Лъэпшъыкъо Ф.
Унагъом и Мафэ къыдыхэлъытагъэу лъэпкъ зэфэшъхьафхэм ащыщ зэшъхьэгъусэхэу илъэс 25-м ехъугъэу зэдэпсэухэрэр Адыгеим щагъэшIуагъэх.
Бекетовхэу Николайрэ Любовьрэ илъэс 55-рэ хъугъэу зэдэпсэух. Олег Чагайрэ Надежда Хенрэ зызэшъхьэгъусэхэр илъэс 40, ХьацIыкIу Налбыйрэ Маринэрэ къызызэрэщагъэхэр илъэс 35-рэ хъугъэ.— ЗэгурыIоныгъэ зэрылъ унэгъуищ тиIофтхьабзэ къедгъэблэгъагъ. Ахэр илъэс 35-рэ, 40 ыкIи 55-рэ хъугъэу зэгурыIохэу зэдэпсэух. Тыфай мыхэр ныбжьыкIэхэм щысэтехыпIэ афэхъунхэу. КъэралыгъомкIэ унагъом мэхьанэшхо зэриIэр алъыдгъэIэсы тшIоигъу, — къыIуагъ ЗАГС-м АР-мкIэ и ГъэIорышIапIэ иотделэу къалэу Мыекъуапэ щыIэм ипащэу Къэзэнэ Сусаннэ.— Илъэс 35-рэ хъугъэу щыIэныгъэ гъогум тызэдытетэу тыкъырэкIо. Тиунагъо ащ фэдиз шъэфышхо иIэп. ШIулъэгъур, цыхьэ зэфэшIыныр, зэгурыIоныгъэр, зэфэгумэкIыныр тиунагъо ишапхъэх. Джары анахь шъхьаIэхэр. ШIэныгъэ зэфэшъхьафхэр зэдгъэгъотынхэр, цIыф Iушмэ такIырыплъыныр тишэн, — къыIуагъ ХьацIыкIу Маринэ.— Къыхэзгъэщмэ сшIоигъу, зищыIэныгъэ зэзыпхыгъэ зэшъхьэгъусэхэм шIулъэгъуныгъэрэ шъыпкъэныгъэрэ зэфыряIэным мэхьанэшхо зэриIэр, — къыхегъэщы Надежда Хен.— СигущыIэ мэхьанэ иIэным, шъхьэкIэфэныгъэрэ лъытэныгъэрэ зэфэтшIыжьэу тыпсэуным сыпылъ. Сишъхьэгъусэрэ силъфыгъэхэмрэ сырякъогъукъотыным сыпылъ. Сыд фэдэу зызгъэпхъэшагъэми, ахэм ялъэIу сымыгъэцэкIэн слъэкIырэп, — къыIуагъ Николай Бекетовым.— ЗэкIэми алъапсэр унагъор ары, адырэ пстэури ащ къешIэкIыгъ. Арышъ, зэкIэри унагъом къыщежьэ, — къыIуагъ Любовь Бекетовам.Унэгъо зэгурыIожьхэу, щыIэныгъэ кIыхьэ къызэдэзыкIугъэхэр агъэшIуагъэх, шIухьафтынхэр аратыгъэх, гущыIэ фабэхэр афагъэзагъэх. АР-м иартистхэм орэдхэр къафаIуагъэх, къашъохэр апагъохыгъэх.Лъэпшъыкъо Фатим.