Мыекъопэ къэлэ администрациер
Зэтырагъэпсыхьащт общественнэ чIыпIэхэм якъыхэхынкIэ Урысые онлайн-мэкъэтыныр мы илъэсым мэлылъфэгъум и 21-м къыщегъэжьагъэу мэкъуогъум и 12-м нэс кIощт.2026-рэ илъэсым къыщыублагъэу УФ-м и Президент пшъэрылъ къызэришIыгъэм тетэу проектым нахь чIыпIабэ къыхиубытэщт: джы мэкъэтыныр ащэкIо къэлэ ыкIи къоджэ псэупIэхэу нэбгырэ мин 20-м нахьыбэ зыщыпсэухэрэм. Владимир Путиным къызэриIорэмкIэ, мэхьанэшхо иI цIыфхэм яшIошI къыдыхэлъытагъэу ыкIи ахэм яхэдэн елъытыгъэу чIыпIэхэр зэрэзэтырагъэпсыхьэхэрэм. «ЧIыпIэхэм ащыпсэухэрэр тигъусэхэу зэхъокIыныгъэшIухэм такъыфэкIон фае», — къыхегъэщы АР-м и ЛIышъхьи.
Шъугу къэдгъэкIыжьын, мы проектым тетэу 2026-рэ илъэсым ыкIэм нэс Успение Пресвятой Богородицы зыфиIорэ чылысэу Мыекъуапэ дэтым къыпэIулъ чIыпIэри джырэ уахътэм диштэу зэтырагъэпсыхьащт. Мыекъуапэ дэс нэбгырэ мин 17-м ехъумэ гъэрекIо амакъэ а псэуалъэм фатыгъагъ. Джащ фэдэу БжыхьэкъоякIэм культурэм иунэу дэтым пэмычыжьэу кIэлэцIыкIу джэгупIэр, Яблоновскэм кIэлэцIыкIу-спорт чIыпIэ ащызэтырагъэпсыхьэх. ЦIыфхэм яшIоигъоныгъэхэр къыдалъытэзэ, 2027-рэ илъэсым зэтырагъэпсыхьащт зичэзыу псэуалъэхэм яспискэ зэхагъэуцощт.Мыекъуапэ амакъэ атынэу къыщагъэлъэгъогъэ общественнэ чIыпIэхэр: заохэм ащыфэхыгъэхэм ясаугъэт, Чернобыль АЭС-м къыщыхъугъэ тхьамыкIагъом икIэуххэм ядэгъэзыжьын хэлэжьагъэхэм ясаугъэт, урамэу Шоссейнэм (урамэу Крайнем къыщежьэу я 6-рэ переулкэм нэсэу) тет аллеер, Черемушкэм щыIэ паркыр.
Специалистхэм къызэрэхагъэщыгъэмкIэ, заохэм ащыфэхыгъэхэм ясаугъэт къызкIыхахыгъэр Хэгъэгу зэошхор къызежьагъэр мыгъэ илъэс 85-рэ зэрэхъурэм епхыгъ. Заохэм ащыфэхыгъэхэм ясаугъэт дэжь ЕгъэшIэрэ машIор зыщызэкIагъэблагъэр къэкIорэгъэм илъэс 60 хъущт. Мы чIыпIэр Адыгеим икъэлэ шъхьаIэ дэсхэм агъэлъапIэхэрэм ащыщ.Мыекъуапэ щыпсэухэрэм Чернобыль АЭС-м къыщыхъугъэ аварием идэгъэзыжьын хэлэжьагъэхэм ясаугъэти мэхьанэшхо раты. Мы чIыпIэр зэтырагъэпсыхьанэу къызкIыхахыгъэр а хъугъэ-шIэгъэ тхьамыкIагъор къызыхъугъэр мыгъэ илъэс 40 зэрэхъурэм епхыгъ.
Район цIыкIоу «Восходым» иаллее тикъалэ къэзыгъэдэхэрэ чIыпIэхэм ащыщ. Микрорайоным щыпсэухэрэми, Адыгеим ичIыопс лъэгъупхъэ чIыпIэхэр зэзыгъэлъэгъу зышIоигъо зекIохэми ар якIуапI.Джащ фэдэу Черемушкэм ипарк ипсыутхэу «Дивизие Iэлыр» зыфиIорэри зэтырагъэпсыхьанэу къыхахын алъэкIыщт. Апэрэ дунэе заом илъэхъан Кавказым изэолI бланэхэр урысыдзэм хэтхэу пхъашэу зэуагъэх. Кавказ шыудзэр лIыхъужъныгъэшхорэ псэемыблэжьныгъэрэ къызыхэзыгъэфэгъэ дзэу тарихъым хэхьагъ.
