Зичэзыу шIушIэ IэпыIэгъоу Адыгеим ращыгъэр Республикэу Дагъыстан щыпсэухэу чIыопс тхьамыкIагъом зэрар зэрихыгъэхэм аIэкIагъэхьагъ.
ОшIэ-дэмышIэ тхьамыкIагъом къыздихьыгъэхэм ядэгъэзыжьын апэрэ мафэхэм къащегъэжьагъэу тиреспубликэ хэлажьэ. Партиеу «Единэ Россием» ишъолъыр къутамэ якIэщакIоу республикэм игуфакIохэм, ипредпринимательхэм, ицIыф къызэрыкIохэм чIыпIэ къин ифагъэхэм апае гъомылапхъэхэр, псыр, щыгъынхэр, бэрэ агъэфедэрэ пкъыгъохэр, Iэмэ-псымэхэр, генераторхэр ыкIи нэмыкIхэр аугъоигъэх ыкIи Дагъыстан арагъэщагъэх.
«ПстэумкIи тонн 250-рэ хъурэ шIушIэ IэпыIэгъу аIэкIэдгъэхьагъ. ДжырэкIэ пшъэрылъ шъхьаIэр зэрар зыхьыгъэ псэупIэхэм адэт унэхэр зыпкъ игъэуцожьыгъэнхэр ары. ЧIыопс тхьамыкIагъом унабэ зэщигъэкъуагъ, шъхьэегъэзыпIэ ямыIэу цIыфхэр къэнагъэх. Республикэу Дагъыстан къызэрэкIэлъэIугъэм тетэу унэхэр зыпкъ игъэуцожьыгъэнхэмкIэ ящыкIэгъэщт псэолъапхъэхэр ткъош республикэм IэкIэтэгъахьэх. «Единэ Россием» инароднэ программэ диштэу гуфэкIо гупчэу «Дагестанский рубеж» зыфиIорэр зэхащагъ. Ащ тонни 10 хъурэ псэолъапхъэхэр: унашъхьэхэм атыралъхьащтхэр, ОСБ-плитэхэр, трубэхэр, станокхэр, IункIыбзэхэр, шъондырхэр ыкIи нэмыкIхэр фащагъэх. Махачкала зэпхыныгъэ дытиIэ зэпыт, Iофхэм язытет зыщытэгъэгъуазэ», — къаритхагъ Адыгэ Республикэм и ЛIышъхьэ социальнэ хъытыухэм.