Апэрэхэм я Движение
ЗекIонымкIэ Урысые зэхахьэу «Маевка» зыфиIорэр Адыгэ Республикэм щырагъэжьагъ. ЖъоныгъуакIэм и 12-м къыщегъэжьагъэу и 16-м нэс Мыекъопэ районымкIэ Графскэ гъэхъунэм Iофтхьабзэр щыкIощт. Ащ изэхэщакIох Апэрэхэм я Движение, Росмолодежым ипрограммэу «Больше, чем путешествие» зыфиIорэр, Адыгэ Республикэм и Правительствэ.
Нэбгырэ 600 фэдиз: зэнэкъокъоу «Открывай страну» зыфиIорэм щатекIуагъэхэр, зекIо Iофтхьабзэхэм язэхэщакIохэр, зекIонымкIэ шъолъыр, муниципальнэ гупчэхэм япащэхэр, Апэрэхэм я Движение ишъолъыр къутамэхэм яIофышIэхэр мыщ хэлажьэх. IофтхьабзэмкIэ гухэлъ шъхьаIэу яIэр зекIоным Урысыем зыщегъэушъомбгъугъэныр, шъолъыр купхэр зекIонымкIэ Урысые Iофтхьабзэхэм язэхэщэн фэгъэхьазырыгъэнхэр ары. 2026-рэ илъэсым «Маевкэр» гъэшIэгъонэу зэхащэщт. Ащ хэлажьэхэрэм гъэсэныгъэ, командэ трекхэр акIущтых, республикэм щыпсэухэрэм ыкIи ихьакIэхэм апае зекIохэр ежь-ежьырэу зэхащэнэу амал яIэщт. Логистикэми, цIыфхэм ящынэгъончъагъи, нэмыкIхэми зэхахьэм лъэшэу анаIэ ащытырагъэтыщт. Программэм илъэныкъо шъхьаIэхэм зэу ащыщ Адыгеим илъэгъупхъэ чIыпIэхэм нэIуасэ афэшIыгъэнхэр. Форумым хэлажьэхэрэм гъогууанэхэр зэдакIущтых, зы куп зэдыхэтхэу Iоф зэрашIэщтым зыфагъэсэщт. Ащ нэмыкIэу спорт, лъыхъон-къэгъэнэжьын Iофтхьабзэхэри программэм къыдыхэлъытагъэх.«ЗэхэщакIохэм Iофтхьабзэм хэлажьэхэрэр адыгэхэм якультурэрэ яшэн-хабзэхэмрэ нэIуасэ афашIыгъэх. ЗекIозещэхэм республикэм итарихъ, шэн-зэхэтыкIэу ащ илъхэр къафаIотагъ, адыгэ лъэпкъ шхыныгъохэр зыIуагъэфэнэу зекIохэм амал яIагъ. Къыздэбгъэзэжьы пшIоигъо шъолъырмэ Адыгеир ащыщ. Форумым пае программэ гъэшIэгъон зэхэдгъэуцуагъ. Хэгъэгум ишъолъыр зэфэшъхьафхэм къарыкIыгъэхэм нэIуасэ зафэтшIынэу, телефонхэмкIэ тызэхъожьынэу, зекIоным зезыгъэушъомбгъу зышIоигъохэр форумым тыкъыщызэрэугъоинэу амал зэрэтагъэгъотыгъэм осэшхо фэсэшIы, — къыIуагъ Свердловскэ хэкум къикIыгъэ Анастасия Ронжинам. — Мы зэхахьэм ишIуагъэкIэ зекIо Iофтхьабзэхэм язэхэщэнкIэ къулайныгъэ гъэнэфагъэхэр аIэ къырагъэхьан, мы лъэныкъомкIэ язэпхыныгъэхэм зарагъэушъомбгъун алъэкIыщт».— «Маевкэр» мыгъатхэ ихъугъэ-шIэгъэ инхэм зэу ащыщ хъугъэ. Хэгъэгум ичIыпIэ зэфэшъхьафхэм ялIыкIохэр тадэжь къэкIуагъэх. ЗэхэщакIохэм тырягъусэу форумым бэрэ зыфэдгъэхьазырыгъ, гъэсэныгъэ программэ дэгъу зэрэзэхэдгъэуцуагъэм нэмыкIэу, Адыгеим икультурэ, ичIыопс, ишэн-хабзэхэм ахэр нэIуасэ афэтшIын тлъэкIыгъ», — къыIуагъ Апэрэхэм я Движение ишъолъыр къутамэ и Совет итхьаматэу Ованес Шекерьянц.Форумыр Адыгеим зэрэщызэхащэрэм джыри зэ къыушыхьатыгъ республикэр зекIонымкIэ Урысыем игупчэхэм зэу зэращыщыр ыкIи ныбжьыкIэхэр зекIоным пыщэгъэнхэм а Iофтхьабзэр зэрэфэIорышIэрэр.