Iэшъынэ А.
Студентхэм IофшIапIэ ягъэгъотыгъэнымкIэ IэпыIэгъу хъущт ермэлыкъ мы мафэхэм Адыгэ къэралыгъо университетым щыкIуагъ. Студент 500 фэдиз апшъэрэ еджапIэм ищагу къекIолIагъ.
Еджэныр къэзыухыхэрэм IофшIапIэ ягъэгъотыгъэныр, чIыпIэ компаниехэм специалист ныбжьыкIэхэр ащылэжьэнхэ амал яIэныр, университетымрэ республикэм ит предприятиехэмрэ зэпхыныгъэу яIэр нахь агъэпытэныр ары пшъэрылъ шъхьаIэу зэхэщакIохэм зыфагъэуцужьырэр.IофшIэн язытырэ организацие 27-рэ фэдиз апшъэрэ еджапIэм къекIолIагъ. Ахэм ащыщ АР-м хэгъэгу кIоцI IофхэмкIэ и Министерствэ, банк зэфэшъхьафхэм къарыкIыгъэхэр, гъэсэныгъэ учреждениехэм, мэкъумэщ хъызмэтшIапIэхэм, промышленностым илъэныкъо зэфэшъхьафхэм ялIыкIохэр. Ахэм IофшIэпIэ чIыпIэу яIэхэр, уаIухьанымкIэ шапхъэхэр, лэжьапкIэу къаратырэр ныбжьыкIэхэм къафаIотагъ.
— «Ярмарка карьеры» зыфиIорэм къыдыхэлъытагъэу мы аужырэ илъэсихым республикэм IофшIэн язытырэ организацие зэфэшъхьафхэр къетэгъэблагъэх. Ащ ишIуагъэкIэ ныбжьыкIэхэр зыфеджэгъэхэ сэнэхьатым елъытыгъэу IофшIапIэ агъоты. Ахэр нахь зыгъэгумэкIырэ лъэныкъохэм акIэупчIэх, шапхъэу пылъхэр зэрагъашIэ. Мыщ фэдэ Iофтхьабзэм шIуагъэ къызэрихьырэр дгъэунэфыгъэ, илъэс зэкIэлъыкIохэм ермэлыкъым ишIуагъэкIэ ныбжьыкIабэмэ IофшIапIэ яIэ хъугъэ, — еIо Адыгэ къэралыгъо университетым карьерэмкIэ и Гупчэ ипащэу МэщлIэкъо Амир.ДЕЛЭКЪО Анет.