БлэкIыгъэ 2025-рэ илъэсым ибюджет гъэцэкIагъэ зэрэхъугъэм фэгъэхьыгъагъ «публичнэ едэIунхэу» АР-м иминистрэхэм я Кабинет тыгъуасэ зэхищэгъагъэр. АР-м и Къэралыгъо Совет – Хасэм и Тхьаматэ игуадзэу, бюджет-финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ икомитет ипащэу Iэщэ Мухьамэд ащ тхьамэтагъор щызэрихьагъ.
Iофтхьабзэм Парламентым идепутатхэм ащыщхэр, муниципальнэ образованиехэм, къулыкъу зэфэшъхьафхэм, общественнэ организациехэм ялIыкIохэр, студентхэр, нэмыкIхэр хэлэжьагъэх.АР-м финансхэмкIэ иминистрэу Виктор Орловым 2025-рэ илъэсым бюджетыр гъэцэкIагъэ зэрэхъугъэм нэIуасэ къыфишIыгъэх. УФ-м и Президент лъэпкъ гухэлъхэм, нэмыкI социальнэ лъэныкъохэм афэгъэхьыгъэ унашъоу къышIыгъэхэм, АР-м и ЛIышъхьэ пшъэрылъэу къыгъэуцухэрэм, федеральнэ министерствэхэм адашIыгъэ зэзэгъыныгъэхэм, лъэпкъ проектхэм къащыдэлъытагъэхэм ягъэцэкIэн пстэумэ апшъэ зэрашIыгъэхэр ащ къыхигъэщыгъ.Министрэм къызэриIуагъэмкIэ, зэхэт бюджетым ихахъохэр сомэ миллиард 53,6-рэ, ихъарджхэр сомэ миллиард 55,6-рэ хъущтыгъ. Бюджетым щыщэу сомэ миллиард 33-м ехъур хэбзэIахьэу ыкIи мыхэбзэIахьэу, сомэ миллиард 20,5-р зымыгъэзэжьын мылъкоу къыхэлъхьагъэ хъугъэ.Бюджет ахъщэм щыщэу сомэ миллиарди 10,7-м ехъур гъэсэныгъэм исистемэ, сомэ миллиарди 9,8-р социальнэ Iофхэм, ащ фэдиз пIоми хъунэу лъэпкъ политикэм, сомэ миллиарди 4,3-м ехъур псауныгъэм икъэухъумэн апэIухьагъ. Ащ нэмыкI лъэныкъохэм, гущыIэм пае, культурэм, гъогушIыным, псэупIэ-коммунальнэ хъызмэтым, физкультурэм, спортым, нэмыкIхэм апэIухьагъэхэм министрэр игъэкIотыгъэу къатегущыIагъ. ИкIэухым республикэм чIыфэ темылъэу пшъэрылъэу иIэхэр, зэзэгъыныгъэу ышIыгъэхэм къадэлъытагъэхэр зэкIэ гъэцэкIагъэхэ зэрэхъугъэр, финанс зыпкъитыныгъэр къызэрэзэтыригъэнагъэм къыкIигъэтхъыгъ.Ащ ыуж Iофтхьабзэм хэлэжьагъэхэм яупчIэхэм джэуапхэр министрэм къаритыжьыгъэх. Республикэ бюджетым къыхэхыгъэ субсидиеу муниципальнэ образованиехэм афатIупщыхэрэм апае ахэм ялIыкIоу къэгущыIагъэхэм ярэзэныгъэ къыраIотыкIыгъ.
ХЪУТ Нэфсэт.