Кощхьэблэ район администрациер
Мазэ хъугъэу «клещевой вирусный энцефалит» зыфаIорэр ыкIи нэмыкI узхэр зезыхьэрэ бамыкIхэм якъыхэгъэщын АР-м исанитар къулыкъу шъхьаIэ дэлажьэ. Ащ къыдыхэлъытагъэу тхьамафэ къэс уплъэкIунхэр зэхещэх.
Роспотребнадзорым и ГъэIорышIапIэу АР-м щыIэм аужырэ пчъагъэу къытыгъэхэмкIэ, мэлылъфэгъум и 29-м ехъулIэу бамыкIхэр къызэцэкъэгъэ нэбгырэ 96-рэ агъэунэфыгъ. Ахэм ащыщэу 49-м аныбжь илъэс 14-м нэсы. БлэкIыгъэ илъэсым мыщ фэдэ иуахътэ егъэпшагъэмэ, а пчъагъэр 15-кIэ нахьыб. БамыкI къяцэкъагъэу хъугъэ-шIагъэхэр республикэм ирайон пстэуми ащагъэунэфыгъ, ау нахьыбэр зыщыхъугъэр Адыгеим икъэлэ шъхьаIэрэ Мыекъопэ районымрэ.БамыкIхэм ыкIи ахэм зэрахьэрэ уз зэфэшъхьафхэм цIыфхэр ащыухъумэгъэнхэм фэшI хьацIэ-пIацIэр зыгъэкIодырэ уцыр чIыналъэхэм атыраутхэныр республикэм щырагъэжьагъ. Къэблэгъэрэ гъэмэфэ кIэлэцIыкIу зыгъэпсэфыгъом ехъулIэу чIыгу гектар 36-мэ ар арахьылIэнэу рахъухьагъ.Джащ фэдэу, республикэм ирайонхэм ямэкъумэщ хъызмэтшIапIэхэми, хъупIэхэмкIэ агъэфедэрэ чIыгухэми бамыкIыр ащагъэкIоды. ГущыIэм пае Кощхьэблэ районым авиацием иамалкIэ чIыгу гектар 1408-мэ уцыр атыраутхагъ. АщкIэ «Энтомозан-С» зыфиIорэр агъэфедагъ. Специалистхэм къызэраIуагъэмкIэ, ащ ишIогъэшхо къэкIо ыкIи пIэлъэ кIыхьэм Iоф ешIэ. Мыщ фэдэ екIолIакIэм ишIуагъэкIэ хьацIэ-пIацIэхэм япчъагъэ анахьэу зыщыхэхъорэ уахътэм агъэмэкIэн алъэкIы ыкIи ахэм зэрахьэрэ узхэм былымхэр ащаухъумэх.Ау ащ дакIоу цIыфхэри сакъынхэу санитар къулыкъу шъхьаIэр къыфэджэ, сыда пIомэ, чIыопсым жъугъэу зызщагъэпсэфыщт лъэхъаныр къэблагъэ. Ащ пае хэушъхьафыкIыгъэу зыпфэпэн фае: бамыкIыр къэнэфэнэу щыгъын фыжьышъохэр зыщыплъэнхэ ыкIи ащ ущызыухъумэщт уцхэр зэпхьылIэнхэ фае.Анцокъо Ирин.