Зыныбжь имыкъугъэхэм хэбзэукъоныгъэхэр зэрамыхьанхэм, лъыплъэн зимыIэу къэнагъэхэм алъэныкъокIэ пэшIорыгъэшъ Iофтхьабзэхэр зэхэщэгъэнхэмкIэ къулыкъу зэфэшъхьафхэм язэпхыныгъэ фытегъэпсыхьэгъэ республикэ семинар мы мафэхэм Адыгеим щыкIуагъ.
Федеральнэ къэралыгъо бюджет учреждениеу «Институт изучения детства, семьи и воспитания» зыфиIорэмрэ сэнэхьат IэпэIэсэныгъэм зыщыхагъэхъорэ республикэ институтымрэ зэзэгъыныгъэ зэрэзэдашIыгъэм ишIуагъэкIэ ар зэхащагъ.Мыщ фэдэ Iофтхьабзэ апэрэу мыгъэ республикэм щыкIуагъ. Зыныбжь имыкъугъэхэм Iоф адэзышIэрэ гъэсэныгъэ учреждениехэм, къулыкъухэм ялIыкIохэм яшIэныгъэхэм ахагъэхъоныр, зэготхэу, купым хэтхэу Iоф зэдашIэным фэщэгъэнхэр ары зэхэщакIохэм пшъэрылъ шъхьаIэу яIагъэр.Къэзэрэугъоигъэхэм шIуфэс къарихыгъ АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Пэрэныкъо Сусаннэ.— Федеральнэ гупчэр тиIэпыIэгъоу мыщ фэдэ Iофтхьабзэ республикэм зэрэщызэхатщэрэм мэхьанэшхо иI. Ащ шIуагъэ къызэрихьыщтым тицыхьэ телъ, сыда пIомэ, непэ зы Iанэ зэдыпэсых ныбжьыкIэхэм шIэныгъэ, гъэсэныгъэ языгъэгъотыхэрэр, общественнэ организациехэр, бзэджэшIагъэхэм апэшIуекIогъэнымкIэ, ахэр гъэунэфыгъэнхэмкIэ къулыкъушIэхэр, зянэ-зятэ зышъхьарымытыжьхэм алъыплъэрэ къулыкъухэм ялIыкIохэр. Шъхьадж иIофшIэн зэрифэшъуашэу егъэцакIэ, ау щыкIагъэхэр щыIэх. Шъузэкъотэу шъуипшъэрылъхэр жъугъэцакIэмэ, нахь шIуагъэ къызэритыщтыр гъэнэфагъэ. Зыныбжь имыкъугъэхэм бзэджэшIагъэхэр зэрамыхьанхэм фытегъэпсыхьэгъэ пэшIорыгъэшъ Iофтхьабзэу зэхатщэхэрэм гъэрекIо зэхъокIыныгъэхэр афэтшIыгъ, сыда пIомэ, 2024-рэ илъэсым мыщ фэдэ хъугъэ-шIагъэу республикэм щагъэунэфыгъэр макIэп. Ащ ишIуагъэ къэкIуагъ, бзэджэшIэгъи 106-м тыкъикIи 78-м тыкъэсыгъ. Ащ тыкъыщыуцу хъущтэп. ГухэкI нахь мышIэми, общественнэ щынэгъончъэным епхыгъэ бзэджэшIагъэу зыныбжь имыкъухэрэм гъэрекIо 49-рэ зэрахьагъ. ТиIофшIэн хэдгъэхъон фае, бзэджэшIагъэ пэпчъ кIэлэцIыкIум ищыIэныгъэ ыпэкIэ зыфэдэщтыр епхыгъ, — къыIуагъ Пэрэныкъо Сусаннэ.Iофтхьабзэм хэлажьэхэрэм ямуниципалитетхэм загъэзэжьыкIэ, зэрагъэгъотыгъэ шIэныгъэхэр щагъэфедэнхэу нэужым ащ къариIуагъ. БзэджэшIагъэр зыгу къихьагъэхэр пэшIорыгъэшъэу гъэунэфыгъэнхэр, ар щыгъэзыегъэным пае зыныбжь имыкъугъэхэм Iоф адэшIэгъэныр пшъэрылъ шъхьаIэу зэрэщытыр, мы Iофыгъом узэготэу удэлэжьэн зэрэфаер министрэм иапэрэ гуадзэ джыри зэ къыхигъэщыгъ.Iофтхьабзэм къыдыхэлъытагъэу федеральнэ гупчэу «Профилактика» зыфиIорэм гъэсэныгъэ программэхэмкIэ иотдел ипащэ игуадзэу Эллина Елекоевар ыкIи мы гупчэм иэкспертэу Татьяна Власовар къэзэрэугъоигъэхэм гущыIэгъу къафэхъугъэх, докладхэр къашIыгъ.Семинарыр гъэшIэгъонэу ыкIи шIуагъэ къытэу кIуагъэ, ащ хэлэжьагъэхэр шIэныгъэу аIэкIэлъхэмкIэ зэдэгощагъэх, кейс зэфэшъхьафхэр къашIыгъ, зигъо къэсыгъэ гумэкIыгъохэм яхэкIыпIэхэр къагъотыгъэх.ДЕЛЭКЪО Анет.