Адыгэ Республикэм хэгъэгу кIоцI IофхэмкIэ и Министерствэ Красногвардейскэ районымкIэ иотдел кощын IофхэмкIэ икъутамэ ипэщагъэу Виталий Куцай иуголовнэ IофкIэ Шэуджэн район хьыкумым кIэух унашъор ыштагъ. Урысыем и Уголовнэ кодекс ия 285-рэ статья иа 1-рэ Iахь зигугъу къышIырэ бзэджэшIагъэ ащ зэрихьагъэу агъэунэфыгъ.
Нафэ къызэрэхъугъэмкIэ, В. В. Куцай зыщыщыр къэзыушыхьатырэ тхылъ нэпцI IэкIыб къэралыгъом игражданин ритыгъ. Урысыем административнэ хэбзэукъоныгъэхэмкIэ и Кодекс ия 20.1-рэ статья ия 2-рэ Iахь зигугъу къышIырэ административнэ хэбзэукъоныгъэ ышIыгъэкIэ IэкIыб къэралыгъом игражданин зэрагъэмысэрэм фэгъэхьыгъэ унашъор хьыкумым ыштэным ар лъапсэ фэхъугъ.Ау административнэ пщыныжь зытыралъхьагъэр Украинэм ицIыфэу, бзэджэшIэгъэ хьылъэ зэрэзэрихьагъэм пае федеральнэ къулыкъур ащ лъыхъоу къычIэкIыгъ.Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ къыIэкIигъэхьэгъэ материалхэр IэубытыпIэ къызыфишIыхэзэ, уголовнэ Iофыр къэзыIэтыгъэр ыкIи зэхэзыфыгъэр Урысые Федерацием и Следственнэ комитет Адыгэ РеспубликэмкIэ иследственнэ гъэIорышIапI ары.Урысыем и Уголовнэ кодекс ия 285-рэ статья иа 1-рэ Iахь диштэу Шэуджэн район хьыкумым сомэ 75000-рэ хъурэ тазыр В. В. Куцай тырилъхьагъ, илъэси 3 къэралыгъо, муниципальнэ учреждениехэм хабзэм илIыкIо пшъэрылъхэр ащигъэцэкIэн фимытэу ыгъэнэфагъ.Адыгэ Республикэм и Апшъэрэ хьыкум апелляционнэ тхьаусыхэ тхылъым зыхаплъэм, Шэуджэн район хьыкумым иунашъо дыригъэштагъ ыкIи ащ хэбзэ кIуачIэ иIэ хъугъэ.