Театрэр — щыIэныгъэм игъундж

УФ-м итеатральнэ IофышIэхэм я Союз зызэхащагъэр илъэси 150-рэ мэхъу. Ащ ехъулIэу Лъэпкъ тхылъеджапIэм мэфэкI зэIукIэгъу «По обе стороны кулис» ыIоу щызэхащэгъагъ.

Хэгъэгум итеатральнэ искусствэ пы­тэнымкIэ Союзым мэхьанэу иIэр, ар щыIэ зыхъугъэ илъэси 150-м къыкIоцI хэпшIыкIэу искусствэм хахъо зэришIыгъэр Iофтхьабзэм щыкIагъэтхъыгъ.Творческэ зэхахьэр къагъэшъошIуагъ ащ къырагъэблэгъэгъэ зэлъашIэрэ артист цIэрыIохэу, илъэсыбэрэ щытхъу хэлъэу лъэпкъ искусствэр зылэжьыгъэхэу, зыIэтыгъэхэу — зэшъхьэгъусэхэу, РСФСР-м изаслуженнэ, Адыгеим инароднэ ар­тистхэу Зыхьэ Заурбыйрэ Зыхьэ Мэ­лайчэтрэ. ЗэIукIэгъур фэгъэхьыгъагъ Адыгеим итеатральнэ IофышIэхэм я Союз ишъолъыр къутамэ зэхэщагъэ зэрэхъугъэм, пшъэрылъэу иIэм, сценэм — искусствэм щылэжьэрэ нэбгырэ пэпчъ ишIушIэ кIигъэтхъэу, артистхэм ыкIи нэмыкI IофышIэхэу театрэм епхыгъэхэм ящыIэкIэ-псэукIэ нахьышIу шIыгъэным Союзыр зэрэдэлажьэрэм.

Iофтхьабзэм ныбжьыкIэхэр хэлэ­жьагъэх, ахэм чIыпIэ театрэм цIыфым ипIун-­лэжьынкIэ Iофышхоу зэшIуихырэр, ащ елъытыгъэу театрэм иартистхэм ыкIи инэмыкI IофышIэхэм аIэ зэкIэдзагъэу сыдигъуи Iоф зэрашIэрэр, лажьэрэ пэпчъ иIахь IукIэжьынымкIэ Союзым сыдигъуи егугъоу Iоф зэришIэрэр къафаIотагъ.Лъэпкъ тхылъеджапIэм иотдел ипащэу Марина Волковец УФ-м итеатральнэ IофышIэхэм я Союз илъэси 150-рэ зэрэхъурэм епхыгъэ къиIотыкIыныр къышIыгъ, хэгъэгум ит чIыпIэ театрэхэми игъорыгъоу мыщ фэдэ Союзхэр зэрэщызэхащагъэхэр къыIуагъ. Зэлъа­шIэрэ артистэу, Адыгэ драмтеатрэм исценэ роль шъхьаIэ дэгъубэр IэпэIэ­сэныгъэ ин хэлъэу къыщызышIыгъэ Зыхьэ Заурбый гущыIэр зыратым, теат­рэм иартистхэм ыкIи нэмыкI сэнэхьатхэмкIэ щылэжьэрэ цIыфыбэм уафэса­къыныр, уадеIэныр, уасэ афэпшIыныр лъэшэу зэрящыкIагъэр, ащкIэ Союзым ичIыпIэ къутамэ щыIэ зэрэхъугъэм мэхьанэшхо зэриIэр кIигъэтхъыгъ. Адыгеим мы Союзыр зыщызэхащагъэр 1986-рэ илъэсыр ары, ащ къыщегъэжьагъэу Зыхьэ Заурбый ащ пэщэныгъэ джырэ мафэхэм къанэсыжьэу дызэрихьагъ, джы игъоу алъэгъуи, нэмыкI пащэ фа­шIыгъ. ИлъэсипшI пчъагъэхэм Союзым Iофэу ыпшъэ ифагъэр, цIыфхэм афэгу­мэкIэу, яфэныкъуагъэ ышIэу ар къызэ­рэрыкIуагъэр, цIыф лэжьакIом Iофэу ышIэрэм кIэгъэгушIугъэным зэрэтегъэ­псыхьагъэр ыкIи а мурад иныр Заурбый щытхъу хэлъэу зэрэзэшIуихыгъэр къэгу­щыIагъэхэм, Союзым иштат хэт IофышIэу Дыхъу Нэфсэт, Зыхьэ Мэлайчэт IупкIэу къыраIотыкIыгъ. Мыщ фэдэ организа­циер бгъэIорышIэныр зэрэмыпсынкIэр, ау акъылыгъэ-цIыфыгъэрэ IушыгъэрэкIэ укъекIуалIэмэ, къыбдэхъущтыр зэрэбэмкIэ щысэхэр къахьыгъэх. Зыхьэ Заур апэрэ мафэхэм къащыкIэдзагъэу Адыге­им итеатральнэ IофышIэхэм я Союз уасэ фаригъэшIын зэрилъэкIыгъэр, ишэн-­акъыл зэтеткIэ бэ зэрэфызэшIо­кIыгъэр, апэдэдэ нэбгырэ 37-рэ хэтэу рагъэжьэгъагъэмэ, непэ Союзым нэбгы­ри 100-м ехъу зэрэхэтыр, театрэм иIо­фышIэ пэпчъ ащ игушIуагъуи игумэкIи зэхишIэу чанэу Iоф зэришIэрэр ыкIи тапэкIи зэришIэщтыр къаIуагъ. Лъэпкъ искусствэм, анахьэу театрэм, щылажьэрэ пэпчъ гумэкIи, гукIэгъуи, лъытэныгъи фи­шIэу Союзыр къызэрэрыкIуагъэм ­лъэпкъ искусствэр ыгъэпытагъэу ­алъытагъ.Творческэ зэIукIэгъур къыгъэкIэрэ­кIагъ тхылъ къэгъэлъэ­гъоным. Ащ тишъо­лъыркIэ театральнэ искусствэм итарихъ ыкIи сценэм щыпэрыт цIыф IэпэIасэхэм ящы­Iэныгъэ къизыIотыкIырэ тхылъ гъотыгъоябэ хэлъ. МэфэкIым хэлэ­жьагъэхэм къэгъэлъэ­гъоныр зэпаплъы­хьагъ, упчIэхэр къэзы­тыгъэ­хэри къахэкIы­гъэх.МэфэкI Iофтхьа­бзэм театрэр щыIэ­ныгъэм игъунджэу, артис­тыр умышIэрабэм яIотэкIо-къэгъэлъэгъуакIоу, узылъызыщэу зэрэщытыр къыушыхьатыгъ. Хьа­кIэхэм «тхьашъуегъэ­псэу!» зэхэщакIохэм араIуагъ.МамырыкъоНуриет.