«ШIэжьым имашIо» къэсыгъ

Народнэ фронтым илъэс къэс зэхищэрэ патриотическэ Iофтхьабзэу «ШIэжьым имашIу» зыфиIорэр ыублагъ.

Ащ къыдыхэлъытагъэу Урысыем ишъолъырхэм, Адыгеири ахэтэу, ащыпсэурэ ветеранхэу Хэгъэгу зэошхом хэлэжьагъэхэм ЕгъэшIэрэ машIом ибзый аIэкIагъахьэ. ТекIоныгъэм и Мафэ ипэгъокIэу а Iофтхьабзэр Кремлым идэпкъхэм ащаублагъ.— Мызыгъэгум «ШIэжьым имашIо» дунаим ишъолъыр 71-мэ ыкIи ихэгъэгу 14-мэ анагъэ­сыщт. Тятэхэм, тятэжъхэм ыкIи тятэжъ пIашъэхэм яшIэжь ар епхыгъэ къодыеу щытэп, а ма­фэм икIэрыкIэу тызэгоуцо ыкIи къыдгурэIо мамыр ошъогум ычIэгъ лIэуж пчъагъэ щыпсэуным пае ахэм хьазабэу зэпачыгъэр зыфэдизыр. А шIэжьыр тигъусэу шъолъырыкIэхэм — хэушъхьафыкIыгъэ дзэ операци­ем хэлэжьэрэ тикIалэхэм адэжь тыкIощт. Китаим «ШIэ­жьым има­шIо» Урысыемрэ Ки­таимрэ зэзыпхыхэрэ лъэмыджэу псы­хъоу Амур телъымкIэ Благовещенскэрэ Хэйхэрэ аIэкIэдгъэ­хьащт. Лъэмыджым пIэлъэ кIы­хьэм къыкIоцI коронавирусым ыпкъ къикIэу Iоф ышIагъэп, джы тикъыблэ гъунэгъухэм зэпхыныгъэу адытиIэр зыпкъ итэгъэу­цожьы, Японием итехакIохэм Китаир къызэра­IэкIэтхыжьыгъэр тыгу къэтэгъэ­кIыжьы», — къыIуагъ Народнэ фронтым игъэцэкIэкIо комитет ипащэу Михаил Кузнецовым.

Народнэ фронтым илIыкIохэр, «Путиным икомандэ» хэтхэр, общественнэ IофышIэшхохэр, дзэ корреспондентхэр, артист­хэр ыкIи спортсменхэр Амы­шIэрэ ДзэкIолIым и Къэхалъэ дэжь къыщызэрэугъоигъэх. Егъэ­шIэрэ машIом ибзыйхэр остыгъэ гъэнэфагъэхэм а чIыпIэм щарагъэкIугъэх. Къалэу Москва и Дзэ комендатурэрэ МОСГАЗ-мрэ Iофтхьабзэм изэ­хэщэнкIэ яшIуагъэ къагъэкIуагъ, ахэм яIофышIэхэм щынэгъончъэу машIор зещэгъэнымкIэ зишIуагъэ къэкIощт Iэмэ-псымэхэр къыхахыгъэх ыкIи къагъэ­хьазырыгъэх.Москва ращи, «ШIэжьым има­шIо» къэлэ-лIыхъужъхэм, дзэ щытхъум ыкIи IофшIэным якъалэхэм алъэныкъокIэ ращэжьагъ. «Урысыем имэшIоку гъогухэр» зыфиIорэр хэлажьэзэ ар аIэкIагъэхьащт. МэшIобзыйхэр Санкт-Петербург, Минскэ, Тулэ, Смоленскэ, Нижний Новгород, Мурманскэ, Ново­российскэ, Волгоград, Петрозаводскэ ыкIи нэмыкI къалэхэм анагъэсыщтых. ХэушъхьафыкIыгъэ мэшIоку гъогукIэ Къырым машIор ащэщт.Авиакомпаниеу «Аэрофлотыр» апэрэ илъэсэп Iофтхьа­бзэм изэшIохынкIэ Народнэ фронтым IэпыIэгъу зыфэхъурэр, Урысыем ишъолъырхэм ыкIи дунаим ихэгъэгухэм къу­хьэлъатэхэмкIэ ыпкIэ хэмылъэу ыкIи Iэрыфэгъоу машIом ибзый­хэр алъегъэIэсых.«ШIэжьым имашIо» Адыгеими къэсыгъ. Сигуапэ тиветеранхэм тIэкIэ ар зэряттын тлъэкIыщтыр. Хэгъэгу зэошхом илъэхъан я Къэралыгъо зышъхьамысыжьэу къэзыухъумагъэхэм гущыIэ къо­дыеу щымытэу, мыщ фэдэ, псэ зыпыт Iофтхьабзэхэр адызехьэгъэнхэр къалэжьыгъ», — къы­Iуагъ Народнэ фронтым ишъо­лъыр гъэцэкIэкIо комитетэу Адыгэ Республикэм щыIэм ипащэу Юрий Гороховым.Россотрудничествэм иIэпыIэгъу хэлъэу IэкIыб къэралхэми мыщ фэдэ Iофтхьабзэ ащызэрахьэ. Народнэ фронтым илIыкIохэм, общественнэ IофышIэшхохэм ыкIи артистхэм машIор Абхъазым, Армением, Кипр, Киргизием, Китаим, Монголием, Узбекистан, Танзанием, Индием ыкIи Къыблэ Осетием афыращэжьагъ. ГуфакIохэм яIэпыIэгъу хэлъэу машIом ибзыйхэр Казахстан, Францием, Швейцарием, Германием анагъэсыщтых.IэкIыб къэралхэми шIэжь Iоф­­тхьабзэхэр ащэкIох, ахэм къахеубытэх саугъэтхэм къэгъа­гъэхэр акIэрылъхьэгъэнхэр, ветеранхэм зэIукIэгъухэр адэшIыгъэнхэр, ЕгъэшIэрэ машIом ибзыйхэр зыщыблэрэ остыгъэ­хэр музейхэм, гъэсэныгъэ зыщарагъэгъотырэ учреждениехэм, общественнэ организациехэм ыкIи чылысхэм аIэкIэгъэхьэ­гъэнхэр.