«Унэгъо насыпыр сурэттехыгъэкIэ» зыфиIорэ шъолъыр зэнэкъокъум зэфэхьысыжьхэр фашIыгъ. Адыгэ Республикэмрэ Херсон хэкумрэ ащыIэ ЗАГС-хэм ягъэIорышIапIэхэм, Урысыем исурэттеххэм я Союз и Адыгэ шъолъыр къутамэ ыкIи Мыекъуапэ щыIэ фотоклубэу «Лэгъонакъэр», джащ фэдэу АР-м культурэмкIэ и Министерствэ Iофтхьабзэр зэхащагъ.
Мы илъэсым мэлылъфэгъум аублэгъэ зэнэкъокъум Адыгэ Республикэмрэ Херсон хэкумрэ ясурэттеххэр чанэу хэлэжьагъэх. Автор 43-мэ яIофшIэгъэ 276-рэ ащ къырахьылIагъ. Ахэм унэгъо шэн-хабзэхэр къащыгъэлъэгъуагъ. Анахь дэгъоу осэшI купым сурэти 100 къыхихыгъ. Унагъом имэхьанэ къэгъэлъэгъогъэным ыкIи цIыфхэм язэфыщытыкIэхэр гъэпытэгъэнхэм фэIорышIэ.ЗАГС-м АР-мкIэ и ГъэIорышIапIэ ипащэу Лариса Волчановскаям зэхахьэр къызэIуихыгъ.— УФ-м и Президент иунашъоу «Урысыем щыпсэурэ лъэпкъхэм языкIыныгъэ и Илъэс къэралыгъом щызэхэщэгъэным ехьылIагъ» зыфиIорэр Адыгеим чанэу щагъэцакIэ. Ащ къыдыхэлъытагъэу зэнэкъокъур зэхэтщагъ. Унэгъо шэн-хэбзэ дахэхэр цIыфхэм алъыгъэIэсыгъэнхэр зэнэкъокъум гухэлъ шъхьаIэу иIагъ, — къыIуагъ Лариса Волчановскаям.
— Унагъор гъэпытэгъэным зэрэхэгъэгоу анаIэ щытырагъэтынэу, сабыйхэм япIункIэ унэгъо шэн-хэбзэ дахэхэр къыдэлъытэгъэнхэр, унагъо пэпчъ Хэгъэгушхом изы Iахьэу зэрэщытыр зэхишIэным зэнэкъокъур фэIорышIагъ. Сэнаущыгъэ зыхэлъ цIыфхэр къыхэгъэщыгъэнхэр, искусствэм изы лъэныкъоу щыт сурэттехыным зегъэушъомбгъугъэныр. Культурэм, нэмыкI лъэныкъохэмкIи творческэ амалэу аIэкIэлъхэм хэхъоныгъэ ягъэшIыгъэныр зэнэкъокъум пшъэрылъэу иIагъ, — къыIуагъ АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет иотдел ипащэу Нэхэе Саидэ.Зэнэкъокъум иапэрэ лъэныкъоу «Сабыигъо насыпыгъэр» зыфиIорэм кIээцIыкIухэм ящыIэныгъэ къыхэхыгъэ гум лъыIэсырэ сурэтхэр хэхьагъэх. Мыекъопэ районым ипсэупIэу Каменномостскэм щыщ сурэттехэу Олеся Енинам апэрэ чIыпIэр фагъэшъошагъ. ЯтIонэрэ лъэныкъоу «Культурэ зэфэшъхьафхэр» зыфиIорэм унагъохэм арысхэм уасэ зэрэзэфашIырэр, хабзэу арылъхэр къыщагъэлъэгъуагъ. АщкIэ апэрэ чIыпIэр Мыекъуапэ щыщ сурэттехэу Виктория Сысоевам къыхьыгъ. Ящэнэрэ лъэныкъоу «ЛIыхъужъхэр къызэрыхъухьэгъэ унагъу» зыфиIорэр зихэгъэгу къэзыгъэгъунэхэрэм афэгъэхьыгъ. Мыекъуапэ щыщ сурэттехэу Марина Александровам текIоныгъэр къыдихыгъ.Лъэпшъыкъо Фатим.