КъэбарлъыгъэIэс амалхэм яшIыхьаф

Республикэ ыкlи муниципальнэ къэбарлъыгъэlэс амалхэм ялlыкlохэм, шъолъыр шэмбэт шlыхьафхэм къадыхэлъытагъэу, Мыекъуапэ чъыгхэр щагъэтlысхьагъэх.

Республикэ гъэзетхэу «Адыгэ макъэм», «Советскэ Адыгеим», КъТРК-у «Ады­геим», Мыекъопэ телевидением ыкlи «Майкопские новости» зыфиlорэ гъэзетым яlофышlэхэм республикэм икъэлэ шъхьаlэ ичlыпIакIэхэм ащыщэу Яблоневэр шхъонтlэгъакlэхэмкlэ агъэбаигъ. Пстэумкlи ренэу уцышъо сэснэй 30 агъэтlыс­хьагъ. Шlыхьафышхом журналистхэр ягуапэу хэлэжьагъэх ыкlи зэхэт lофшlэным ыгъэчэфыгъэх.— Сигуапэ мыщ фэдэу тызэкъоуцуагъэу тызэрэзэдэлажьэрэр, — къыIуагъ КъТРК-у «Адыгеим» ипащэу Ацумыжъ Адам. — Зыгу къэкlыгъэхэм «тхьашъуе­гъэпсэу» ясэlо. Джащ фэдэу тызэгъусэу тикъэралыгъо дгъэдэхэн фае. Тызэкъот­мэ — тылъэш!— Мыекъуапэ анахь уцышъо къалэхэм ахалъытэ. Мы Iофтхьабзэм ишIуагъэкIэ джыри нахь уцышъо хъущт, ижь нахь къэбзэщт, дэхэщт. Ащи изакъоп. Зэхэт IофшIэныр сыдигъуи тхъагъо. Шэмбэт шIыхьафым журналистхэм зыкIыныгъэ къытхилъхьагъэу, тигуапэу тыхэлэжьагъ — къыхигъэщыгъ гъэзетэу «Адыгэ макъэм» иредактор шъхьаIэу Мэщ­лIэкъо Саидэ.— Сэснэир къызэрэхахыгъэмкlэ тырагъэфагъэу сэлъытэ. Ренэу уцышъощт. Лъэпкъхэм языкlыныгъэ и Илъэс, Адыгеим иапэрэ радио къулыкъу лIэшIэгъу зыщыхъурэ илъэсым мыщ фэдэ lофтхьабзэ ин рекlокlы. Арышъ, джащ фэдэу шхъонтlэгъакIэхэм тагъэгушIо зэпытэу, мамырэу Тхьэм тыщегъаI, — къыддэгощагъ КъТРК-у «Адыгеим» ирадио къулыкъу ипащэу ХьакIэмыз Сусанэ.— Къуекъо Налбый усэ иI «чъыгыр згъэтIысхьэу къэкIымэ, ар зыгорэм жьаупIэ фэхъущт» ыIоу. Джа усэр сыгу къыгъэкIыгъ непэ. Тэри мы чъыгэу дгъэ­тIысхьагъэхэм жьаупIэу къатыщытым зыгорэ чIэсыщт. Ар тхъагъоба! — еIо АР-м ижурналистхэм я Союз ипащэу ТIэшъу Светланэ.Шъугу къэдгъэкlыжьын чъыгхэм ягъэ­тlыс­хьан къыздыхэлъытэгъэ шэмбэт шIыхьафхэр АР-м и ЛIышъхьэу КъумпIыл Мурат игукъэкl. Партиеу «Единэ Россиер», къэлэ администрациер ыкlи компание купхэу «ТекIоныгъ» зыфиIорэр зэ­гъу­сэхэу Iофтхьабзэр рагъэкIокIы. Джащ фэдэу журналистхэм апэ Мыекъуапэ икъохьэпIэ лъэныкъо ланчъэ 45-рэ ыкIи сэснэй 44-рэ щагъэтIысхьагъ. Шъолъы­рым ипащэ къызэриIуагъэмкIэ, Мые­къуапэ чъыгхэр щагъэтIысхьанхэмкIэ ра­хъухьэгъэ IофшIэнышхохэм мыр язы Iахь ныIэп.— ЗэхъокIыныгъэшIухэм цIыфыбэр ахэ­лэжьэным, уасэ фашIыным ыкIи зэкIэми зэдытиунэм пае шIагъэр къаухъумэным мэхьанэшхо иI, — къыIуагъ АР-м и ЛIышъхьэу КъумпIыл Мурат.

Анцокъо Ирин.