ТиIофшIэгъоу, лъытэныгъэшхо зыфэтшIырэ Нэфышъ Светэ къызыхъугъэ мафэрнепэ хегъэунэфыкIы. ИлъэсипшI пчъагъэ хъугъэу ищытхъу аригъаIозэ ар«Адыгэ макъэм» щэлажьэ, иIофшIэн гухахъо хегъуатэ, зыфэгъэзэгъэ лъэныкъомкIэ IэпэIэсэныгъэшхо хэлъ.
Щысэ зытепхын цIыф
Нэфышъ Светэ зы кабинет сыдычIэсэу Iоф зыдасшIэрэр илъэс 30-м къехъугъ. ИшэнкIи, иIофшIакIэкIи щысэ зытырахырэм ар фэд. Шъырытэу, Iуи, шIи хэмылъэу ипшъэрылъхэр егъэцакIэ. Iофэу ышIэрэм хэшIыкIышхо зэрэфыриIэр къыхэщэу, «сыдэущтэу хэсыутми хъун» ымыIоу, тхыгъэм хэукъоныгъэу хэтхэр дигъэтэрызыжьзэ хеуты. ШэнышIу, ымакъэ Iэтыгъэу гущыIэу зэхэпхыщтэп. ИIофшIэгъухэми шъхьэкIафэ хэлъэу адэгущыIэ. Ежь Свети иIофшIакIэрэ ицIыфыгъэрэ уасэ къыфашIы.Светэ имэфэкI мафэ фэшI сыфэгушIо. Псауныгъэ пытэ иIэнэу, игупсэхэм адэтхъэжьэу щыIэнэу, джыри бэрэ къыддэлэжьэнэу сыфэлъаIо.Нэгъой Сафият.
ИIофшIакIэ уегъатхъэ
Тиредакцие Светэ фэгъэхьыгъэу арэущтэу зымыIон къычIэгъотэгъуай. Нэфышъэ Светэ иIофшIакIэ щыгъуазэу, ар мафэ къэс зылъэгъоу, еуталIэхэрэм бзылъфыгъэ чэфылэу, нэшIо-гушIоу къапэгъокIырэм агухэр ещэфых, зэрэщыгугъыхэрэр, ипшъэрылъ зэригъэцэкIэщтым яцыхьэ телъэу компьютер отделым къычIэкIыжьых.ИлъэсипшI пчъагъэхэм Светэ «Адыгэ макъэм» ижурналистхэм яIэпэрытхыхэр апэ машинкэмкIэ, нэужым компьютерымкIэ хихыгъэх, непи а IофшIэныр ары ыгъэцакIэрэр.НыбжьыкIэу редакцием къыIухьагъ, ащ щылэжьэрэ нахьыжъи, нахьыкIи заригъэштагъ, агурыIуагъ, ащыщ хъугъэ, ишэн, ицIыфыгъэ пстэуми уасэ фашIыгъ. Ежьыри IэпэIэсэныгъэ дэгъу иIэшъ, иIофшIакIэ хэти егъэразэ.Непэ ныбжьэу зэрытымкIэ тIэкIу къемыкIурэми, тащыщыбэм ащ игугъу тшIы зыхъукIэ, «Светик», «Уджыхъу цIыкIур» тэIо, ар шIу зэрэтлъэгъурэм, тызэрэфэразэм, зэрэтпэблагъэм яшыхьатэу.Операторхэм яIофшIэн джы нахь IэшIэх хъугъэ, журналистхэм янахьыбэм яматериалхэр ежьхэм хаутышъ. Арэу щыт нахь мышIэми, ахэм ащыщыбэм етIани Светэ «къыфагъэзэжьы» — а IофшIагъэхэр гъэзетым къыхаутынхэм ыпэкIэ яджэхэрэм гъэтэрэзыжьынэу афашIыгъэхэр ащ рахьылIэжьых, тэ тIэкIэкIыгъэ, гу зылъытымытэгъэ хэукъоныгъэхэри ежь-ежьырэу «къыубытыжьхэуи» къыхэкIы. Ащ къеушыхьаты гъэзетым Iоф дэзышIэрэ нэбгырэ пэпчъ ыкIуачIэ, иакъыл зыхилъхьэрэ, зэхэт IофшIагъэу ар зэрэщытыр Светэ къызэрэгурыIорэр, кIэух дэгъу ащ фэхъуным зэрэпылъыр.Унагъом щигъотыгъэ пIуныгъэм хэткIи мэхьанэ иI. ЦIыфхэм узахахьэкIэ, узыфэдэр псынкIэу нафэ къэхъу, шъорышIыгъэкIэ бэрэ уахэтышъущтэп. Светэ янэ-ятэхэм уафэрэзэнэу щыт, ялъфыгъэ адыгагъэ, цIыфыгъэ шапхъэ халъхьанхэ алъэкIыгъ.Псауныгъэ Тхьэм къыует, Свет! ШIу плъэгъоу уиIэхэм яхъяр адэбгощышъоу, цIыфхэм шIу уалъэгъоу илъэсыбэ къэбгъэшIэнэу сыпфэлъаIо.ЖакIэмыкъо Аминэт.
