Лъэпкъ проектэу «ЩыIэныгъэм пае инфраструктурэр» зыфиIорэм къыщыдэлъытагъэу коммунальнэ инфраструктурэм игъэкIэжьын 2026-рэ илъэсым Адыгеим щылъагъэкIуатэ.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэрэщаIуагъэмкIэ, псэолъибл мыгъэ агъэкIэжьынэу агъэнэфагъ. Ахэм сомэ миллиони 180,4-рэ апэIухьащт. Ахъщэр зэхэт бюджетэу федеральнэ, шъолъыр ыкIи муниципальнэ мылъкухэр зыхахьэхэрэм къыхэхыгъэщт.— 2025-рэ илъэсым ыкIэм псэуалъэхэм IофшIэнхэр ащырагъэжьагъэх. Ахэм зэкIэми социальнэ мэхьанэ яI ыкIи Мыекъуапэ имызакъоу, муниципальнэ образованиехэм ащыщхэри къызэлъаубытых, — къыщаIуагъ министерствэм.Мыекъуапэ иурамхэу Крыловым ыцIэ зыхьырэмрэ Ветерановымрэ псы шIоим ирыкIуапIэхэр ащызэблахъух. IофшIэнхэм япроцент 35 — 40-р зэшIохыгъэ хъугъэ. Мы псэуалъэхэм яшIын аухымэ, системэм иIофшIэн нахьышIу хъущт, ыпэкIэ къин язгъэлъэгъущтыгъэ авариехэр щыIэжьыщтхэп.Джащ фэдэу поселкэу Инэм псыкъычIэщыпIэ кIэу щашIы. Процент 41-р хагъэкIыгъ. Ащ псэупIэм дэсхэм шапхъэм адиштэрэ псы къабзэ аIэкIигъэхьащт, чIыпIэм зырагъэушъомбгъугъэми, кIуачIэхэр икъущтых.Къуаджэу Тэхъутэмыкъуае псы къабзэм ирыкIуапIэхэр щагъэпсых. Мыщ фэдэ IофшIэнхэр селоу Красногвардейскэми щырагъэжьэнхэу псэолъэшIхэм зыфагъэхьазыры.Тэхъутэмыкъое районым ит къутырэу Суповскэми псыкъычIэщыпIэ щашIы. IофшIэнхэм япроцент 77-рэ фэдизыр хагъэкIыгъ, охътэ благъэм аухынышъ, атIупщыщт. ПсырыкIуапIэхэр щашIых къуаджэу Улапи, процент 60-р гъэпсыгъэ хъугъэ.Шъугу къэдгъэкIыжьын, программэр коммунальнэ фэIо-фашIэхэр нахьышIоу гъэцэкIагъэ хъунхэм, цIыфхэм шапхъэхэм адиштэрэ псы къабзэ аIэкIэгъэхьэгъэным, псы шIоим ирыкIуапIэхэм гумэкIыгъохэр къыздамыхьынхэм фэIорышIэ.