Адыгеим иполицие икъулыкъушIэхэмрэ общественникхэмрэ кIэлэеджакIохэм хэбзэукъоныгъэхэр зэрамыхьанхэм ыкIи яхэгъэгу шIу алъэгъоу пIугъэнхэм афэгъэхьыгъэ зэIукIэгъу адыряIагъ.
ПэшIорыгъэшъ Iофтхьабзэу «Твой выбор» зыфиIорэм хахьэу Iэтахъохэр зекIокIэ дэйхэм ащыухъумэгъэнхэмкIэ республикэм ит еджапIэхэм ащеджэхэрэм заIуагъакIэ. Мыщ фэдэ зэIукIэгъухэр къалэу Мыекъуапэ, Тэхъутэмыкъое, Мыекъопэ, Кощхьэблэ ыкIи Красногвардейскэ районхэм мы мафэхэм ащэкIох.Шэн зекIокIэ дэйхэр къызхамыгъэфэнхэм фэгъэхьыгъэу Iофтхьабзэм изэхэщакIохэр кIэлэцIыкIухэм адэгущыIагъэх. Хэбзэукъоныгъэ зезыхьагъэхэм административнэ ыкIи уголовнэ пшъэдэкIыжь атыралъхьан зэралъэкIыщтыр агурагъэIуагъ. Интернетыр къызфэзыгъэфедэрэ кIэлэеджакIохэм ахъщэ псынкIэ къагъэхъэным фэшI амышIэрэ цIыфхэм цыхьэ фамышIынэу къяджагъ. Бэрэ къыхэкIы социальнэ хъытыум инэкIубгъохэр нэпцIхэу, ахэр бзэджашIэхэм яехэу.Ащ нэмыкIэу интернетым инэкIубгъохэм бэрэ къэбархэр къарэхьэ емызэгъ зэхахьэхэр щыIэнхэу, ащ ныбжьыкIэхэр къырагъэблагъэхэу. АР-м хэгъэгу кIоцI IофхэмкIэ и Министерствэ илIыкIохэм кIэлэеджакIохэр щагъэгъозагъэх мыщ фэдэ емызэгъ зэхахьэхэм ахэлажьэхэрэм пшъэдэкIыжьэу арагъэхьын алъэкIыщтхэм.КъыткIэхъухьэрэ лIэужхэм япIуныгъэкIэ мыщ фэдэ Iофтхьабзэхэм мэхьанэшхо яI. ЗэхэщакIохэм ныбжьыкIэхэр зекIокIэ дэйхэм ащаухъумэх, ащ нэмыкIэу хабзэр амыукъоным, къэралыгъом итарихъ агъэлъэпIэным фагъасэх.АР-м хэгъэгу кIоцI IофхэмкIэ и Министерствэ ипресс-къулыкъу.