IэрышI акъылыр
Сабый зэрыс унагъохэм IэпыIэгъу ягъэгъотыгъэнымкIэ федеральнэ гупчэм къытырэ амалхэр къызфагъэфедэх ыкIи «Единэ Россием» ипартийнэ проектхэм къыдалъытэрэ Iофтхьабзэхэр Адыгеим игъэкIотыгъэу щагъэцакIэх.
Унагъохэм зэрадеIэхэрэм хэгъэхъогъэным пае шъолъыр фэгъэкIотэныгъэхэри ахъщэ тынхэри ахэм гъусэ афашIы. ГущыIэм пае, сабыибэ зэрыс унагъохэм ыпкIэ хэмылъэу Iэзэгъу уцхэр араты ыкIи общественнэ транспортыр агъэфедэ. Джащ фэдэу чIыгу Iахьхэр аратых, псэупIэ-коммунальнэ фэIо-фашIэхэм ауасэкIи фэгъэкIотэныгъэхэр афашIых. Социальнэ зэзэгъыныгъэм ишIуагъэкIэ IэпыIэгъур хэхыгъэу анэсы. 2025-рэ илъэсым республикэм социальнэ зэзэгъыныгъэ 1047-мэ ащыкIэтхэжьыгъэх. Ащ щыщэу зэзэгъыныгъэ 333-р сабыибэ зэрыс унагъохэм адашIыгъ.АмалыкIэхэр ахэм апае къыдалъытагъэх — сабыибэ зэрыс унагъохэм якIэлэцIыкIухэм ыпкIэ хэмылъэу ясэнэхьат хагъэхъон алъэкIыщт, музейхэм, къэгъэлъэгъонхэм апкIэ амытэу ачIэхьашъущтых. ИлъэсыкIэ еджэгъум ехъулIэу еджэкIо ыкIи спорт шъуашэхэр къащэфынхэм пае илъэс къэс ахъщэ тынхэр аратых. Ныхэм шъолъырым щаратырэр сомэ мини 100-м нэсыгъ. Джащ фэдэу 2025-рэ илъэсым ищылэ мазэ и 1-м къыщыублагъэу сабыибэ зэрыс унэгъо ныбжьыкIэхэм сабыйхэр джыри къафэхъу хъумэ, зэтыгъо ахъщэ тынэу сомэ мин 300 араты. Сабыибэ зиIэ унэгъо ныбжьыкIэхэу псэупIэм изэгъэгъотын пае аштэгъэ чIыфэр зытыжьыхэрэм аратырэ ахъщэ тыными хагъэхъуагъ — ари IэпыIэгъу дэгъухэм ащыщ.Ны хъущт ныбжьыкIэу еджэхэу зэрэлъэрымыхьхэм къыхэкIэу IэзапIэм зызщарагъэтхыкIэ, сомэ мини 100 араты. Зыныбжь илъэс 26-м нэмысыгъэхэу апэрэ ыкIи ятIонэрэ сабыйхэр къызфэхъугъэ ныхэм зэтыгъоу сомэ мин 25-рэ афатIупщы. Сабый къызфэхъущт ны-тыхэм IэпыIэгъу афэхъурэ къулыкъу хэушъхьафыкIыгъэхэр бзылъфыгъэ IэзапIэхэм къащызэIуахых. Зигъот мэкIэ унагъохэм ящыкIэгъэщт псэуалъэхэр ыпкIэ хэмылъэу бэджэндэу зыщаштэшъущт къулыкъоу «Пункт проката» зыфиIорэр къызэIуахыгъ. Сабыибэ зэрыс унэгъо ныбжьыкIэхэм япсэупIэ амалхэм ахагъэхъон алъэкIыным пае илъэс къэс ахъщэ IэпыIэгъу араты.Мэхьанэ зиIэ лъэбэкъухэм ащыщ зэхэт социальнэ политикэр гъэпсыгъэ зэрэхъугъэр, сабый зэрыс унагъохэм IэпыIэгъу арагъэкIыным, IофшIэн ягъэгъотыгъэным, сатыушIхэр къызэрэхагъэлажьэхэрэр. ХэушъхьафыкIыгъэ дзэ операцием хэлажьэхэрэм яунагъохэм ащыщхэм IэпыIэгъу афэхъунхэр ыкIи зыныбжь имыкъугъэ сабыйхэр зиIэ ны-тыхэм IофшIапIэ ягъэгъотыгъэныр лъэныкъо хэхыгъэу Iоф зыдашIэхэрэм ащыщ. ГъэрекIо нэбгырэ 247-мэ IофшIэпIэ чIыпIэ арагъэгъотыгъ, ахэм ащыщэу 171-р бзылъфыгъэх. Сабыибэ зиIэ ным фагъэшъошэрэ шIухьафтыныр шъолъырым щыгъэнэфагъэу бзылъфыгъэ нэбгырипшI фэдизмэ гъэ къэс араты. «Илъэсым иунагъу» зыфиIорэ Урысые зэнэкъокъум Адыгеим щыщ унагъохэм мызэу, мытIоу текIоныгъэ къыщыдахыгъ.АР-м и ЛIышъхьэу, партиеу «Единэ Россием» ишъолъыр къутамэ и Секретарэу КъумпIыл Мурат ащ фэдэ IофшIэн зэхэтым шIогъэшхо къызэритырэр хигъэунэфыкIыгъ. Сабыибэ зиIэ унагъохэм япчъагъэ хэхъо. Непэ ахэм афэдэ унэгъо мини 9,6-у республикэм щыпсэухэрэм сабый мин 31,5-рэ ащапIу.— Унэгъо пытэ Iужъухэм сыдигъокIи уасэ афэтэшIы. Ным имэхьанэ Iэтыгъэныр, унэгъо шэн-хабзэхэр гъэпытэгъэнхэр мэхьанэшхо зэттырэ лъэныкъохэм ащыщ. ЦIыф пчъагъэм хэхъоным ыкIи унагъохэм щыIэкIэшIу яIэным афэгъэхьыгъэ унашъоу Президентым къышIыхэрэр тапэкIи дгъэцэкIэщтых. Шъолъырым исоциальнэ политикэ ипшъэрылъ шъхьаIэу ахэр къэнэжьых. Лъэпкъ проектэу «Унагъор» зыфиIорэр ыкIи «Единэ Россием» ипрограммэхэр ащкIэ тиIэубытыпIэх. Республикэм щыпсэухэрэм щыIэкIэшIу яIэным амалэу щыIэхэр етхьылIэщтых, — къыIуагъ АР-м и ЛIышъхьэ.Тэу Замир.