УФ-м зыкъэухъумэжьынымкIэ и Министерствэ цIыф зэрымыс быбырэ пкъыгъохэм ядзэхэу ыгъэпсыгъэхэр УIэшыгъэ КIуачIэхэмкIэ анахь хэхыгъэхэм ащыщых.
Ахэр зыгъэIорышIэщт операторхэм яугъоин 2026-рэ илъэсым ищылэ мазэ аублагъ. Хэгъэгур къэухъумэгъэнымкIэ амалыкIэу щыIэм ишапхъэхэр, пшъэ- рылъхэр, ащ къулыкъу щызыхьынэу къыхэзыхыгъэ нэбгырэ пчъагъэр «Адыгэ макъэм» къыфиIотагъ АР-м идзэ комиссариат ипащэ игуадзэу Виталий Лебедевым.— Тызыхэт лъэхъаным нафэ къышIыгъ зэонымкIэ шIыкIэ-амалэу агъэфедэрэр анахьэу авиацием зэрепхыгъэр. УФ-м и Президент зыкIэтхэжьыгъэ унашъом хэбзэгъэуцугъэ гъэнэфагъэм тетэу подразделениякIэхэм къулыкъу ащызыхьыщтхэм амалыкIэхэр къареты. ЫпэкIэ адашIыщтыгъэ зэзэгъыныгъэм мыр зэрэтекIырэр къагурыIон фае. Зэзэгъыныгъэм зы илъэс пIалъэкIэ цIыфыр кIэтхэ, ар зиухыкIэ, къэкIожьын ылъэкIыщт, шIоигъоныгъэ зиIэм лъигъэкIотэн фит, — къыхигъэщыгъ Виталий Лебедевым.ЦIыф зэрымыс быбырэ авиацием зэзэгъыныгъэ шIыкIэм тетэу къулыкъу щызыхьыщтхэм Iашэ амыIыгъэу, окопхэм адэмысхэу пыим ебэныщтых, ятIонэрэ, ящэнэрэ линием тетхэу япшъэрылъхэр агъэцэкIэщтых. Шъугу къэдгъэкIыжьын, зэтыгъо ахъщэ тынэу Адыгеим щаратырэм зэрэхагъэхъуагъэр ыкIи ар сомэ миллиони 3-м зэрэнэсыгъэр, дзэкъулыкъушIэхэм яIэ фэгъэкIотэнхэр зэкIэ къызэрафэнэщтхэр.ПодразделениякIэу агъэпсырэм операторхэм ямызакъоу, водительхэр, техникхэр, инженерхэр ыкIи нэмыкI сэнэхьатхэр зиIэхэр аштэх. БПЛА-м иоператор ухъуным шэпхъэ гъэнэфагъэхэр пылъых. Илъэс 18-м къыщегъэжьагъэу 35-м нэс аныбжьын, «базовэ» шапхъэм диштэу инджылызыбзэр, компьютерыр ашIэнхэ фае. НэмыкI сэнэхьатхэмкIэ къулыкъур зыхьыщтхэм аныбжь илъэс 45-м шIокIынэу щытэп. Джащ фэдэу зэкIэми япсауныгъэ медицинэ комиссием ыуплъэкIущт, купэу «А-м» ыкIи «Б-м» адиштэнхэу щыт.ХэушъхьафыкIыгъэ дзэ операцием административнэ ыкIи уголовнэ пшъэдэкIыжь зыхьыгъэхэр ащэхэмэ, мы подразделением ахэр щегъэзыех, анахь дэгъухэр ары къыхихыхэрэр.Джащ фэдэу ыныбжьыкIэ къулыкъур зыхьынэу къызтефэхэрэр цIыф зэрымыс быбырэ пкъыгъохэм ядзэхэм ахэхьанхэу зэзэгъыныгъэм зыкIатхэхэкIэ ахъщэ тынхэр зэкIэ къаратых, «зэо зэпэуцужьым иветеран» зыфиIорэ цIэр къафагъэшъуашэ.— Илъэс зэкIэлъыкIохэм УФ-м зыкъэухъумэжьынымкIэ и Министерствэ республикэ дзэ комиссариатым къыфигъэуцурэ пшъэрылъыр щытхъу хэлъэу зэшIуехы, Къыблэ дзэ шъолъырымкIэ пэрытныгъэ зыубытхэрэм тащыщ. Тызыхэт илъэсым имэзищ зэфэтшIыгъ, зэзэгъыныгъэ шIыкIэм тетэу дзэ къулыкъур зыхьыщт нэбгырэ 200 фэдиз дгъэкIуагъэ. ЦIыф зэрымыс быбырэ пкъыгъохэм ядзэхэм къулыкъур ащызыхьынэу республикэмкIэ зэзэгъыныгъэ кIэтхагъэр нэбгырэ 40-м кIахьэ, мэлылъфэгъу мазэм — нэбгыри 10 фэдиз. Нахьыбэр запасым щыс цIыфых, — хигъэунэфыкIыгъ Виталий Лебедевым.Зэзэгъыныгъэ шIыкIэм тетэу къулыкъур зыхьынэу фаеу Мыекъуапэ щыпсэухэрэм дзэ комиссариатэу ащ дэтым зыщарагъэтхышъущт. УпчIэ зиIэхэм зыздагъэзэшъущтыр: къ. Мыекъуапэ, ур. Комсомольскэр, 217-рэ, я 119, 102-рэ кабинетхэр е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр: 117#4 ыкIи 8 (8772) 52-11-28.Джащ фэдэу шъузщыпсэурэ чIыпIэм щыIэ дзэ комиссариатым зыфэжъугъазэмэ, шъуищыкIагъэр ежъугъотылIэщт. Телеграм-каналэу «Адыгея — Служу Родине» зыфиIорэм игъэкIотыгъэ къэбарыр ижъугъотэщт.IЭШЪЫНЭ Сусан.