IофшIэгъу зэIукIэгъу

Адыгеим и ЛIышъхьэу КъумпIыл Мурат IофшIэгъу зэIукIэгъу АР-м и Правительствэ зычIэт унэм щыдыриIагъ Мыекъопэ къэралыгъо технологическэ университетым иректорэу Къуижъ Саидэ. Iофыгъо шъхьаIэу зытегущыIагъэхэр республикэм иэкономикэ ылъэныкъокIэ Iоф зышIэщтхэм ягъэхьазырынкIэ хэбзэ къулыкъухэмрэ апшъэрэ еджапIэмрэ азыфагу илъ зэдэлэжьэныгъэм зегъэушъомбгъугъэныр ары.

КъумпIыл Мурат къызэрэхигъэщы­гъэмкIэ, республикэм Iоф щызышIэщтхэр гъэхьазырыгъэнхэм епхыгъэ лъэныкъом мэхьанэшхо иI. АР-м и ЛIышъхьэ къызэ­риIуагъэмкIэ, экономикэм зыпкъитыныгъэ хэлъэу хэхъоныгъэ ышIыныр зэлъы­тыгъэр къыдэгъэкIыжьыным, мэкъу-мэщым, псэолъэшIыным, зекIоным ыкIи нэмыкI лъэныкъохэм шIуагъэ хэлъэу Iоф ащызышIэн зылъэкIыщтхэр зэрагъэхьазырхэрэр ары.Псауныгъэм икъэухъумэнкIэ Iоф зы­шIэщтхэм нахь игъэкIотыгъэу къащыуцугъэх. Къуижъ Саидэ къызэриIуагъэмкIэ, МКъТУ-м имединститут илъэс къэс а лъэныкъомкIэ Iоф зышIэщт нэбгырэ 360-м ехъу къычIетIупщы. Студентхэм яегъэджэн анахьэу зыфытегъэпсыхьагъэр джырэ медицинэ амалхэр гъэфедэгъэнхэр, IэзапIэхэм Iоф ащашIэныр ары. Ащ амал къеты технологие инхэр медицинэм зыщагъэфедэхэрэ лъэхъаным апшъэрэ еджапIэхэр къэзыуххэрэм Iоф­шIэн агъотынэу. ЗэрэгугъэхэрэмкIэ, а лъэныкъомкIэ Iоф зышIэн зылъэкIыщтхэр ыкIи медицинэ институтыр къэзыухы­хэрэр нахьыбэ хъущтых. ГущыIэм пае, 2025-рэ илъэсым гурыт сэнэхьат гъэсэныгъэу «сестринскэ Iофыр», «лабораторнэ диагностикэр» зыфиIохэрэмкIэ апэрэ купыр къычIатIупщыгъагъ.ЗэдэгущыIэгъум чIыпIэ гъэнэфагъэ щиубытыгъ еджэныр зэпамыгъэоу студентхэр дзэ Iофым фэгъэхьазырыгъэнхэр. МКъТУ-м и Дзэ егъэджэн гупчэ тегъэпсыхьагъэу а IофшIэныр агъэцакIэ. ЦIыф зэрымыс быбырэ пкъыгъохэм алъэныкъокIэ Iоф зышIэщтхэм ягъэхьазырынкIэ ищыкIэгъэ амалхэр зэкIэ ара­гъэгъотых. 2026-рэ илъэсым къыщегъэ­жьагъэу сэнэхьатэу «ЦIыф зэрымыс быбырэ аппаратхэмкIэ дзэ частьхэр ыкIи подразделениехэр» зыфиIорэмкIэ запасым иофицерхэр гъэхьазырыгъэнхэм иIоф аублагъ.