«СынасыпышIу, мафэ къэс щыIэныгъэм икъежьапIэ сэлъэгъу»

Гурыт медицинэ IофышIэм и Дунэе мафэ непэ хагъэунэфыкIы. ЗиIофшIэн цIыфым ищыIэныгъэ епхыгъэхэм медсестрахэр ащыщых ыкIи сымаджэм нахь охътабэ ахэм адагъакIо. Ахэм ягукIэгъуныгъэ бэкIэ елъытыгъэу къыхэкIы цIыфыр зэрэзэтеуцожьырэм ипсынкIагъэ. Непэ зигугъу къэтшIыщтыр медицинэм иIофышIэ анахь дэгъухэм ясатыр хэтэу Шъхьачэ Светлан, ар илъэс щэкIырэ бгъурэ хъугъэу АР-м и Перинатальнэ гупчэ сабый къэхъугъакIэхэм реанимациемкIэ ыкIи терапиемкIэ иотделение щэлажьэ.

— УищыIэныгъэ гъогу сыдэущтэу медицинэм епхыгъэ хъугъа?— Сэнэхьатым икъыхэхынкIэ сянэшыпхъур щысэ сфэхъугъ. СыцIыкIоу ащ халат фыжьэу щыгъым сехъуапсэщтыгъ. Сянэ-сятэхэм медсестра сызэрэхъущтыр ясIощтыгъ. Мыекъопэ медицинэ училищыр къызысэухым, зэпахырэ узхэм зыщяIэзэхэрэ сымэджэщым сыщылэжьагъ. 2005-рэ илъэсым IофшIэныр мы отделением щезгъэжьагъ, непи ащ сыIут. Сисэ­нэ­хьат сыкъыфэхъугъэу сэлъытэ.— Мыщ фэдиз илъэс пчъагъэм медицинэм узэрэхэтым урыкIэгъожьэу къыхэкIыгъа?— Хьау, ащ фэдэ чIыпIэ зыкIи сиуцуа­гъэп. IофшIэгъу мафэ пэпчъ сигукIэгъу, сиIэпыIэгъу сабыйхэм зэраIукIэрэр, сиамал елъытыгъэу цIыфхэм сызэрадеIэрэр сэркIэ екъу. Илъэсхэр псынкIагъэхэп, ау ахэм кIуачIэ къысхалъхьагъ, нахь пытэ сашIыгъ.— ОркIэ сыда медицинэ IофшIэныр.— Псауныгъэм икъэухъумэнкIэ, демографием ылъэныкъокIэ Iофхэм язытет нахьышIу шIыгъэнымкIэ Перинатальнэ гупчэм мэхьанэшхо иI. Тиотделение IофшIэн хьылъэ егъэцакIэ. Медицинэ IофшIэныр гъэшIэгъоны, гушIуагъуи, нэшхъэигъуи хэлъ. ПсауныгъэмкIэ зы такъикъми мэхьанэшхо иI. ЦIыфым ищыкIэгъэ IэпыIэгъур едгъэгъотыным фэшI чэщ-зымафэм зэпымыоу тэлажьэ. Бзылъфыгъэ лъэрмыхьэхэм тынаIэ атет, цIыф цIыкIоу дунаим къытехъуагъэм ифэIо-фашIэхэр тэгъэцакIэх. Уисэнэхьат шIу умылъэгъумэ, улэжьэшъущтэп.Сымэджэщыр сиятIонэрэ унэ хъугъэ. Мыщ Iут врачхэм, медсестрахэм, нэ­мыкI IофышIэхэм тIэ зэкIэдзагъэу тызэдэлажьэ, тигумэкIи тигушIуагъуи зэдэтэгощы. Iоф­шIэныр зесэгъажьэм, сабыйхэр къызыщыхъухэрэ Унэм анестезиологиемрэ реанимациемрэкIэ отделением ипэща­гъ Цухъо Сарэ. Бзылъфыгъэ Iэдэбэу, Iушэу, ухэтми узэхэзышIыкIын зылъэкIэу ар щытыгъ. СыкIырыплъыгъ, бэмэ сафигъэ­сагъ. Джы Олег Шульман тиотделение ипащ. Ащи лъэшэу сыфэраз, врач Iаз. Зисэнэхьат хэшIыкI фызиIэ врачым удэ­лэжьэныр гупсэф.— Уипшъэрылъхэм сыда ахахьэрэр?— ТиIофшIэн лъэныкъуабэхэм япхыгъ. Врачмэ таготэу къэхъугъэкIэ сабыйхэм яфэIо-фашIэхэр тэшIэх, операцие зышIырэ врачым тыкIыгъу, бзылъфыгъэхэу сабый къызфэхъугъэхэм медицинэ IэпыIэгъу ятэгъэгъоты. СынасыпышIу, мафэ къэс щыIэныгъэм икъежьапIэ сэлъэгъу.— Медицинэм зыфэзыгъэзэн гу­хэлъ зиIэ ныбжьыкIэхэм сыда къяпIощтыр?— ПшъэдэкIыжьышхо зэрэпылъыр къыгурыIозэ цIыфым медицинэ сэнэхьатыр къыхихын фае. ШIэныгъэ куу зэриIэн фаем нэмыкIэу, ащ гукIэгъу хэлъын фае. ШIэныгъэхэм зэпымыоу ахэбгъахъозэ пшIымэ, лъэхъаным удиштэщт.— Узылажьэрэм къыщыублагъэу анахь гушIогъо мафэу е мэфэ къинэу къыхэкIыгъэ горэ угу къэкIыжьа.— ТиIофшIэн IэшIэхэп, ау сабый къэ­хъугъакIэмрэ янэрэ зыпкъ къызидгъэуцожьхэкIэ, тигушIуагъу. Ащ ыуж, сэри сын. Сипшъэшъэ закъоу Бгъошэ Дариет унагъо ихьагъ, кIэлэцIыкIу къыфэхъугъ. Сипхъорэлъф цIыкIоу Мурат къызэрэхъу­гъэр насыпыгъэу сэлъытэ. ТиIофшIапIэ — щыIэныгъэм икъежьапI.— Непэ бзылъфыгъэ ныбжьыкIэхэр сабыибэ къагъэхъуным тещыныхьэх.— Сабыйхэр — Тхьэм итын лъапIэх. Къэхъурэ сабый пэпчъ рызыкъ иI. Лъэп­къым ицIыфышъхьэ хахъо иIэмэ, ылъапсэ пытэщт. Хэтрэ унагъокIи анахь мылъку шъхьаIэу щытыгъэр ыкIи къэнэжьырэр сабыир ары.— ШъуимэфэкI ехъулIэу сыда уиIофшIэгъухэм япIо пшIоигъор?— Сэнэхьатэу къыхэтхыгъэм пшъэ­дэкIыжь ин пылъ, тызышъхьамысыжьэу ащ тызэрэфэлэжьэн фаер, цIыфхэр къы­зэрэтщыгугъыхэрэр зыщыдгъэгъупшэ хъущтэп. Тисэнэхьат епхыгъэ мэфэкIымкIэ сиIофшIэгъухэм сафэгушIо! Тхьэм къарыурэ, псауныгъэрэ къарет.Лъэпшъыкъо Фатим.