Магнит жьыуаехэр, ахэр цIыфхэм зэралъыIэсыхэрэр

ЗэрагъэунэфыгъэмкIэ, магнит жьыуаехэм (магнитные бури — ред.) апэкIэ сыдигъуи тыгъэр лъэшэу къэлыды, ащ нэужым плазмэ ошъуапщэхэр къызыхедзых, къетIуп­щых. Ахэр ары магнит жьыуаехэр къызыхэкIэу къаIорэр шIэныгъэхэмкIэ Урысые академием космическэ ушэтын­хэмкIэ и Институт тыгъэ астрономиемкIэ и Лабораторие ишIэныгъэлэжьхэм.

Аущтэу ащ фэдэ жьыуаехэр илъэсым зэп тыгъэм «къызитIупщыхэрэр», ахэр тхьамафэрэ ащ нахьыбэри зэпымыухэу мэхъу. ЦIыфхэм япсауныгъэ зэхъокIэу, шъхьэр узэу, тэрэзэу мычъыешъухэу, гур «онтэгъоу», нэмыкIхэри зэхашIэу къызыщыхэкIырэм ахэр зэкIэ магнит жьыуаехэм арапхы.Ащ фэдизэу а жьыуаехэр щына­гъохэмэ ыкIи ахэм пэшIорыгъэшъэу зафэбгъэхьазырын плъэкIыщтымэ къызэхифыгъ врач-терапевтэу Дмитрий Демидик.Экспертхэм язэфэхьысыжьхэр иIэубытыпIэхэу РИА Новости къыщитыгъэ материалым специалистым къызэрэщиIорэмкIэ, магнит жьыуаехэм ялъэхъан зипсауныгъэ арэущтэу зэхъокIы­хэрэр гумэкIым лъэшэу ыIыгъхэр ыкIи гу-лъынтфэ системэм ылъэныкъокIэ щы­кIагъэхэр зиIэ цIыфхэр ары.

«Бэрэ зэхэтэхы магнит жьыуаехэм апкъ къикIыкIэ цIыфым ипсауныгъэ изытет зэщыкъоу зэраIорэр егъэлые­кIыгъэу щытэу, ау ащ дэгъоу зигъэпсэфэу, рэхьатэу чъыеу, физическэу улэоу, гумэкIыгъоу зыIыгъым «къы­IэкIэкIымэ», а магнит жьыуаехэм къызыдахьырэ нэшанэхэр зэкIэ текIыхэу. Арэу щытми, ахэм цIыфым ипсауныгъэ изытет зэщагъэкъон алъэкIымэ, ахэр ащкIэ щынагъохэмэ зыфэпIощт упчIэм джэуап гъэнэфагъэ иIэп», — еIо врачым.Ащ къызэрэхигъэщырэмкIэ, мыхэм афэдэ геомагнитнэ хъугъэ-шIагъэхэр зыщагъэунэфырэ лъэхъаным инфарктхэм, инсультхэм арылIыкIыхэрэм япчъа­гъэ хэхъо, ау мыбэу. Специалистхэм ащыщхэми а магнит жьыуаехэм ялъэ­хъан ясымаджэхэм ашъхьэ узэу, дэеу чъыехэу, агухэр псынкIащэу къытеохэу зэрэхъурэр къыхагъэщы. Ау цIыф псау­хэми ащ фэдэ гумэкIыгъохэр яIэхэу мэхъу.Игупшысэхэм зэфэхьысыжь къафишIызэ ащ къыкIегъэтхъы: «Пстэуми анахь шъхьаIэу къызгурыжъугъэIон фаер — магнит жьыуаер узэп».Дмитрий Демидик джыри зы лъэныкъо тынаIэ тырытегъадзэ: цIыфхэм япсихосоматикэ елъытыгъэу, магнит жьыхьар­зэхэр зэрэщыIэщтхэр е зэрэщыIэхэр зашIэкIэ, яшъхьэузи, ягуузи ахэм языпхыхэрэр мымакIэу ахэтых. Врачым зэрилъытэрэмкIэ, мыщ дэжьым цIыфым ипыйхэр гуцэфэшIынымрэ щынэмрэ.

ЖакIэмыкъо Аминэт.