Зэошхом инэкIубгъо гуимыкIыжьхэр

ТекIоныгъэм ия 81-рэ илъэс тыдэкIи тихэгъэгушхо щыхагъэунэфыкIы. Ащ къыдыхэлъытагъэу АР-м и Лъэпкъ тхылъеджапIэ мэфэкI Iофтхьа­бзэу «Войны священные страницы» ыIоу щыкIуагъ.

ЗэхэщакIохэм гухэлъэу яIагъэр — лIэужыкIэм патриотическэ пIуныгъэ хэлъхьэгъэныр, цIыф лъэпкъхэм азыфагу илъ ма­мырныгъэр ыкIи зэгурыIоныгъэр гъэпытэгъэныр, Хэгъэгу зэ­ошхом хэтыгъэ тидзэкIолIхэм ялIыхъужъныгъэ гъэлъэпIэгъэныр ыкIи зэгъэшIэгъэныр, а зэкIэмкIэ шIэжьыр ухъумэгъэныр, тиныбжьыкIэхэм тихэгъэгу итарихъ уасэ фашIыным фы­тегъэпсыхьэгъэнхэр.МэфэкI Iофтхьабзэм хэлэ­жьагъ ыкIи блэкIыгъэ Хэгъэгу зэошхом фэгъэхьыгъэ гущыIэ игъэкIотыгъэ къыщишIыгъ тарихъ шIэныгъэхэмкIэ кандида­тэу, доцентэу, АКъУ-м тари­хъымкIэ ифакультет икIэлэегъа­джэу, ветеранхэм якъэлэ Совет итхьаматэ игуадзэу Нэджыкъо Схьатбый. А зэо мафэхэм мэхьанэшхо зиIэгъэ лозунгэу «Родина-мать зовет!», ти­чIы­пIэгъу лIыхъужъэу Андырхъое Хъусен «Русские не сдаются!» зэриIуагъэр, хэгъэгум икомсомольцэ ныбжьыкIэхэр зыгу-зыкIуачIэу фашизмэм зэ­рэпэшIуекIуагъэхэр, партизан отрядхэм зэфэдэкIэ яIофшIэ­кIагъэр, ахэм кIэлэеджэкIо зи­хэ­хъогъухэри зэрахэтыгъэхэр С. А. Нэджыкъом игущыIэ щы­кIигъэтхъыгъ. Нэфэгъэ-шъып­къа­гъэ хэлъэу, щысэхэр къы­хьы­хэзэ, заом иапэрэ мафэ къыщегъэжьагъэу ТекIоныгъэ­шхом и Мафэ нэс, бгъэшIагъо икъоу ащ къыриIотыкIыгъ. Щэч хэлъэп мыщ фэдэ шIэжь сыхьатхэм тиблэкIыгъэ лIэужыкIэм егъэшIэгъэнымкIэ осэшхо зэряIэр.

ТекIоныгъэм и Мафэ фэгъэ­хьыгъэ мэфэкIыр тхылъеджапIэм абонементымкIэ иотдел иIофышIэхэм къагъэхьазырыгъ. Ар зэрищагъ дзэ шъуашэр щыгъэу мы отделым ипащэу ШъхьэкIумыдэ Асиет. Хэгъэгу зэошхом фэгъэхьыгъэ усэхэр ыкIи орэдхэр Iофтхьабзэм щы­Iугъэх.Лъэпкъ тхылъеджапIэм иIофы­шIэу ХьакIэмыз Симэ гум хапкIэу усэм къеджагъ. Зэ­ошхом иапэрэ мафэхэм аусыгъэ орэ­дэу «Священная война», нэмыкI­хэри щыIугъэх. УсэкIо цIэ­ры­Iохэу К. Симоновым, Р. Рождественскэм, Чингиз Айтматовым яусэхэм къяджагъэх.ЛIыхъужъ-поэтическэ сыхьатым Советскэ Союзым и ЛIы­хъужъхэм афэгъэхьыгъэ ви­деолъэтегъэуцор къыщагъэлъэ­гъуагъ ыкIи тхылъ къэгъэлъэ­гъон инэу «Войны священные страницы» къыщагъэхьазырыгъ.МэфэкI анахь лъапIэу ТекIоныгъэм и Мафэ фэгъэхьыгъэ зэхахьэм къырагъэблэгъагъэх Росгвардием хэтхэр, юнармейцэхэр, тхылъеджэхэр, нэмыкI­хэри.Iофтхьабзэр IэпкIэ-лъапкIэу, гум къинэжьэу гъэпсыгъагъэ: уи ЧIыгу, уи Хэгъэгу, уи ­Лъэпкъ апеIэн гори зэрэщымыIэр, пстэумэ анахь лъапIэу мамырныгъэр зэрэкIочIэ лъэшыр зэ­хыуигъэшIагъ.Мамырыкъо Нуриет.