Мыщ фэдэ мыхъо-мышIагъэхэм апэшIуекIорэ пэшIорыгъэшъ Iофтхьабзэхэм язехьан, лъэпкъпроектхэм япхырыщын ылъэныкъокIэ ащ епхыгъэ бзэджэшIагъэ къыхэмыкIыным фытегъэпсыхьэгъэ IофшIэнхэм афэгъэхьыгъагъ къолъхьэ тын-Iыхыным пэшIуекIогъэнымкIэ Комиссиеу АР-м щызэхащагъэм изэхэсыгъо. Ар зэрищагъ АР-м и ЛIышъхьэу КъумпIыл Мурат.
Зэхэсыгъом хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, Къэралыгъо Советым — Хасэм ипащэ игуадзэу Цэй Эдуард, Правительствэм хэтхэр, хэбзэухъумэкIо ыкIи уплъэкIокIо-лъыплъэкIо къулыкъухэм, муниципальнэ образованиехэм япащэхэр.Къолъхьэ тын-Iыхыным ыкIи нэмыкI хэбзэукъоныгъэхэм апэшIуекIогъэнымкIэ пэшIорыгъэшъ Iофтхьабзэхэм язехьан фэгъэзэгъэ ГъэIорышIапIэу АР-м и ЛIышъхьэ дэжь щызэхащагъэм ипащэу Иван Кондратовым къызэриIуагъэмкIэ, 2025-рэ илъэсым федеральнэ хэбзэгъэуцугъэхэм адиштэнхэм фэшI шъолъыр шэпхъэ-правовой акти 7-мэ зэхъокIыныгъэхэр афашIыгъэх. АР-м и ЛIышъхьэ ипшъэрылъкIэ гъэцэкIэкIо ыкIи муниципальнэ хэбзэ къулыкъухэм апае семинар-зэхэсыгъуи 4 зэхащагъ.2025-рэ илъэсымкIэ декларациехэм яугъоин илъэхъан пэщэ IэнатIэм Iутэу нэбгырэ 59-мэ яунэе мылъкоу агъэфедагъэр зыфэдизыр ауплъэкIугъ. Ахэм ащыщэу 14-мэ декларацием изэхэгъэуцонкIэ хэукъоныгъэхэр ашIыгъэхэу къыхагъэщыгъ, зы нэбгырэ дисциплинарнэ пшъэдэкIыжьрагъэхьыгъ, адрэхэм яхэукъоныгъэхэм анаIэ атырарагъэдзагъ е афагъэпытагъ.Къэралыгъо ыкIи муниципальнэ къулыкъушIэхэм ягъот ыкIи агъэкIодырэр, амыгъэкощырэ мылъкум хахьэу яIэр зыфэдизхэр Къэралыгъо къэбарзехьэ системэу «Посейдон» зыфиIорэм икъоу дагъэхьаным ГъэIорышIапIэм ынаIэ тетыгъ. Ащ иIофышIэхэр министерствэхэм якомиссиехэу къулыкъу зехьаным шапхъэу къыгъэуцухэрэм ягъэцэкIэн фэгъэзагъэхэм язэхэсыгъохэм гъогогъуи 9-рэ ахэлэжьагъэх. АР-м и ЛIышъхьэ иунашъо тетэу, къолъхьэ тын-Iыхыным пэшIуекIорэ уплъэкIунхэм къащыдэлъытэгъэ кIэупчIэн 40 ГъэIорышIапIэм ыгъэхьыгъ.«Федеральнэ Гупчэм Iофышхо ышIагъ, Къэралыгъо къэбарзехьэ системэу «Посейдоныр» гъэпсыгъэ хъугъэ. Къолъхьэ тын-Iыхыным пэшIуекIорэ пшъэрылъхэм ягъэцэкIэнкIэ, ащ епхыгъэ пэшIорыгъэшъ Iофтхьабзэхэм язехьанкIэ ишIуагъэ къызэрэкIощтым сицыхьэ телъ», — къыIуагъ КъумпIыл Мурат.АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэу Валерий Картамышевым къызэриIуагъэмкIэ,инфраструктурэм изегъэушъомбгъун, псэупIэхэм яшIын, коммунальнэ хъызмэтым игъэкIэжьын, Iэрыфэгъу къэлэ щыIакIэр гъэпсыгъэным, гъогурыкIоныр щынэгъончъэным, гъогу хъызмэтым изегъэушъомбгъун япхыгъэ федеральнэ проекти 7-мэ япхырыщын министерствэр хэлажьэ.Зэзэгъыныгъэ системэм фэгъэхьыгъэ хэбзэгъэуцугъэм диштэу зэкIэри пхыращы. Непэ Iофхэм язытет, Iофыгъоу къыкъокIыгъэхэм ыкIи ахэр зыщыдагъэзыжьыщтхэ пIалъэхэм Общественнэ советэу министерствэм щызэхащагъэм ащытегущыIэх. 2025-рэ илъэсым къолъхьэ тын-Iыхыным ыкIи монополием апэшIуекIогъэным алъэныкъокIэ хэукъоныгъэ къыхагъэщыгъэп.Республикэм и ЛIышъхьэ товархэм, IофшIэнхэм ыкIи фэIо-фашIэхэм якъэщэфын пае зэнэкъокъоу зэхащэхэрэм ящыкIэгъэ тхылъхэм ягъэхьазырынкIэ къолъхьэ тын-Iыхыным епхыгъэ мыхъо-мышIагъэу зэрахьэхэрэр къычIэгъэщыгъэнхэм фэшI уплъэкIунхэр зэхащэнхэу министрэм фигъэпытагъ.«Къэбархэр хэзыгъэ ямыIэу къатынхэ фае. Ащ изакъоп, хэукъоныгъэхэр иIэхэу зэшIохыгъэ хъугъэ IофшIэнхэр аштагъэхэу ыкIи апкIэ атыгъэу къыхэкIынэу щытэп. Бюджетым къыхэхыгъэ мылъкур гъэфедагъэ зэрэхъугъэм лъыплъэгъэныри шIокI зимыIэ Iофэу щыт», — къыIуагъ КъумпIыл Мурат.АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэу Долэ Долэтбый Адыгеим къолъхьэ тынIыхыным ылъэныкъокIэ иIофхэм язытет уасэ фэшIыгъэнымкIэ социологие ушэтынэу ашIыгъэхэр къызэфихьысыжьыгъэх. Ахэм зэрахэмыхъуагъэр теубытагъэ хэлъэу къэпIон плъэкIыщт. ПэшIорыгъэшъ Iофтхьабзэхэр зэрахьэх, кинотеатрэхэм фильмхэм якъэгъэлъэгъон ыпэкIэ мы темэмкIэ роликхэр къатых, социальнэ хъытыум ыкIи хэутын къэбарлъыгъэIэс амалхэм материалхэр къарэхьэх.АР-м и ЛIышъхьэ социологие ушэтыныкIэхэм язэхэщэнкIэ Адыгэ къэралыгъо ыкIи Мыекъопэ къэралыгъо технологическэ университетхэм яамалхэр агъэфедэнхэу пшъэрылъ къафишIыгъ.Iофтхьабзэм икIэухым Мыекъуапэ ыкIи Адыгэкъалэ япащэхэу Геннадий Митрофановымрэ Хьачмамыкъо Азаматрэ ядокладхэм ядэIугъэх. Декларациехэм ягъэхьазырын зэрэкIорэм, муниципальнэ къулыкъушIэхэм гъотэу яIэр, агъэфедэрэр зыфэдизым, анкетэхэм аратхэрэр анализ икъоу зэгъэшIэгъэным анаIэ тырагъэтынэу къалэхэм япащэхэм пшъэрылъ афашIыгъ.АР-м и ЛIышъхьэкъытыгъэ къэбархэмкIэзыгъэхьазырыгъэрХЪУТ Нэфсэт.