Къэралыгъо мэхьанэ зиIэ пшъэрылъхэм язэшIохын фытегъэпсыхьэгъэ, пшъэ­дэкIыжь зыхьын зылъэкIыщт IофышIэхэр къызщагъэхьазырыщтхэ, ахэм Iоф зыща­шIэщт лъэныкъохэм атегъэпсыхьэгъэ шIэныгъэ ягъэгъотыгъэным мэхьанэшхо зэриIэр Адыгеим и ЛIышъхьэ къыхигъэ­щыгъ. Ащ нэмыкIэу волонтер IофшIэнэу МКъТУ-м истудентхэм агъэцакIэрэр, дзэ подразделениехэм, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъоу аратырэр игъоу ыкIи ищыкIагъэу ЛIышъхьэм ылъытагъ. КъумпIыл Мурат къызэрэхигъэщыгъэмкIэ, республикэм а лъэныкъомкIэ IофшIэн гъэнэфагъэ егъэцакIэ, партийнэ программэхэу «Единэ Россием» зэхигъэуцохэрэм, лъэпкъ проектхэу «IофышIэхэр» ыкIи «НыбжьыкIэхэмрэ кIэлэцIыкIу­хэмрэ» зыфиIохэрэм къадыхэлъытэгъэ игъэкIотыгъэ IофшIэныр лъэкIуатэ. ГуфакIохэми яIахьышхо а IофшIэным хашIыхьэ.Хэбзэ къулыкъухэмрэ МКъТУ-мрэ язэдэлэжьэныгъэ илъэныкъо шъхьаIэхэм зыкIэ ащыщ мэкъумэщ къыдэгъэкIыжьыным Iоф щызышIэщтхэм ягъэхьазырын. КъумпIыл Мурат къызэриIуагъэмкIэ, республикэм иэкономикэ ылъэпсэ шъып­къэу щыт мэкъу-мэщыр. Арышъ, IэпэIэ­сэныгъэ ин зыхэлъ ныбжьыкIэхэр гъэ­хьазырыгъэнхэр ищыкIагъэу хъугъэ.Ректорым къызэрэхигъэщыгъэмкIэ, МКъТУ-м гъэсэныгъэ Iофэу зэшIуихырэм анахь чIыпIэшхо щызыубытырэр мэ­къу-мэщыр ары. Мэкъу-мэщымкIэ Адыгэ научнэ ушэтэкIо институтыр 2022-рэ илъэсым МКъТУ-м къыхагъэхьагъ. Научнэ-гъэсэныгъэ IофшIэным игупчэ шъыпкъэу ар хъугъэ. Агробиотехнопаркэу «Джаджэр» УрысыемкIэ апэрэу зэхащагъ. Лъэныкъо шъхьаIэхэм зыкIэ ащыщ кIэлэеджакIохэр ащ тегъэпсыхьагъэу гъэхьазырыгъэнхэр. Мэкъу-мэщым фытегъэпсыхьэгъэ класс 15 непэкIэ республикэм щызэхэщагъ, МКъТУ-м ащ епхыгъэ Iофхэр зэшIуехых.МКъТУ-м и Попечительскэ совет IофшIэнэу ыгъэцакIэрэм ишIуагъэ къэ­кIощт научнэ ушэтынхэу ашIыхэрэр лъэгэпIакIэм нэсынхэмкIэ. АР-м и ЛIышъхьэу КъумпIыл Мурат а Советым итхьамат, ащ игуадзэр Урысые Федерацием исенаторэу Хъопсэрыкъо Мурат. Апшъэрэ еджапIэм щызэхащэгъэ советым иполномочиехэм ахэхьащтых стратегическэ унашъохэм япхыгъэ IофшIэныр, университетым ихэхъоныгъэкIэ программэ гъэнэфагъэхэм ахэплъэгъэныр.