Iэшъынэ А.
Мыекъуапэ дэт лицееу N 19-р къызызэIуахыгъэр мыгъэ илъэс 60 хъугъэ. Ащ къыдыхэлъытагъэу мэфэкI шIыкIэм тетэу «Уахътэм икапсулэ» еджапIэм идэпкъ тыгъуасэ халъхьагъ. Непэрэ мафэм лицеим ищыIакIэ, кIэлэеджакIохэм, кIэлэегъаджэхэм ягухэлъхэр, къадэхъунэу зыфаехэр зэрыт тхьапэхэр капсулэм ралъхьагъэх. ИлъэсипшI тешIагъэу мыщ къычIахьэхэрэм ар къыхахыжьыщт.Мыекъопэ къэлэ администрацием гъэсэныгъэмкIэ и Комитет ипащэ игуадзэу ШъхьакIумыдэ Сусанэ, Мыекъуапэ инароднэ депутатхэм я Совет хэтэу, хэушъхьафыкIыгъэ дзэ операцием, сэнэхьат ухьазырыныгъэмкIэ программэу «Адыгеим и ЛIыхъужъхэр» зыфиIорэм ахэлэжьэрэ Владимир Стасевыр, еджапIэм апэрэу къычIагъэкIыгъэхэр, непэрэ мафэм щылажьэхэрэр ыкIи щеджэхэрэр мэфэкI Iофтхьабзэм хэлэжьагъэх.Лицеим ипащэу Фатима Кадыровам къэзэрэугъоигъэхэм шIуфэс къарихыгъ.— ТиеджапIэ ипчъэхэр къызызэIуихыгъэхэр илъэс 60 хъугъэ. Мы уахътэм къыкIоцI лIэуж пчъагъэмэ шIэныгъэ аригъэгъотыгъ, хэхъоныгъэхэр ышIыгъэх. Непэ республикэм ит еджэпIэ анахь дэгъухэм ясатыр тыхэт, тикIэлэеджакIохэм ягъэхъагъэхэм тарэгушхо. Непэрэ щыIакIэр къыткIэхъухьэрэ лIэужхэм ядгъэлъэгъуным пае «Уахътэм икапсулэ» тшIынэу тыгу къэкIыгъ. Джырэ лъэхъанымрэ къэкIощтымрэ ар ялъэмыдж. 2036-рэ илъэсым еджапIэм щеджэщтхэм капсулэр къызэIуахыщт — къыIуагъ еджапIэм ипащэ.Iофтхьабзэм тарихъ мэхьанэ зэриIэр къэгущыIэгъэ пстэуми къыхагъэщыгъ. КIэлэеджакIохэм якъэгъэлъэгъон къэзэрэугъоигъэхэр еплъыгъэх. КIэухым апэрэ классым ис кIэлэеджэкIуищмэ юнармейцэхэр ягъусэу капсулэр дэпкъым халъхьагъ.Лицеир Урысыем иеджэпIэ анахь дэгъу 500-мэ ахэхьэ, къэзыухыхэрэм къэгъэлъэгъон дэгъухэр яIэх. ЗыкI къэралыгъо ушэтынымкIэ нэбгыритIумэ балли 100 илъэс къэс къахьы. ГъэрекIо медалист 27-рэ яIагъ, ахэм ащыщэу 15-мэ апэрэ шъуашэ зиIэ медаль, нэбгырэ 12-мэ ятIонэрэ шъуашэ зиIэр къалэжьыгъ. Ащ ыпэрэ илъэсым нэбгырэ 21-мэ медаль къахьыгъагъ. Лицеир къэзыухыхэрэр Урысыем иапшъэрэ еджэпIэ анахь дэгъухэм ачIэхьэх, гъэхъагъэхэр ашIых. Непэрэ мафэм кIэлэеджэкIо 1100-рэ мыщ щеджэ.ДЕЛЭКЪО Анет.