С. Бушневам ихъарзынэщ
Адыгеим итхэкIо ныбжьыкIэу Славяна Бушневам итхылъэу «История йети Снежика: как Снежик и Горик стали героями на Кавказе» зыфиIорэр ипчъагъэкIэ 1000 хъоу бэмышIэу къыдэкIыгъ.
АщкIэ IэпыIэгъу къыфэхъугъ Урысыем лъэпкъ гъэсэныгъэмкIэ ыкIи шIэныгъэмкIэ иIофышIэхэм я Адыгэ республикэ профсоюз организацие.Тхылъыр Луганскэ ыкIи Донецкэ народнэ республикэхэм анахь цIыкIухэм афытегъэпсыхьэгъэ гъэсэныгъэ учреждениеу арытхэм афащэщт. Джащ фэдэу Мыекъуапэ дэт кIэлэцIыкIу IыгъыпIэхэм ащыщхэм ар аратыгъ. Урысыем щыпсэурэ лъэпкъхэм языкIыныгъэ и Илъэс ар къыдыхэлъытагъ.— КIэлэцIыкIухэм апае кIымэфэ пшысэ цIыкIур еджэгъошIоу, гъэшIэгъонэу щыт. Снежик Темыр Кавказым къэзыхьыгъэр, къушъхьэм щыпсэурэ кIэлэцIыкIоу Горик ар нэIуасэ зэрэфэхъугъэр, лIыхъужъныгъэу ахэм зэрахьагъэхэр кIэлэцIыкIухэм ашIэщт. Кавказым щыпсэухэрэм хьакIэр зэрагъэлъапIэрэр алъэгъущт, ныбджэгъуныгъэм мэхьанэу ратырэр ыкIи къиныгъом хэфагъэм IэпыIэгъу зэрэфэхъухэрэр зэхашIэщт, джащ фэдэу ахэм кIуачIэу ахэлъыр ыкIи IофшIэныр зэрякIасэр тхылъым къыщеIуатэ. Мы пшысэр Жэнэ Къырымызэ ыцIэкIэ зэхащэрэ Дунэе литературнэ зэнэкъокъум хэлэжьагъ ыкIи анахь дэгъухэм ащыщ хъугъэ, — еIо авторым.Славяна Бушневар тхэкIо ныбжьыкI, Урысыем итхакIохэм я Союз хэт, лъэпкъ литературнэ премиеу «Илъэсым итхакIу» зыфиIорэм илъэныкъохэу «КIэлэцIыкIу литературэр» ыкIи «Хъугъэ тарихъхэр» зыцIэхэм яфинал щэгъогогъо ихьагъ, сурэт проектэу «ЛIыхъужъхэм яшъхьэгъусэхэр» зыфиIоу Адыгеим щыкIуагъэм изэхэщакIохэм ащыщ. Ащ итхыгъэхэр Урысыем ыкIи нэмыкI чIыпIэ зэфэшъхьафхэм къащыхаутых. Джащ фэдэу бзэ зэфэшъхьафхэмкIэ зэрадзэкIыгъэхэу аудиопшысэхэр щыIэх. ТхылъымкIэ «Черкесс медиаплатформэм» мультфильмэ егъэхьазыры.Делэкъо Анет.