Джыри зы гъэпцIакIэ къаугупшысыгъ

ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ бзэджашIэхэм цIыфхэр агъэпцIэн­хэу джыри зы шIыкIэ къызэраугупшысы­гъэм шъущегъэгъуазэ.

Джы зыщыщ умышIэрэ цIыфым банкым икартэу пIыгъым ахъщэ къырегъахьэ, уахътэ зытешIэкIэ хэу­къуагъэу еIошъ, фебгъэгъэзэжьынэу къыолъэIу. Ахъщэм зебгъэгъэзэжьыкIэ ар IэкIыб къэрал къулыкъоу УФ-м щызэхащэн зыфимытхэм ащыщ, терроризмэм ыкIи экстремизмэм апылъ организацие горэм, Украинэм иехэри зэрахэтхэу, ясчет бгъэкIуагъэу хъун ылъэ­кIыщт. Ащ тетэу бзэджэшIэгъэ зэхэщэным ухэлэжьагъэу мэхъу, ащ уголовнэ пшъэдэкIыжь пылъ.ГъэпцIакIохэм удамыхьыхыным фэшI зыщыщ умы­шIэрэ цIыфхэм реквизитэу къыуатыгъэхэмкIэ ор-орэу ахъщэм емыгъэгъэзэжьэу, банкым е хэбзэухъумэкIо къулыкъухэм зафэбгъазэмэ нахьышIу.Ащ имызакъоу щынэгъончъэнымкIэ Федеральнэ къулыкъум ицыхьэшIэгъу, иприемнэ ыкIи «исправочнэ» телефонхэм яхьщыр номер нэпцIхэр нахьыбэу бзэджашIэхэм ямыхъо-мышIагъэхэм апае агъэфедэхэ хъугъэ, мы къулыкъум хэтхэм фэдэу къэзыгъэлъэгъорэ тхылъхэр цIыфхэм мессенджерхэмкIэ афагъэ­хьыхэуи мэхъу. Ащ фэшI шъушIэн фаер:— щынэгъончъэнымкIэ Федеральнэ къулы­къум иIофышIэ фэдэу къышъуфытеоу, бзэджэшIагъэ зешъу­хьагъэу къышъогуцафэхэу зыIохэрэм цыхьэ афэшъумышI. Ащ фэдэ къэбарыр тхыгъэу цIыфым рахьылIэ, нэмыкI шIыкIэ къулыкъум иIофышIэхэм агъэфедэрэп;— щынэгъончъэнымкIэ Федеральнэ къулыкъум иIофышIэхэм яудостоверениехэм атехыгъэ сурэтхэр зыми фагъэхьырэп;— банкым чIыфэ къышъуитыщтэу е шъуиахъщэ нэмыкI счет щынэгъончъэ жъугъэкIон фаеу къышъозыIохэрэми цыхьэ афэшъумышI;— щынэгъончъэнымкIэ Федеральнэ къулыкъум иподразделениехэм IэпыIэгъу ятыгъэным, бзэджэшIагъэхэр нахь макIэ хъуным фыте­гъэпсыхьэгъэ пэшIорыгъэшъ Iофтхьабзэхэм язэхэщэн е зэрахьагъэхэм якъычIэгъэщын апае цIыфхэм яахъщэ агъэфедэрэп.ГъэпцIакIохэм цIыфхэм яахъщэ ашIуатыгъун мурад зэряIэм имызакъоу, шъолъырым рэхьатныгъэу илъыр аукъоными пылъых.Ащ пае ыпэрапшIэу цIыфым ежь ыцIэкIэ банкым чIыфэ къыIахынэу нэмыкIхэр ыуж ихьагъэхэу раIо. Ар нахь ышIошъ хъуным, психологическэу изыпкъитыныгъэ аукъоным фэшI щынэгъончъэнымкIэ Федеральнэ къулыкъум иIофышIэхэу раIо, ар къэзыушыхьатырэ тхылъ нэпцIыр рагъэлъэгъу.Джащ фэдэу цIыфым ыугъоигъэ ахъщэр шIуатыгъушъ, ащ къыригъэгъэзэжьынымкIэ IэпыIэгъу къыфэ­хъущтхэу аIо. Ащ пае дзэхэм, транспортым е банкхэм япхыгъэ инфраструктурэм хэхьэрэ псэуалъэхэр Iоф амышIэжьышъунэу зэщигъэкъонхэ фае.Шъолъырым щыпсэухэрэр, бзэджашIэхэм гущыIэгъу е пыщэгъу шъумышIынхэу тышъолъэIу.