэй Эдуард, министрэхэм я Кабинет и Тхьаматэ игуадзэу Хъоткъо Хъызыр, программэм ипхырыщын хэлэжьэрэ къулыкъухэм ыкIи гъэсэныгъэм иучреждениехэм, къэралыгъо гъэIорышIэнымкIэ апшъэрэ еджапIэу РАНХиГС-м ялIыкIохэр.

Программэу «Херсонщинэм и ЛIы­хъужъхэр» зыфиIорэм ипащэу Александр Зориным зэIукIэр зэрищагъ. Ветеранхэм яеджэн иедзыгъуитIоу акIугъэм кIэух зэфэхьысыжьхэр къыфишIыгъэх, джы ар зэрэлъагъэкIуатэрэр, зыфэгъэхьыгъэщтыр къыхигъэщыгъэх.— ХэушъхьафыкIыгъэ дзэ операцием идзэкIолI 12-м херсон лъэныкъом къулы­къур щахьыгъ. Джы ахэр къэралыгъо ыкIи муниципальнэ гъэIорышIэным фе­джэх, нэужым агъотыгъэ шIэныгъэхэр а чIыпIэхэм ащагъэфедэнхэу. Адыгэ Республикэм щыкIощт ящэнэрэ едзыгъом телъытэгъэ программэ афэдгъэ­хьазырыгъ, ащ лъэныкъо 30 къызэлъеубыты, кIэлэегъэджэ-эксперт 40 фэдизмэ рагъэджэщтых, — къыIуагъ Александр Зориным.Аужырэ илъэсхэм Адыгеир нахь ­зэтегъэпсыхьагъэ зэрэхъугъэр Херсон хэ­кум игубернатор иапэрэ гуадзэу Павел Шувалкиным ипсалъэ къыщы­хигъэщыгъ.— 2015-рэ илъэсым апэрэу Адыгеим сыкъэкIогъагъ. ПсэолъэшIынымкIэ зэ­хъокIыныгъэшIухэр фэхъугъэх, къалэр нахь кIэракIэ хъугъэ. Шъолъырыр сыдигъокIи къызэрахэщырэ хьакIэпэгъокIыныр ыкIи лъэпкъ нэшанэр зэрифэшъуашэу къыщызэтырагъэнэнхэ алъэкIыгъ. Адыгэ Республикэм ынаIэ зытыригъэтыхэрэм тишъолъыр ащыщ, зэпымыоу лъэныкъо зэфэшъхьафхэмкIэ IэпыIэгъу къыфэхъу. ХэушъхьафыкIыгъэ дзэ операцием хэлажьэхэрэм апае Iофтхьэбзабэ щызэ­рехьэ, — хигъэунэфыкIыгъ Павел Шувалкиным.Владимир Свеженец АР-м и ЛIы­шъхьэу КъумпIыл Мурат ыцIэкIэ къэзэ­рэугъоигъэхэм шIуфэс къарихыгъ. Шъо­лъыр программэу «Адыгеим и ЛIы­хъужъхэр» зыфиIорэм мыр зэрихьащырыр, республикэм ипащэ ащ мэхьанэшхо зэрэритырэр хигъэунэфыкIыгъ.— Херсон илIыхъужъхэм яеджэн иящэнэрэ едзыгъо шIуагъэ къытэу зэхэщэгъэнымкIэ ищыкIэгъэ амалхэр ядгъэ­гъотыгъэх. МэфипшIым къыкIоцI экономикэм, социальнэ лъэныкъом, зекIоным хэхъоныгъэ ягъэшIыгъэнымкIэ амалхэм ащыдгъэгъозэщтых. Лъэпкъи 100-м ехъу зыщыпсэурэ республикэм зэгурыIоныгъэ илъынымкIэ ти ЛIышъхьэ IофшIэныр зэригъэпсырэр къышъуфэтIотэщт. Джащ фэдэу лъэпкъ проектхэр, федеральнэ программэхэр чанэу зэрэщагъэцакIэ­хэрэм нэIуасэ шъуфэтшIыщт. Программэм къыдыхэлъытагъэу къыдэгъэкIы­жьыным, мэкъу-мэщым, къоешIыным апылъ предприятиехэр къэшъодгъэкIу­хьащтых. Зыгъэпэсфыгъо Iахьри къыдыхэлъытэгъэщт, — хигъэунэфыкIыгъ Владимир Свеженец.Шъолъырхэм тапэкIэ хэхъоныгъэ ашIынымкIэ ыкIи зисэнэхьаткIэ IэпэIэсэныгъэ зыIэкIэлъ цIыфхэр гъэхьазы­рыгъэнхэмкIэ мы программэм мэхьанэ зэриIэр Цэй Эдуардрэ Хъоткъо Хъызыр­рэ япсалъэ къыщыхагъэщыгъ. Адыгеим щыIэфэхэ, къэралыгъо ыкIи муни­ципальнэ гъэIорышIэнымкIэ IэпэIэсэ-­ныгъэ щызэрагъэгъотынэу ветеранхэм къяджагъэх.Программэм хэлэжьэрэ ветеранхэм яеджэн пIалъэ къыдыхэлъытагъэу джыри зы едзыгъо къяжэ, ар нэмыкI шъо­лъырым щахьыщт. Нэужым зыщыщ шъолъырхэм ащыIэ хэбзэ къулыкъухэм IофшIэпIэ чIыпIэхэр къащафагъотыщтых.IЭШЪЫНЭ Сусан.