МКъТУ
Программэу «Адыгеим и ЛIыхъужъхэр» зыфиIоу тишъолъыр щыпхыращырэм хэлэжьэрэ хэушъхьафыкIыгъэ дзэ операцием иветеранэу хэлажьэхэрэм республикэм идинлэжьхэм зэIукIэгъу адыряIагъ.
Ар Мыекъопэ къэралыгъо технологическэ университетым муниципальнэ къулыкъушIэхэм яIэпэIэсэныгъэ хэгъэхъогъэнымкIэ ишъолъыр Гупчэ щыкIуагъ.Iофтхьабзэм икIэщэкIуагъ АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт.КъыткIэхъухьэрэ лIэужхэр патриотизмэр ыкIи лъэпкъ зэфэдэныгъэр ахэлъэу пIугъэнхэм, урысые цивилизацием ылъапсэ зыгъэпытэрэ дин-гушъхьэбаиныгъэхэр къызэтегъэнэгъэн, зыкIыныгъэр, шъыпкъагъэр, лIыхъужъныгъэр алъытэным фэгъэсэгъэнхэм афэгъэхьыгъэу къэгущыIагъэх динлэжьхэу Андрей Брагиныр, Георгий Нехаевыр, Iимамэу Хъущт Азэмат.ШIэныгъэхэмкIэ Урысые Академием тыгъэкъокIыпIэ къэралхэм язэгъэшIэнкIэ иинститут инаучнэ IофышIэу, тарихъ шIэныгъэхэмкIэ кандидатэу Нэшъулъэщэ Наимэ Адыгеим ислъам диным гъогоу къыщикIугъэр, зэхъокIыныгъэу фэхъугъэхэр къыIотагъ.ЗэIукIэгъур зэдэгущыIэгъу шIыкIэм тетэу рекIокIыгъ, шъхьадж зыгъэгумэкIыщтыгъэ упчIэр шъхьэихыгъэу къыIон амал иIагъ, джэуапхэри агъотыжьыгъ.Мы Iофтхьабзэр программэм хэлажьэхэрэм яегъэджэн иящэнэрэ едзыгъо къыдыхэлъытэгъагъ. А едзыгъор аухыгъ, муниципальнэ ыкIи шъолъыр гъэIорышIэныр зэрагъэшIагъ, джы лIыхъужъхэр IофшIапIэхэм ащыIэхэу яIэпэIэсэныгъэ хагъахъо. Ащ ыуж яплIэнэрэ едзыгъор падзэжьыщт ыкIи чIэтIупщыгъо аттестационнэ IофшIэным зыфагъэхьазырыщт.IЭШЪЫНЭ Сусан.