Iэшъынэ А.
ЧIыпIэ зыгъэIорышIэжьыным хэщагъэхэм ягъэсэныгъэ форумэу «Шъолъыр. Хабзэ. Хэхъоныгъ» зыфиIорэр мы мафэхэм Мыекъопэ къэралыгъо технологическэ университетым щыкIуагъ. Къэралыгъо ыкIи муниципальнэ къулыкъу зэфэшъхьафхэм ялIыкIохэр, нэмыкIхэр мыщ хэлэжьагъэх.
Адыгэ Республикэм имуниципальнэ образованиехэм я Совет и Ассоциациерэ къэралыгъо ыкIи муниципальнэ къулыкъушIэхэм яIэпэIэсэныгъэ хэхъоныгъэ егъэшIыгъэнымкIэ Гупчэу Мыекъопэ къэралыгъо технологическэ университетым хэтымрэ Iофтхьабзэм кIэщакIо фэхъугъэх.Адыгэ Республикэм и ЛIышъхьэу КъумпIыл Мурат ыцIэкIэ къэзэрэугъоигъэхэм шIуфэс къарихыгъ АР-м и Премьер-министрэ игуадзэу Хъоткъо Хъызыр.— Мыщ фэдэ Iофтхьабзэхэм муниципальнэ образованиехэм ялIыкIохэм яшIэныгъэхэм ащыхагъахъо, ягумэкIыгъохэр къащаIэтых, ягъэхъагъэхэр къащагъэлъагъох, IэпэIэсэныгъэу аIэкIэлъымкIэ зэхъожьых. Хэбзэ къулыкъумкIэ чIыпIэ зыгъэIорышIэжьыным IофшIэнэу ыгъэцакIэрэм осэ ин иI. ЦIыфхэм ящыIэкIэ-псэукIэ нахьышIу шIыгъэным, ягумэкIыгъохэр дэгъэзыжьыгъэнхэм тызэгъусэу тыдэлажьэ, — къыIуагъ ащ.Зигъо Iофыгъохэм зэратегущыIэщтхэр, социальнэ лъэныкъохэм, цIыфхэм IофшIэпIэ чIыпIэхэр ягъэгъотыгъэнхэм, псэупIэ-коммунальнэ хъызмэтым анахьэу анаIэ зэрэтырагъэтыщтыр АР-м и Премьер-министрэ игуадзэ къыIуагъ.
— Мэхьанэшхо зиIэ лъэныкъохэм ащыщ социальнэ псэуалъэхэм ягъэпсын. Мы лъэныкъомкIэ республикэм хэхъоныгъэхэр ешIых, ау IофшIэныр джыри нахь дгъэлъэшын фае. Муниципалитетхэр лъэпкъ проектхэм чанэу зэрахэлажьэхэрэр сигуапэу къыхэзгъэщы сшIоигъу. Ащ ишIуагъэкIэ шъолъырым икъалэхэр, ирайонхэр, къоджэ псэупIэхэр нахь зэтегъэпсыхьагъэ, цIыфхэм ящыIэкIэ-псэукIэ нахьышIу мэхъу. — къыIуагъ Хъоткъо Хъызыр.Къэралыгъо къулыкъумкIэ ыкIи IофышIэ политикэмкIэ шъолъыр гъэIорышIапIэм ипащэу Бэгугъэ Азэмат къэзэрэугъоигъэхэм закъыфигъэзагъ. Къэралыгъо ыкIи муниципальнэ къулыкъухэм яIофшIэн зэхъокIыныгъэ инхэр зэрэфэхъухэрэр, цифрэ шIыкIэр щыIэныгъэм жъугъэу къызэрэхэхьагъэр ащ къаIуагъ. АмалыкIэхэр ащ къызэрэздихьыгъэхэм дакIоу, пшъэрылъ гъэнэфагъэхэри щыIэ зэрэхъугъэхэр къыхигъэщыгъ.Нэужым муниципальнэ образованиеу анахь къахэщыгъэхэр агъэшIуагъэх. ЧIыпIэ зыгъэIорышIэжьыным хэхъоныгъэ ышIынымкIэ Урысые Ассоциацием имедаль афагъэшъошагъ Айрюмовскэ къоджэ псэупIэм ипащэу Олег Коваленкэм, Красногвардейскэ къоджэ псэупIэм ипащэу Андрей Брянцевым. Пэнэжьыкъое къоджэ псэупIэм ипащэу Кушъу Аслъан Ассоциацием ибгъэхалъхьэ ратыгъ.
