Н. Воронинам ихъарзынэщ
Урысые зэнэкъокъоу «Къоджэ почтальон-2026» зыфиIорэм хэлажьэмэ ашIоигъоу шъолъыр 86-мэ ялIыкIо 3000-м ехъумэ лъэIу тхылъхэр къатыгъэх. ЯтIонэрэ чэзыум илъэхъан осэшIхэм къыхахыгъ почтальон анахь дэгъоу Москва щыкIощт кIэухым хэлэжьэщтыр. Адыгэ Республикэм ыцIэкIэ псэупIэу Приречнэм щыщ Наталья Воронинар а зэнэкъокъум хэлажьэ.
Наталья Воронинар псэупIэу Приречнэм ипочтэ къутамэу 385740-м щэлажьэ. Илъэс 12 хъугъэ Iоф зишIэрэр. Районым изэтегъэпсыхьан ренэу хъупхъэу хэлажьэ, ипшъэрылъхэр дэгъоу егъэцакIэх. «Почтэр — письмэхэр аIэкIэгъэхьэгъэнхэ закъор арэп, цIыфхэм уахэхьанымкIэ, хъугъэ-шIагъэу къэхъухэрэм ахэр нэIуасэ афэшIыгъэнымкIэ, Iофыгъо горэмкIэ уишIуагъэ ябгъэкIынымкIэ ар амалышIу», — еIо бзылъфыгъэ хъупхъэм.«Шъолъыр комиссиехэм анахь почтальон дэгъоу зиIофшIэгъухэр Урысые лъэгапIэм тетэу къэзыгъэлъэгъощтхэр къыхахыгъэх. Ащ фэдэ игъэкIотыгъэ зэнэкъокъухэм ахэлэжьэнэу фаер бэ мэхъу, анахьэу етIани псэупIэ цIыкIухэм адэсхэр», — къыIотагъ Урысыем и Почтэ ишъолъыр къутамэхэм япащэу Ксения Ефимовам.Шъолъыр осэшI купым джащ фэдэу къыхихыгъэх къуаджэу ТэхъутэмыкъуаекIэ почтэ къутамэу 385100-м ипочтальонэу Чэтыжъ Бирамхъан, селоу Белэм ипочтэ къутамэу 385331-м ипочтальонэу Ольга Панихидинар, псэупIэу Тульскэм ипочтэ къутамэу 385730-м ипочтальонэу Галина Чикобавэ. Ахэм я 2-рэ ыкIи я 3-рэ чIыпIэхэр аубытыгъэх.Зэнэкъокъур чэзыуищэу зэтеутыгъэщт. Ащ хэлэжьэн фитхэр нэбгырэ мин 50-м шIомыкIэу зыщыпсэухэрэр ары. Iоф зашIэрэр зы илъэсым нахь мэкIэнэу щытэп. КIэух зэфэхьысыжьхэр жъоныгъуакIэм и 26-м Москва щашIыщтых.2026-рэ илъэсым жъоныгъуакIэм и 4-м къыщегъэжьагъэу и 25-м нэс социальнэ хъытыоу «ВКонтакте» инэкIубгъоу «https://vk.kom/russianpost-м» ихэушъхьафыкIыгъэ лъэныкъоу «Народный почтальон» зыфиIорэмкIэ мэкъэтыныр кIощт.Мы зэнэкъокъур партиеу «Единэ Россием» ипроектэу «Урысые къуаджэм» къыдыхэлъытагъ. IэпыIэгъу къыфэхъугъэхэр Урысыем и Почтэрэ федеральнэ почтэ операторхэмрэ, джащ фэдэу УФ-м мэкъу-мэщымкIэ ыкIи цифрэ хэхъоныгъэмкIэ иминистерствэхэр, зэпхыныгъэхэмкIэ Урысыем иIофышIэхэм япрофсоюз.