Апшъэрэ еджапIэр мылъкумрэ техни­кэмрэ алъэныкъокIэ нахь дэгъоу зэтегъэпсыхьэгъэным иIофыгъохэм хэушъхьафыкIыгъэу атегущыIагъэх. Адыгеим и ЛIышъхьэ анаIэ тыраригъэдзагъ егъэ­джэнхэмкIэ амал дэгъухэр зэрарагъэгъотыхэрэм дакIоу, нэмыкI къалэхэм ыкIи IэкIыб хэгъэгухэм къарыкIыгъэхэр зыщыпсэущтхэм икъоу ягупшысэгъэн зэрэфаем. МКъТУ-м иректор къызэрэхи­гъэщыгъэмкIэ, апшъэрэ еджапIэм общежитиитIу иI, нэбгырэ 314-рэ зычIэфэщт псэолъакIэ ашIы. Ар къалэу Мыекъуапэ игупчэ, урамэу Жуковскэм ыцIэкIэ щытым къытетэджэщт. НепэкIэ къати 9 хъущт унэм ыпкъ ишIын макIо. Этажи 7 зэтыралъхьэгъах. 2028-рэ илъэсым ар атIупщынэу мэгугъэх.Къуижъ Саидэ къызэриIуагъэмкIэ, IофшIэн язытыхэрэм адыряIэ зэпхыныгъэхэм ягъэпытэн тегъэпсыхьэгъэ Iоф­тхьабзэхэу непэкIэ университетым щы­зэшIуахыхэрэм анаIэ лъэшэу атырагъэ­ты. Республикэм имылъкукIэ рагъаджэ­хэрэм, еджэныр заухыкIэ къэзыгъэзэ­жьыщтхэм яIофыгъохэм, проектхэм зэрахэлэжьэщтхэм, республикэм ипредприятиехэм адыряIэ зэдэлэжьэныгъэм ыкIи нэмыкIхэм япхыгъэу къаIэтыгъэ Iофыгъохэм къащыуцугъэх.Адыгеим и ЛIышъхьэ джырэ уахътэм къыгъэуцурэ пшъэрылъхэм ателъытэгъэ программэхэу гъэсэныгъэм ылъэныкъо­кIэ зэхагъэуцохэрэм адегъэштэгъэным ыкIи ахэм атетэу Iофхэр зэхэщэгъэнхэм мэхьанэшхо зэриIэр къыхигъэщыгъ. КъумпIыл Мурат къызэриIуагъэмкIэ, теорием ылъэныкъокIэ шIэныгъэхэр зэряIэхэм имызакъоу, IофшIэнымкIи къулайныгъэ аIэ къырагъэхьанышъ, Адыгеим иэкономикэкIэ мэхьанэшхо зиIэ, анахь ящыкIэгъэ лъэныкъохэм афытегъэпсыхьэгъэнхэр Iофыгъо шъхьа­Iэхэм ащыщ.«Псауныгъэм икъэухъумэн, мэкъумэщ къыдэгъэкIыжьыным, нэмыкI стратегическэ нэшанэ зиIэ лъэныкъохэм ателъытэ­гъэщт IофышIэхэм ягъэхьазырынкIэ, республикэм зыпкъитыныгъэ хэлъэу хэхъоныгъэ ышIынымкIэ Iоф зышIэщтхэр гъэхьазырыгъэнхэм мэхьанэшхо иI», — къыIуагъ КъумпIыл Мурат.ЗэIукIэгъум икIэухым бгъуитIуми къа­гъэшъыпкъэжьыгъ тапэкIи язэдэлэжьэныгъэ зэрагъэпытэщтым зэрэфэхьазыр­хэр. Республикэм имылъкукIэ рагъа­джэхэрэр нахьыбэ шIыгъэнхэм, IофшIэн язытыхэрэм язэдэлэжьэныгъэ гъэпытэгъэным, республикэм ыпашъхьэ ит социальнэ-экономикэ пшъэрылъхэм язэшIохынкIэ МКъТУ-м мэхьанэу иIэм ыкIи а лъэныкъомкIэ ипшъэдэкIыжь джыри нахь зыкъегъэIэтыгъэным атегущыIа­гъэх.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.