Комитетым ипащэу агъэнэфагъ

Адыгеим и ЛIышъхьэу КъумпIыл Мурат Адыгэ Республикэм зыкъэухъумэжьынымкIэ ыкIи ошIэ-дэмышIэ IофхэмкIэ и Комитет итхьаматэу Андрей Колесник гъэнэфэгъэным ехьылIэгъэ Указым кIэтхэжьыгъ. Республикэм и ЛIышъхьэ Комитетым ипэщакIэ зэIукIэгъу зыдыреIэм, зипэщэщт къулыкъум ипшъэрылъ шъхьаIэхэм къатегущыIагъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, Урысыем и МЧС АР-мкIэ и ГъэIорышIапIэ ипащэу Станислав Илющенкэр.КъумпIыл Мурат зэIукIэгъур къызэIуихи, цIыфхэм ящынэгъончъагъэ, чIыпIэхэм, инфраструктурэ псэуа­лъэхэм якъэухъумэн республикэм ихэбзэ къулыкъу­хэм мэхьанэшхо зэратырэ лъэныкъохэм зэращыщыр хи­гъэунэфыкIыгъ. Мы аужырэ илъэсхэм чIыопс, техногеннэ нэшанэ зиIэ тхьамыкIагъохэр мызэу, мытIоу республикэм къыфыкъокIыгъэх.2025-рэ илъэсым итыгъэгъазэ къыщегъэжьагъэу 2026-рэ илъэсым ищылэ мазэ иублэгъу нэс осышхо къызэресыгъагъэр, ащ къыздихьыгъэхэм ядэгъэзыжьынкIэ амалэу зэрахьагъэхэр Адыгеим и ЛIышъхьэ агу къыгъэкIыжьыгъ. Мыщ дэжьым КъумпIыл Мурат къыхигъэщыгъ ошIэ-дэмышIэ тхьамыкIагъохэр къызыхъу­хэкIэ цIыфхэм псынкIэу макъэ ягъэIугъэным, ащ кIэухэу къыздихьыгъэхэр дэгъэзыжьыгъэнхэм мэхьанэшхо зэряIэр, зыкъэухъумэжьынымкIэ ыкIи ошIэ-дэмышIэ IофхэмкIэ къулыкъум хэтхэм яIоф хэшIыкIышхо зэрэфыряIэм къыхэкIэу хэпшIыкIэу тхьамыкIагъом къыкIырагъэчын зэралъэкIырэр. Джащ епхыгъэу зыкъэухъу­мэжьынымкIэ ыкIи ошIэ-дэмышIэ тхьамыкIагъохэмкIэ Iофэу ашIэрэр нахь агъэлъэшынэу унашъо аштагъ.«Андрей Сергей ыкъом Урысыем ошIэ-дэмышIэ IофхэмкIэ и Министерствэ гъогушхо къыщикIугъ, исэнэхьаткIэ IофшIэкIэшIу IэкIэлъ хъугъэ. Ар ипащэу Комитетыр лъэгэпIакIэхэм зэранэсыщтым сицыхьэ телъ. Пшъэрылъ шъхьаIэр цIыфхэм ящынэгъончъагъэ къэухъумэгъэныр ары. Ащ пае зэхэщэн IофхэмкIи, кIуачIэм игъэпытэнкIи ищыкIэгъэ амалхэр зехьэгъэн­хэ фае», — къыIуагъ АР-м и ЛIышъхьэ.ЦIыфхэм макъэ языгъэIурэ шъолъыр системэм игъэ­псын ухыгъэнымкIэ, мылъкукIи, техникэкIи къулыкъур нахь зэтегъэпсыхьэгъэнымкIэ, чIыпIэхэр машIохэм ащыухъумэгъэнхэмкIэ зичэзыу Iофтхьабзэу зэрахьащтхэр республикэм ипащэ къыгъэнэфагъэх.Цыхьэ къызэрэфишIыгъэм пае КъумпIыл Мурат зэрэфэразэр, Комитетым ыпашъхьэ ит пшъэрылъхэм язэшIохынкIэ кIуачIэу, шIэныгъэу иIэр зэкIэ къызфигъэ­федэным зэрэфэхьазырыр Андрей Колесник къыIуагъ.Колесник Андрей Сергей ыкъом Адыгэ къэралыгъо университетым июридическэ факультет, Урысыем ошIэ-дэмышIэ IофхэмкIэ и Министерствэ и Воронежскэ мэшIогъэкIосэ-техническэ училищэ, Урысыем и МЧС мэшIогъэкIосэнымкIэ и Къэралыгъо къулыкъу и Академие къыухыгъэх. 1996-рэ илъэсым къыщегъэжьа­гъэу мы къулыкъум епхыгъэу Iоф ешIэ, аужырэ илъэсхэм Урысыем и МЧС Адыгэ РеспубликэмкIэ и ГъэIорышIэпIэ шъхьаIэ ипащэ игодзагъ.