Урысые онлайн-мэкъэтыным хэти хэлэжьэн зэрилъэкIыщтыр Адыгеим и ЛIышъхьэу КъумпIыл Мурат къыхигъэщыгъ.— А псэупIэхэм адэсхэу зыныбжь илъэс 14 икъугъэхэр платформэ зыкIэу «Къэралыгъо фэIо-фашIэхэр» зыфиIорэм щыкIощт мэкъэтыным чанэу хэлэжьэнхэу къесэгъэблагъэх. ЦIыфхэм яшIошIхэр икъоу зэгъэшIэгъэнхэмкIэ ищыкIэгъэ амалхэр зэрахьанэу пшъэрылъ афэсшIыгъ. ЗэтебгъэпсыхьанкIэ нахь къекIурэ чIыпIэр къыхэхыгъэнымкIэ ыкIи чIыпIэрысхэмкIэ нахь гуIэтыпIэ ар шIыгъэнымкIэ нэбгырэ пэпчъ ымакъэ тэркIэ мэхьанэшхо иI. Урысые Федерацием и Президентэу Владимир Путиным зэрэхигъэунэфыкIыгъэу, «джырэ уахътэм диштэрэ щыIэкIэ-псэукIэ цIыфхэм ягъэгъотыгъэн, тикъалэхэмрэ псэупIэхэмрэ ятеплъэ нахьышIу шIыгъэн фае. Ау къахэзыгъэщырэ нэшанэхэу, тарихъ кIэнэу ахэм яIэхэр къэухъумэгъэнхэм мэхьанэшхо иI». Лъэныкъо пстэури къыдэтлъытэзэ, мы пшъэрылъым игъэцэкIэн тыкъекIуалIэ, программэ зэфэшъхьафхэр къызфэтэгъэфедэх. ГущыIэм пае, «Единэ Россиер» кIэщакIо зыфэхъугъэ экологическэ проект заулэ пхырытэщы. Мыгъэ республикэм икъэлэ шъхьаIи, нэмыкI псэупIэхэми чъыг мини 10 ащыдгъэтIысхьащт», — къыIуагъ КъумпIыл Мурат.
Джырэ мэкъэтыным республикэм имуниципальнэ псэупIи 9-мэ ячIыпIэхэр къыхэлажьэх.АдыгэкъалэкIэ: урамэу Пролетарскэм тет кIэлэцIыкIу джэгупIэр, скверэу урамхэу Пролетарскэмрэ Чайковскэм ыцIэ зыхьырэмрэ атетыр.ИнэмкIэ: къутырэу Суповскэм ыкIи къутырэу Новый Сад адэт кIэлэцIыкIу джэгупIэхэр.ЯблоновскэмкIэ: кIэлэцIыкIу спорт площадкэу урамэу Космическэм тетыр, я 15-рэ еджапIэм къыпэIулъ общественнэ чIыналъэр ыкIи спортым зыщыпылъхэу урамэу Железнодорожнэм тетыр.ДжаджэмкIэ: скверэу «Центральнэр» зыфиIоу урамэу Краснэм тетыр (я 2-рэ уцугъор) ыкIи культурэм и Унэу Афанасовым ыцIэ зыхьырэм къыпэIулъ общественнэ чIыпIэр.КощхьаблэкIэ: пчэи мэзцIыкIур ыкIи урамэу Степноим тет кIэлэцIыкIу джэгупIэр.КрасногвардейскэмкIэ: культурэмрэ зыгъэпсэфынымрэкIэ паркыр (я 3-рэ чэзыур) ыкIи район цIыкIоу Черемушкэм тет общественнэ чIыпIэр.Мыекъопэ районымкIэ: псэупIэу Кужорскэм иобщественнэ чIыналъэу Лениным ыцIэ зыхьырэ урамым тетыр ыкIи зэкIэми зэдагъэфедэрэ чIыпIэу спортплощадкэ къыздыхэлъытагъэу ХъымыщкIэй иурамэу Советскэм тетыр.Шэуджэн районымкIэ: Хьакурынэхьаблэ игупчэ ыкIи хэушъхьафыкIыгъэ дзэ операцием хэлэжьагъэхэм яскверэу псэупIэу Заревэм дэтыр.АлександраБалабась.