Адыгэ Республикэм имуниципальнэ образованиехэм я Совет и Ассоциацие ипащэу Апсэлямэ Рэмэзан икIыгъэ илъэсым Iофэу ашIагъэм изэфэхьысыжьхэр къыриIотыкIыгъ. Мы организациер республикэм 2006-рэ илъэсым щызэхащагъ. Ащ къыщегъэжьагъэу муниципальнэ образованиехэм хэхъоныгъэхэр ашIынхэм дэлажьэ. Ащ ишIуагъэкIэ къоджэ псэупIэхэм хэхъоныгъэхэр ашIых, цIыфхэм ящыIэкIэ-псэукIэ нахьышIу мэхъу.— Анахь мэхьанэ зиIэ лъэныкъохэм ащыщ хэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъу афэхъугъэныр. Муниципалитетхэм гуфэкIо купэу ащызэхащэхэрэм чанэу Iоф ашIэ. ДзэкIолIхэр зыухъумэхэрэ хъытыухэр, шэф остыгъэхэр ашIых, ящыкIэгъэ Iэмэ-псымэхэр аугъоих, — къыIуагъ Ассоциацием ипащэ.Къэралыгъо ыкIи муниципальнэ IофышIэхэм лъэныкъо зэфэшъхьафхэмкIэ яшIэныгъэхэм ахагъэхъонымкIэ мыщ фэдэ форумхэм яшIуагъэ къызэрэкIорэр ащ къыхигъэщыгъ. ГъэрекIо республикэ Iофтхьабзэхэм анэмыкIэу, федеральнэмэхьанэ зиIэхэм муниципалитетхэм япащэхэр зэрахэлэжьагъэхэр къыIуагъ. КIэухым мы илъэсым пшъэрылъэу зыфагъэуцужьыхэм къащыуцугъ. Хэхъоныгъэхэр ашIынхэм зиIахьышIу хэлъ АР-м и ЛIышъхьэу КъумпIыл Мурат зэрэфэразэхэр къыкIигъэтхъыгъ.Нэужым форумым иIофшIэн аублагъ. Шъолъыр зэфэшъхьафхэм къарыкIыгъэ спикерхэр къэзэрэугъоигъэхэм гущыIэгъу афэхъугъэх. Муниципальнэ образованиехэм хэхъоныгъэхэр ашIынхэм пае зигъо Iофыгъохэр къаIэтыгъэх. Программэм къыдыхэлъытагъэу «Консолидация российского общества в периоды исторических вызовов» зыфиIорэм къытегущыIагъ обществэу «ШIэныгъ» зыфиIорэм илекторэу Геннадий Гасановыр. Лъэпкъ зыкIыныгъэм мэхьанэу иIэр, лIэшIэгъу зэфэшъхьафхэм ятарихъ щысэ къышIызэ хэгъэгум исуверенитет зэрагъэпытагъэр ащ къыриIотыкIыгъ. Организациехэм Iоф ащызышIэщтхэм ягъэхьазырын фэгъэхьыгъэу псалъэ къышIыгъ хьакIэпэгъокIыным ипроектхэм хэхъоныгъэ ашIынымкIэ экспертэу Виктория Борлюк. Урысые къэралыгъо къулыкъушIэм ипшъэрылъхэр зэригъэцэкIэн фэе лъэныкъохэм къатегущыIагъ Къыблэ федеральнэ университетым ипрофессорэу Александр Нечушкиныр. Медиааналитикэм ыкIи социальнэ хъытыухэм ягъэIорышIэн къытегущыIагъ шъолъырхэм ягъэIорышIэнкIэ Гупчэу Адыгеим щыIэм ипащэу Къоджэшъэо Казбек. Джащ фэдэу цифрэ шIыкIэр къэралыгъо ыкIи муниципальнэ гъэIорышIапIэхэм ащыгъэфедэгъэным епхыгъэу къэзэрэугъоигъэхэм гущыIэгъу къафэхъугъ Мыекъопэ къэралыгъо технологическэ университетым прикладной хьисапымкIэ ыкIи къэбарлъыгъэIэс щынэгъончъэнымкIэ икафедрэ ипащэу Цундышк Вячеслав.Форумым икIэух зэфэхьысыжьхэр ашIыгъэх, къэралыгъо ыкIи муниципальнэ къулыкъухэм хэхъоныгъэ ашIынымкIэ пшъэрылъхэр агъэнэфагъэх.
ДЕЛЭКЪО Анет.