Шъолъыр чемпионатэу «Абилимпикс»
Сэкъатныгъэ зиIэу зиамалхэмкIэ ялэгъухэм акIэмыхьэхэрэм апае зэхащэрэ зэнэкъокъоу «Абилимпикс» зыфиIорэр мы мафэхэм Адыгеим щыкIуагъ. Ар мыгъэ я 10-у зэхащагъ.
Платформэу «Урысыер — амалышIухэр зыIэкIэлъ къэралыгъу» зыфиIорэм къыдыхэлъытагъэу ар зэхащэ. Хабзэ зэрэхъугъэу, ар Мыекъопэ индустриальнэ техникумым щыкIуагъ, зэкIэмкIи нэбгыри 136-рэ хэлэжьагъ.МэфэкI шIыкIэм тетэу олимпиадэр къызэIуахыгъ. Хэбзэ къулыкъухэм ялIыкIохэу гущыIэ зэратыгъэхэм мы Iофтхьабзэм мэхьанэ ин зэриIэр къыхагъэщыгъ. Мыщ хэлажьэхэрэм сэнаущыгъэ ин зэрахэлъыр ыкIи илъэс къэс ахэм гъэхъэгъэшIухэр зэрашIыхэрэр, Москва щыкIогъэ Лъэпкъ чемпионатым Адыгеим икIыгъэхэм зэрифэшъуашэу зыкъызэрэщагъэлъагъорэр къаIуагъ.
«Абилимпиксым» ишъолъыр гупчэ ипащэу Быжь Заирэ къызэриIуагъэмкIэ, лъэныкъо 19-кIэ зэнэкъокъугъэх. ДэнымкIэ, унэ гъэлэнымкIэ, псэолъэшIынымкIэ, художественнэ дизайнымкIэ, текстым Iоф дэшIэгъэнымкIэ, нэмыкIхэмкIи зэнэкъокъум хэлажьэхэрэм зыкъагъэлъэгъуагъ. Мыщ кIэлэеджакIохэри, студентхэри, нахьыжъхэри хэлэжьэнхэ амал яIагъ.Мэфитфым къыкIоцI зэнэкъокъугъэх, анахь дэгъоу зыкъэзыгъэлъэгъуагъэу агъэнэфагъэр нэбгырэ 69-рэ. Ахэм щытхъу тхылъхэр ыкIи шIухьафтынхэр аратыжьыгъэх. Апэрэ чIыпIэ къэзыхьыгъэхэм Къыблэ ыкIи Темыр-Кавказ федеральнэ шъолъырхэм закъыщагъэлъэгъощт ыкIи ащ ащытекIохэрэр Москва щыкIощт чемпионатым хэлэжьэщтых. ГъэрекIо Адыгеим икIыгъэ нэбгыритфымэ аужырэ уцугъом зыщаушэтыгъ ыкIи гъэхъэгъэшIухэр щашIыгъэх, зым дышъэ медаль, щымэ хагъэунэфыкIырэ чIыпIэхэр къахьыгъ.Хабзэ зэрэхъугъэу, хэушъхьафыкIыгъэ дзэ операцием иветеранхэри мы зэнэкъокъум хэлажьэх. Мыгъэ Эдуард Бараевым унэ гъэлэн IофымкIэ зыкъыгъэлъэгъуагъ ыкIи текIоныгъэ къыдихыгъ. Игорь Гилевыр псэолъэшIынымкIэ ыкIи штукатурнэ IофымкIэ ящэнэрэ хъугъэ.— ЛъэныкъуакIэхэм сызэрафэхьазырыр сыушэтыным пае мы зэнэкъокъум сыхэлажьэ. СиныбжьыкIэгъум гъэлэн Iофым сыфэщагъэу щытыгъэти мы лъэныкъомкIэ зыкъэзгъэлъэгъоныр къин къысщыхъугъэп. ЫпэкIэ улъыкIотэным пае мыщ фэдэ зэнэкъокъухэм уахэлэжьэным мэхьанэшхо иI. ДжырэкIэ сварщик сэнэхьатыр зэсэгъэгъоты. ГъэрекIо мы зэнэкъокъум ящэнэрэ чIыпIэ къыщыдэсхыгъ, мыгъэ апэрэм сызэрэнэсыгъэм сырэгушхо. Джы хэушъхьафыкIыгъэ дзэ операцием иветеранхэр зыхэлэжьэщтхэ зэнэкъокъоу «Абилимпикс-2026-рэ» зыфиIоу Казань щыкIощтым зыфэсэгъэхьазыры, — еIо Эдуард Бараевым.ДЕЛЭКЪО Анет.