Типщынэ ымакъэ Москва щигъэIугъ

Адыгэкъалэ щыщ пщынэо ныбжьыкIэу КIыкI Дамир Андрей Малаховым икъэтынэу «Песни от всей души» зыфиIорэм хэлэ­жьагъ. Адыгэ кIалэм илъэпкъ ыгъэшIуагъ, орэд дахэу къыщиIуагъ, пщынэм къыригъэ­Iуагъ. Зэрэдунаеу щызэлъашIэрэ адыгэ къуаемрэ бжьыныфщыгъумрэ шIухьафтынэу афищагъ.

Илъэс 19 зыныбжь кIалэу сэ­наущыгъэшхо зыхэлъыр ­Адыгэкъалэ дэт искусствэхэмкIэ кIэлэцIыкIу музыкальнэ еджа­пIэр къыухыгъ. Пщынэо ныбжьыкIэм къыригъэIорэ ижъы­рэ адыгэ орэдхэр гум нэсых, орэдыри къыдеIо.Музыкант ныбжьыкIэм зыIуд­гъэкIагъ, гущыIэгъу тыфэхъугъ.— Дамир, сыдэущтэу искусствэм укъыфэ­кIуагъа? Сыда анахьэу пщынэр къызкIыхэпхыгъэр?— Пщынэр сэ къыхэсхыгъэп, ежьым сыкъыхихыгъ, слъы хэлъэу сыкъэхъугъ. Ным фэдэу пщынэр шIу сэлъэгъу. Тиныдэлъфыбзи, тишэн-хабзи, лъэп­къым идэхагъи сипщынэ ымакъэ къеIукIы. Ащ сеоным зы­фэзгъэсэныр гухэлъышIоу си­Iагъ. Сянэжъэу КIыкI Мариет пщынэо Iазэу щытыгъ. Ащ игъа­шIэм ыгъэжъынчыгъэр адыгэ къэшъо орэдхэр ары. Пщынао сыхъуным ащ ицыхьэшхо те­лъыгъ. СыцIыкIузэ сянэ му­зыкальнэ еджапIэм сыритыгъ. Си­кIэлэегъаджэу Хьэкомэ Симэ аккардеоным орэдхэр къы­зэ­рэхезгъэщыщт шIыкIэм сыфи­гъэсагъ. Орэд къэсIонэуи сы­къэшъонэуи, аккордеонми син­тезаторми къязгъэIонэу зыз­гъэсагъ. СищыIэныгъэ зэ­рэ­псаоу музыкальнэ искусствэм еспхыгъ.— Андрей Малаховым икъэтын сыдэущтэу ­ухэлэжьэнэу хъугъа?— Социальнэ хъытыумкIэ сыкъагъотыгъ, ситворчествэ фэгъэхьыгъэ видеоролик тесхи, афэзгъэхьыгъ. Ар агу рихьи, сырагъэблэгъагъ. Къэтыным сэнаущыгъэ зыхэлъ цIыфыбэ къекIолIагъ, орэд зэфэшъхьаф­хэри къыщаIуагъ. Сэ Эльбрус Джанмирзоевым иорэдэу «Чародейка», Нэфышъэ Рустам иорэдэу «Цыканай», ащ нэмыкIэу «Море гладь» зыфиIохэрэр къыщысIуагъ. Нахь сыгумэкIын сшIошIыгъ, ау залым чIэсхэм зэкIэми орэд къызэрэздаIуагъэм кIуачIэ къыситыгъ.— Сыд фэдэ мэкъамэха уимузыкальнэ Iэмэ-­псы­мэхэм нахьыбэрэ къары­IукIырэр?— Анахь сыгу къыздеIэу, сызфэчэфэу къезгъаIохэрэр лъэпкъ мэкъамэхэр ары. Орэдым, адыгэ пщынэ мэкъэ жъын­чым кIочIэшхо иI. Ахэм гур къыдащае, тамэ къыбгуагъакIэ, пчэгум уращэ. ТилъэпкъкIэ орэдым мэхьанэшхо иI.— Социальнэ нэкIуб­гъохэм уащытэлъэгъу пщынэм адыгэ мэкъамэхэр къебгъаIоу.— Ары, Интернетым нэкIубгъо щысиIэу пщынэм къызэрезгъаIорэр къисэгъахьэ. Адыгэ мэкъамэхэр тыди щызэхахынхэу сыфай.— Музыкэм уищыIэныгъэ зэрэщытэу зэлъеу­быта?— Музыкэм сидунай чIыпIэ гъэнэфагъэ щиубытыгъ. Адыгэ лъэпкъ орэдхэр ыкIи къашъохэр сыгу рехьых. Ащ дакIоу Пшызэ псэолъэшI техникумым сыщеджэ. Ащ щызэзгъэгъотырэ сэнэхьатым сырылажьэ сшIоигъу.— Уигухэлъхэр сыд фэ­дэха?— Уахътэр лъэкIуатэ, музыкальнэ искусствэм зэхъокIыныгъэхэр фэхъух. Ащ къыхэкIэу сишIэныгъэхэм ахэзгъахъомэ сшIоигъу.— УиIэпэIэсэныгъэ джыри хэбгъэхъонэу, ­лъэгапIэхэм уанэсынэу тыпфэлъаIо!— Опсэу!Адыгэ Республикэм культурэмкIэ изаслуженнэ IофышIэу Хьэкомэ Симэ Адыгэкъалэ искусствэхэмкIэ икIэлэцIыкIу еджапIэ илъэс 37-рэ хъугъэу щэлажьэ, пщынэм къегъэIо­гъэным ныбжьыкIэхэр фе-гъасэх, ахэм ягъэхъагъэхэм арэгушхо.— Дамир сэнаущыгъэшхо хэлъ. Лъэныкъуабэ ащ къыIэкIэхьагъ: къашъор, Iэмэ-псымэхэм къари­гъэIоныр, орэдкъэIоныр. Ащ искусствэм илъэныкъуабэхэм зызэращиушэтырэм сегъэгушIо, сырэгушхо. Музыкант ныбжьыкIэр 2018-рэ илъэсым къыщыублагъэу 2023-м нэс музыкальнэ еджапIэм щеджагъ. Непэрэ уахътэм Адыгеим имузыкант ныбжьыкIэ­мэ ясатырэ пытэу хэу­цуагъ, — къыIуагъ Хьэкомэ Симэ.Лъэпшъыкъо Фатим.