ХьакIэщым игъэцэкIэжьын аухы

Адыгеим и ЛIышъхьэу КъумпIыл Мурат Мыекъуапэ дэт хьакIэщэу «Адыгеим» игъэцэкIэжьын зэрэкIорэм зыщигъэгъо­загъ. Ащ игъусагъэх федеральнэ инспектор шъхьаIэу Сергей Дрокинымрэ Мыекъуапэ имэрэу Геннадий Митрофановымрэ.

Инвесторэу Виктор Михайловскэр ары проектыр зыгъэцакIэрэр. Я XX-рэ лIэшIэгъум ия 60-рэ илъэсхэм агъэпсы­гъэгъэ хьакIэщыр зыпкъ ри­гъэуцожьынэу ащ пшъэрылъ фашIыгъ.«ПроектымкIэ зэдедгъаштэ зэхъум, унэми, ащ къыпэIулъ чIыпIэми язытет дэхэн, къалэм игупчэ иархитектурэ ахэр ди­штэнхэ зэрэфаем тынаIэ тедгъэтыгъ. БлэкIыгъэ лIэшIэгъум ыгузэгухэм адэжь ашIыгъэгъэ псэуалъэм тет тхыпхъэхэр зыпкъ рагъэуцожьынхэ алъэ­кIыщт-амылъэкIыщтымкIи инвесторым тыдэгущыIагъ», — къы­Iуагъ КъумпIыл Мурат.

Республикэм и ЛIышъхьэ пшъэрылъ зэрэфишIыгъэм тетэу Мыекъуапэ иадминистрацие инвестиционнэ проектымкIэ фэIо-фашIэхэр зы чIыпIэ щы­гъэцэкIэгъэнхэм ынаIэ тыри­гъэтыгъ. ГъэцэкIэжьын Iоф­шIэнхэр илъэси 5-м ехъурэ зэ­шIуа­хыгъэх, непэ ахэр ыкIэм фэкIох. Унэ гупэр агъэкIэ­жьыгъ, тарихъ теплъэу ащ иIагъэр, дэпкъым тешIыхьэгъэгъэ тхыпхъэхэр къагъэнэжьыгъэх. Хьа­кIэщым иихьапIэ, иномерхэм ядэпкъхэм адыгэ шэн-хабзэхэр къизыIотыкIырэ сурэтхэмрэ барельефхэмрэ атырашIыхьа­гъэх. Тарихълэжь-консультантхэмрэ искусствоведхэмрэ ащкIэ IэпыIэгъу къызыфашIыгъэх.

Унэ кIоцIхэм ягъэкъэбзэжьын джыдэдэм ыуж итых. Инвесторым къызэриIуагъэмкIэ, номер 77-рэ хьакIэщым иIэщт, унэ шъхьаIэм ресторанрэ конференц-залрэ хэтыщтых. Бас­сеинрэ спортзалрэ зыхэтыщт СПА-комплексэу квадрат метрэ минрэ ныкъорэ зэлъызыубы­тырэр ащ къыпашIыхьагъ. Котельнэр, электроподстанциер, гыкIапIэр агъэпсыгъэх. Унэм къыпэIулъ чIыпIэри, общественнэ транспортым иуцупIи зэтырагъэпсыхьагъэх. Остыгъэхэр агъэуцугъэх, къэгъагъэхэмрэ куандэхэмрэ щагъэтIысхьагъэх.

Предпринимателым къызэри­IуагъэмкIэ, мэкIэ-макIэзэ хьа­кIэщым Iоф ышIэу ригъэжьэщт. Мэкъуогъум мыщ хьакIэхэр ра­гъэблэгъэщтых, бэдзэогъум рестораныр, илъэсым ыкIэм ехъулIэу СПА-комплексыр къызэIуахыщт. АгъэкIэжьыгъэ хьа­кIэщыр жъогъуитф зиIэхэм ахагъэхьащт.Республикэм ипащэ гъэцэ­кIэжьын IофшIэнхэм осэшхо къафишIыгъ, зекIоныр Урысыем илъэныкъо шъхьаIэхэм зэращыщыр къыхигъэщыгъ. Лъэныкъо пстэури къыдалъытэзэ, тиреспубликэ ащ зыщырагъэу­шъомбгъу. Республикэм икъэлэ шъхьаIэ зекIо IункIыбзэм икъы­хэхынкIэ проектыр щагъэцакIэ. Къэлэ гупчэм ит тарихъ унэхэр зыпкъ игъэуцожьыгъэнхэмкIэ, чIыпIэхэм язэтегъэпсыхьанкIэ Iофышхо зэшIуахыгъ. «Мэз­дахэм» ишIынрэ къэлэ паркым изэтегъэпсыхьажьынрэ лъа­гъэкIуатэ.

Джащ фэдэу республикэм и ЛIышъхьэ лъэсгъогукIэхэр ти­чIыпIэгъу цIэрыIоу, драматургэу Евгений Шварц фэгъэхьыгъэри ахэм зэрахэтэу къызэIухыгъэнхэмкIэ цIыфхэм ягукъэкIхэм адырегъаштэ. А пстэуми зекIохэр нахьыбэу Мыекъуапэ къыращалIэ. КъумпIыл Мурат Мыекъуапэ имэрие пшъэрылъ фишIыгъ къэлэ щыIэкIэ Iэры­фэгъум, зекIо псэолъакIэхэм, джырэ шапхъэхэм адиштэрэ хьакIэщхэм ягъэпсынкIэ Iофэу ышIэрэр лъигъэкIотэнэу. ФэIо-фашIэхэр нахьышIоу ыкIи на­хьыбэу зэхэщэгъэнхэм мэхьа­нэшхо зэряIэр республикэм и ЛIышъхьэ къыхигъэщыгъ. Ащ пае республикэм федеральнэ IэпыIэгъур, лъэпкъ проектэу «ЗекIонымрэ хьакIэпэгъокIынымрэ» зыфиIорэм иамалхэр къызфегъэфедэх, инвесторхэр ямылъку къыхалъхьаным кIе­гъэгушIух.«Илъэс къэс хьакIэу рес­публикэм къакIорэр нахьыбэ мэхъу. ЗыгъэпсэфыпIэу «Лэгъо­накъэр» зашIыкIэ а пчъагъэм джыри хэхъощт. ПсэолъакIэхэм яшIынрэ фэIо-фашIэхэр на­хьы­шIоу гъэцэкIэгъэнхэмрэ на­хьы­бэу зекIохэр республикэм къи­хьанхэмкIэ амал шъхьаIэу къэ­нэжьы», — къыIуагъ АР-м и ЛIышъхьэ.АР-м и ЛIышъхьэ ипресс-къулыкъукъытырэ къэбархэмкIэ ЛIышэ Саныет.