Лъэпшъыкъо Ф.
IэпэIасэхэм ашIыгъэ нысхъапэхэр зыхэхьэгъэхэ къэгъэлъэгъонэу «Нысхъэпэ къэбархэр» зыцIэр Мыекъуапэ щэкIо. Урысыем щыпсэурэ лъэпкъхэм языкIыныгъэ и Илъэс Iофтхьабзэр фэгъэхьыгъ. Ащ изэхэщэн зигукъэкIыр мысатыу организациеу «Нысхъапэхэм ятарихъ унэ-музей».
Нысхъапэхэр шэкIым, тхылъыпIэм, шъом, бзыхьафхэм, пхъэм, бжъэм, уарзэм ыкIи нэмыкIхэм ахэшIыкIыгъэх, гъэшIэгъон дэдэу гъэпсыгъэх.— Урысыем къыщыращэкIырэ къэгъэлъэгъонышхор Адыгеим къызэрэнэсыгъэм лъэшэу тигъэгушIуагъ. Ащ къыдыхэлъытэгъэ зэнэкъокъоу «Хоровод кукол народов Адыгеи» зыфиIорэм изэфэхьысыжьхэр тшIыгъэх, — къыIуагъ тарихъымкIэ музеим ипащэу Галина Яроваям.— Шъолъырым инысхъэпэ анахь дахэм фэгъэхьыгъэ зэнэкъокъоу зэхэтщагъэм IэпэIасэхэм яIэшIагъэхэр къырахьылIагъэр, ахэу хьалэмэтэу гъэпсыгъэх. Пкъыгъо пэпчъ зы лъэпкъым ишъуашэ къырегъэлъэгъукIы. Тилъэпкъ инысхъапи Iофтхьабзэм хэхьагъ. IэпэIасэхэм яIэшIагъэхэм тахэдагъ, Алла Васильевамрэ Валентина Мирошникрэ анахь дэгъухэу къахэтхыгъ, — къыIуагъ къэлэ администрацием культурэмкIэ игъэIорышIапIэ испециалистэу Кристина Шухрат.
— СиIэшIагъэ къызэрыхахыгъэм лъэшэу сигъэгушIуагъ. Синысхъапэ Урысыем икъэгъэлъэгъонышхо зэрэхэхьащтым гушхоныгъэ къысхилъхьагъ, Адыгеир дунаим дахэкIэ щашIэным ар фэIорышIэщт, — къыIуагъ зэнэкъокъум и Гран-при къизыхыгъэ Алла Васильевам.Лъэпшъыкъо Фатим.