«Укъэзгъэбаирэр уиджыбэ илъыр арэп, цIыфхэм афапшIэрэр ары нахь»

Мыхэр зигущыIэхэр Адыгеим и ЛIышъхьагъэу, предпринимателэу, меценатэу Шъэумэн Хьазрэт. ЖъоныгъуакIэм и 1-м ащ ыныбжь илъэс 89-рэ хъугъэ. 2002-рэ илъэсыр ары Адыгеим ипащэу ар зыхадзыгъагъэр, зы пIалъэрэ тетыгъ.

Шъэумэн Хьазрэт Тэхъутэмыкъое районым ит къуа­джэу Афыпсыпэ 1937-рэ илъэсым, жъоныгъуакIэм и 1-м къыщыхъугъ, щапIугъ, щеджагъ… Дышъэ къычIэхыным ищыIэныгъэ рипхыгъ. Ащ ищыкIэгъэ сэнэхьат пстэур къызэпичыгъ, водителыгъ, чIыгур зыубырыу­хэрэм ахэтыгъ, бульдозерым тесыгъ, дышъэм лъы­хъурэ рабочэу Iоф ышIагъ, етIанэ мастерым нэси, нэужым инженер хъугъэ… Дышъэм икъычIэхынкIэ хъызмэтшIэпIэшхоу ащ Красноярскэ краим щигъэпсыгъэр непэ къызнэсыгъэм мы лъэныкъом фэгъэзагъэу дунаим тетхэм анахь инхэм ащыщ.Шъэумэн Хьазрэт Лъэпкъ тынэу «Илъэсым и ЦIыф» зыфиIорэм илауреат, «Пшызэ шъолъыр IофшIэнымкIэ и ЛIыхъужъ» щытхъуцIэр къыфагъэшъошагъ. Ар ды­шъэм икъычIэхын зы субъект имызакъоу, къэралыгъом зэрэщытэу къыщызыIэтыгъэ цIыф, ау ежьыркIэ анахь шъхьаIэу къыхигъэщырэр цIыфхэм шIу зэрафишIэрэр ары.ШIушIэныр зишэнэу къэхъугъэм щэIэфэкIэ зэрэхэмызыщтыр къэзыушыхьатырэ Шъэумэн Хьазрэт социаль­нэ гупчэу, сымэджэщэу, еджапIэу, саугъэтэу имылъкукIэ чIыпIэ зэфэшъхьафхэм ащаригъэшIыгъэр, ащигъэкIэжьыгъэр, къэгъэлъэгъонэу, фестивалэу, нэмыкI Iофтхьабзэу имылъку зыхилъхьагъэр къэпчъыгъуай. Мэщытхэр, чылысхэр аригъэшIыгъэх, шIыгъа­хэхэм ягъэцэкIэжьын хэлэжьагъ. Ащ фэдэу къэпп­чъын плъэкIыщтыр бэ. Непэ къызнэсыгъэми ишIушIэ IэпыIэгъу ыгъэуцурэп.Тэ лъэшэу тигуапэу мыщ дэжьым къыщыхэдгъэщымэ тшIоигъор гъэзетэу «Адыгэ макъэр» пенсионерхэм, зигъот макIэхэм апае экземпляр 500 хъоу мызэу, мытIоу къызэрэритхыкIыгъэр ары. Ащ пае хэушъхьафыкIыгъэу «тхьауегъэпсэу» етэIо.«Хьазрэт Мэджыдэ ыкъом Iофэу зыпылъым гъэхъэ­гъэ инхэр зэрэщишIыгъэхэм имызакъоу, шIушIэным, цIыфхэм IэпыIэгъу афэхъуным ищыIэныгъэ рипхыгъ. Адыгэ Республикэм гъэсэныгъэмкIэ, культурэмкIэ, псауныгъэм икъэухъумэнкIэ исистемэхэм хэхъоныгъэ ашIыным ыкIи псэупIэхэм язэтегъэпсыхьан ащ иIахьы­шхо ахилъхьагъ.Шъэумэн Хьазрэт меценатствэм, цIыфхэр шIу плъэ­гъунхэм ятамыгъэу хъугъэ ичIыпIэгъухэмкIэ, ащ ыцIэ зэмыхъокIыжьынэу цIыфыгъэм, шIугъэм, уичIыгу, уихэгъэгу янеущырэ мафэ угу къыбдеIэу уафэгумэкIыным япхыгъ.Лъытэныгъэ зыфэсшIырэ Хьазрэт Мэджыдэ ыкъом сыгу къыздеIэу сыфэгушIо, псауныгъэ пытэ, мыухыжьын кIуачIэ, щыIэкIэшIу иIэнхэу, шIушIэ Iофышхоу ышIэрэм тапэкIэ джыри гъэхъэгъэ инхэр щишIынхэу сыфэлъаIо», — къыщеIо АР-м и ЛIышъхьэу КъумпIыл Мурат Шъэумэн Хьазрэт зыщыфэгушIогъэ псалъэм.Зэрэхабзэу, Шъэумэн Хьазрэт къызщыхъугъэу, зыщапIугъэ Тэхъутэмыкъое районым ит къуаджэу Афыпсыпэ ащ имэфэкI илъэс къэс щыхагъэунэфыкIы. Ау мыгъэ ащ имызакъоу, мы къуаджэм Хьазрэт Мэджыдэ ыкъом щигъэпсыгъэ сымэджэщэу «Я XXI-рэ лIэшIэгъум иклиникэкIэ» зэджагъэхэм ыныбжьи илъэс 25-рэ хъугъэ.МэфэкI Iофтхьабзэхэр Афыпсыпэ игупчэ пчэдыжьым сыхьатыр 10-м щырагъэжьагъэх. Ахэм къащыдэлъытагъэу джэгупIэ зэфэшъхьафхэр, аттракционхэр къызэIуахыгъагъэх. МэфэкI зэхахьэу республикэм ыкIи районым япащэхэр, депутатхэр, муниципальнэ образованием ицIыф гъэшIуагъэхэр, нэмыкIыбэхэр къызщыгущыIагъэхэм ыуж къэралыгъо академическэ лъэпкъ къэшъокIо ансамблэу «Налмэсымрэ» орэдыIо ыкIи къэшъокIо ансамблэу «Ислъамыемрэ» концерт къатыгъ. Пчыхьэм Адыгеим иорэдыIохэм ягала-концерткIэ ыкIи адыгэ джэгукIэ Iофтхьабзэр аухыгъ.Шъэумэн Хьазрэт имэфэкIкIэ джыри зэ тыфэгушIо, псауныгъэ пытэ иIэу джыри бэрэ къытхэтынэу тыфэ­лъаIо!

ХЪУТ Нэфсэт.