Лъытэныгъэр къэлэжьыгъошIоп
Илъэс 45-рэ фэдизкIэ узэкIэIэбэжьмэ, пшъэшъэ Iэпс-лъэпс лъэпэ-лъагэу Уджыхъу (Нэфышъэ) Светэ машинисткэу «Адыгэ макъэм къызыIохьэм, сыгушIогъагъ, сыда пIомэ сянэкIэ сиIахьыл благъэхэм ащыщ.Аскъэлэе гурыт еджапIэр къызеухым ыуж охътэ дэхэкIае тешIагъэу Адыгеим итхакIохэм я Союз машинисткэ ищыкIагъэу зызэхехым, ащ Iухьэгъагъ. «ЦIыф Iуш гъэсэгъабэ ащ къычIахьэщтыгъ, ахэм къаIуатэхэрэм сшIогъэшIэгъонэу сядэIущтыгъ», — ыгу къэкIыжьы Светэ.Ау «Адыгэ макъэр» ары ащ ищыIэныгъэ чIыпIэ шъхьаIэ щызыубытыгъэр. ИлъэсипшI пчъагъэм щытхъу хэлъэу ипшъэрылъхэр егъэцакIэх, ицIыфыгъэкIи, Iофым екIолIакIэу фыриIэмкIи ухигъэлъыхъухьанэу щыт. Компьютерыр псынкIэу ыкIи дэгъоу ыIэ къыригъэхьагъ. Хиутырэр зэкIэ къэбзэ-лъабз. ЗэтыдзэкIыхэрэр къэIогъу тимыфэзэ псынкIэу хеутых, уяджэжь зыхъукIэ, уагъатхъэ.Светэ ащ фэдэ екIолIакIэу Iофым фыриIэм ылъапсэхэр чыжьэу къыщежьэх. Унэгъо Iужъоу къызэрыхъухьагъэм цIыфыгъэр щагъэлъапIэщтыгъ. Сабыйхэр, мэшэлахьэу, 6 хъущтыгъэх. Ахэм янэу Сусаннэрэ янэжъэу Сибэтрэ (Тхьэм джэнэтыр къарет) цIыфыгъэу, гукIэгъоу ахэлъыгъэм гъунэ иIагъэп. Тэри тыцIыкIоу тянэ ахэм адэжь тыздищэу къыхэкIыщтыгъ. КъытфашIэщтымрэ тызэрагъэгушIощтымрэ амышIэжьэу лъэшэу къытщыгушIукIыщтыгъэх. Диныри къабзэу алэжьыщтыгъ, гъот макIэ зиIэхэм адеIэщтыгъэх, зэрэлъытэжьхэу дахэу псэущтыгъэх. Ащ фэдэ унагъом къихъухьагъэр цIыф дэй хъун ылъэкIына?!Мафэ горэм Светэ сеупчIыгъагъ: «ГъэшIэгъонба, Свет, тхыгъэу хэуутын фаер бэми, упшъыгъэми, къызхэмыгъэщэу, хъупхъэу, зым ыуж адрэр итэу тхьапэхэр зэтеолъхьэх. Сыда щэIагъэр зэпхыгъэр?» «Тянэ игущыIэхэр бэрэ сыгу къэкIыжьых, — тIэкIу плъызызэ джэуап ащ къытыгъ, — цIыф шъхьахынэм зи къыдэхъун ылъэкIыщтэп, унагъо шъуихьагъэми, сыд фэдизэу Iофыбэ шъуиIэми, шъумытхьаусых. ОтхьаусыхэкIэ, уиIоф хэкIыщтэп», — къыкIиIотыкIыжьыгъ ащ янэ игущыIэхэр.Ары, узхэтхэм, уздэлажьэхэрэм уагурыIоным, уалъытэным нахь лъапIэ щыIэп. Нэфышъэ Светэ ар дэгъоу къыгурэIо. ИунагъокIэ зэгурыIоныгъэ ахэлъэу ишъхьэгъусэрэ ежьыррэ кIэлэ дэгъу апIугъ, идахэ ехъу аригъаIорэп.Света, непэ уимэфэкI. Арышъ, сэ сшъхьэкIэ сыпфэлъаIо псауныгъэ пытэ уиIэу, уидэхэгъэ-хъупхъагъэ къыкIимычэу, уикIэлэ закъо ихъяр плъэгъоу, уищхы мэкъэ чэф тэри тыгу къыIэтэу бэрэ «Адыгэ макъэм» джыри уфэлэжьэнэу.Тхьаркъохъо Сафыет.