Лъэпкъыр щызыгъаIэрэр ыбз

Ар къагурыIоу гуманитар ушэтынхэмкIэ Адыгэ республикэ институтым ишIэныгъэлэжьхэм адыгабзэр къызэтегъэнэгъэным ыкIи къыткIэхъухьэрэ ныбжьыкIэхэм ягъэшIэгъэным телъытэгъэ проектыр алэжьы, жъи кIи ныдэлъфыбзэр аIулъхьэжьыгъэным Iофышхо дашIэ.

Мэлылъфэгъум ыкIэм А. С. Пушкиным и Унэ — Лъэпкъ драмтеатрэм Iоф­тхьабзэу щыкIуагъэм Адыгеим ирайонхэм, къалэхэм къарыкIыгъэ кIэлэеджэкIо куп 13 хэлэжьагъ, зыкъагъэлъэгъуагъ, бгъэшIагъоу адыгабзэр агъэIорышIагъ. Щэч хэлъэп кIэлэцIыкIу театрэхэм яфестиваль-зэнэкъокъу хэлэжьэгъэ кIэлэеджэкIо купхэм ухьазырыныгъэ дэгъу зэряIагъэм, ахэм кIэлэегъаджэхэр, ны-тыхэр зэрадэлэжьагъэхэм, ашъхьэкIи яныдэлъфыбзэкIэ зыкъашIын-зыкъагъэлъэгъоным зэрэфэхьазырыгъэхэм.

Фестивалым иосэшI куп хэтыгъэх АР-м гъэсэныгъэмрэ шIэныгъэмрэкIэ и Министерствэ иIофышIэу Мамый Мариет, гуманитар ушэтынхэмкIэ институтым ипащэ шIэныгъэмкIэ игуадзэу, филологие шIэныгъэхэмкIэ докторэу Биданэкъо Марзият, Къэралыгъо телерадиокомпанием ипащэу Ацумыжъ Адам, институтым иIофышIэу Сихъу СултIан, нэмыкIхэри.Такъикъ 20 — 25-м къыкIоцI купкI зиIэ къэгъэлъэгъон зэфэшъхьафхэр ти­республикэ иеджакIохэм къашIыгъэх. Ахэм ахэтыгъэх Мыекъуапэ иеджапIэхэм ащыщхэр, Адыгэ республикэ гимназиер. Адыгеим ирайон пэпчъ къарыкIыгъэ купхэм бгъэшIагъоу, артист хъугъахэхэу, дэгъоу, купкI иIэу зыкъашIыгъ. Анахь унаIэ зытеозыгъадзэщтыгъэр куп пэпчъ сценкэу къышIырэм (зыр зым къыкIимыIотыкIыжьэу) лъэпкъ нэшанэр къахэщэу, ежь еджакIохэри сценэм екIухэу, адыгэ шъуашэр ащыгъэу, пшъашъи кIали чынэм фэдэу къашъохэу, яадыгабзэ IупкIэу, лъэшэу, тишэн-хабзэхэр сцен­кэхэм — пшысэхэм, рассказхэм ащыкIагъэтхъэу, зыр зым нахь дэгъужьэу, гъэшIэгъонэу зыкъызэрашIыгъэр ары.

ЗыкъэшIын пэпчъ нэбгыри 7 — 10 фэдиз хэлэжьагъ, а зэкIэ зызэхэбгъэ­хъожькIэ, еджэкIо нэбгыри 100-м нахьыбэ хъущт, арышъ, адыгабзэм икъэIэтыжьын-ягъэшIэн епхыгъэ проектыр шIуагъэ хэлъэу зэрэлажьэрэр къэошIэ.ТапэкIи тыбзэ, тихабзэ ядэхэгъэ-лъэ­пIагъэ къэIэтыгъэным ны-тыхэри, кIэлэегъаджэхэри, еджакIохэри шIыкIэ амал зэфэшъхьафхэмкIэ зэдеIэжьхэмэ, лъэпсэ пытэ яIэ хъужьыным тыщэгугъы. Адыгабзэм изэгъэшIэн-хэгъэхъон лъэшэу зынаIэ тет гуманитар ушэтынхэмкIэ Адыгэ республикэ институтми, кIэлэегъа­джэхэу еджакIохэм адэлажьэхэрэми, унагъохэу ахэр зыщапIухэрэми язэдеIэжь-зэгурыIоныгъ мы Iоф инэу ещэжьагъэр лъызыгъэкIотэщтыр. Апэрэу адыгабзэкIэ театрэ фестиваль-зэнэ­къокъур тиреспубликэ щыкIуагъ, фэныкъогъэнчъэуи куп пэпчъ зыкъишIыгъ.Фестивалыр къызэIуихыгъ Теуцожь районымкIэ къуаджэу Гъобэкъуае къикIыгъэ еджэкIо купым. Ахэм къакIэ­лъыкIуагъэх Мыекъопэ еджапIэу N 2-р, Нэшъукъуае къикIыгъэхэр, Адыгэ рес­пуб­ликэ гимназиер, Хьатыгъужъыкъое гурыт еджапIэр, Джамбэчые ыкIи ХьакIэмзые еджапIэхэр, нэмыкIхэри. Анахьэу бгъэшIагъо икъугъэр къэгъэ­лъэгъон пэпчъ IупкIэгъэ ин хэлъэу къы­раIотыкIыгъэу, къагъэлъэгъуагъэр, зы гущыIэухыгъэ зэфэхьысыжь икъукIэ зэрэзэпхыгъагъэхэр ары. ГущыIэм пае, даIорэр цIыфы мэхъу; жъы уимыIэу кIэ уиIэщтэп; мамырныгъэр дышъэм пеIэ; гулъытэ зиIэм, акъыл иIэщт, нэмыкI­- хэри.Мэфэ реным кIогъэ зыкъэшIын-къэгъэлъэгъонхэр кIэкIэу, IупкIэу артист цIыкIухэм дэимрэ дэгъумрэ, шIумрэ емрэ зэхыуагъэшIыкIэу гъэпсыгъагъэх, ауми, куп 13-м щыщэу дэгъумэ анахь дэгъужьхэр къэнэфагъэх:А I-рэ чIыпIэр фагъэшъошагъ Адыгэ республикэ гимназием итеатрэ куп (шIухьафтынэу сомэ мини 100 аратыгъ).Я II-рэ хъугъэх Теуцожь районымкIэ къуаджэу Нэшъукъуае къикIыгъэхэр (мин 80).Я III-рэ чIыпIэр ыубытыгъ Хьатыгъужъыкъое гурыт еджапIэу N 6-м иеджэкIо куп (мин 60).Адрэ купи 10-у фестивалым хэлэжьагъэхэми диплом ыкIи рэзэныгъэ тхылъхэр, волейбол Iэгуаохэр аратыгъэх.Мамырыкъо Нуриет.