ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ Адыгеим щыпсэухэрэм сакъыныгъэ къызхагъэфэнэу къяджэ.
Украинэм ихэушъхьафыкIыгъэ къулыкъухэм мыхъо-мышIагъэу зэрахьащтхэмкIэ жъалымыгъэ зыхэлъ шIыкIэхэр зэрагъэфедэхэрэр, зыныбжь имыкъугъэхэмрэ пенсионерхэмрэ ахэм зэрэхагъэлажьэхэрэр ары ащ ушъхьагъу шъхьаIэу иIэр.
Ащ фэдэу зыхащэгъэ цIыфхэр агъапцIэхэзэ къэорэ пкъыгъоу «бытовойкIэ» алъытэрэ псэуалъэхэм ахэгъэбылъхьагъэхэр чIыпIэ зэфэшъхьафхэм арагъэхьых, нэмыкIхэм арарагъэты. Псэуалъэр зыщызэIэпахырэ уахътэм пкъыгъор къэонышъ, зэритыгъэри, езытыгъэри хэкIодэнхэр ары мурадэу зэхэщакIохэм яIэр.
Республикэм щыпсэухэрэр, сакъыныгъэ къызхэжъугъэфэнэу, зяшъумыгъэгъэпцIэнэу, къэкIопIэ зэфэшъхьафхэм къарыкIыгъэ къэбарэу къышъулъыIэсхэрэр шъууплъэкIунхэу, зыщыщ шъумышIэхэрэм интернеткIэ е телефонкIэ шъуадэмыгущыIэнэу тыкъышъоджэ.
Нэжъ-Iужъхэр ыкIи зыныбжь имыкъугъэхэр гъэпцIакIохэм ащыухъумэгъэнхэм, терроризмэм епхыгъэ Iофтхьабзэхэм ахамыщэнхэм афэшI Iофым хэлъыр агурыжъугъэIон фаеу зэрэщытым шъунаIэ тешъодгъадзэмэ тшIоигъу. Шъугу къэтэгъэкIыжьы, УФ-м ихэушъхьафыкIыгъэ, ихэбзэухъумэкIо, икъэралыгъо, имуниципальнэ хэбзэ къулыкъухэм, банкхэм ыкIи нэмыкIэу чIыфэ зытырэ организациехэм яIофышIэхэр цIыфхэм афытеохэу е интернеткIэ зэпхыныгъэ ада-шIэу яахъщэ нэмыкI счет щынэгъончъэ агъэкIонэу е курьерым ратынэу араIорэп.