Хэгъэгу зэошхом ТекIоныгъэр къызщыдахыгъэр илъэс 81-рэ зэрэхъурэм фэгъэхьыгъэ шыгъачъэу Мыекъуапэ щыкIуагъэм еплъыгъ Адыгеим и ЛIышъхьэу КъумпIыл Мурат.
Джащ фэдэу ащ къекIолIагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, Урысыем IофшIэнымкIэ и ЛIыхъужъэу, тхакIоу МэщбэшIэ Исхьакъ, программэу «ЛIыхъужъхэм яуахът» зыфиIорэм хэлажьэу, хэушъхьафыкIыгъэ дзэ операцием иветеранэу Сергей Ковалевыр, хэбзэ къулыкъухэм, ныбжьыкIэ, общественнэ ыкIи лъэпкъ-культурнэ организациехэм ялIыкIохэр.Къэбэртэе шы лъэпкъышIухэм атесхэр гъогуони 7-мэ ащызэнэкъокъугъэх. ХэушъхьафыкIыгъэ дзэ операцием хэлажьэхэрэм, Хэгъэгу зэошхом иветеранхэм, ТекIоныгъэм ия 81-рэ илъэс, Хэгъэгум иухъумакIохэм, Урысыем и ЛIыхъужъхэм, Адыгеир шъхьафит зэрашIыжьыгъэм, СССР-м и ЛIыхъужъэу Андырхъое Хъусен ацIэкIэ агъэнэфэгъэ шIухьафтынхэм якъыдэхынкIэ шыухэр зэнэкъокъугъэх.
ТекIоныгъэм ия 81-рэ илъэс фэгъэхьыгъэ зэнэкъокъум апэрэ чIыпIэр къыщызыхьыгъэр Гусейн Гусейновым ыгъэIорышIэщтыгъэ Эльбрус Таймыр ары (шыр зиер Муратбий Каратоковыр, мастер-тренерыр Хусей Касаевыр). ШIухьафтын фондыр сомэ миллион хъущтыгъ.Республикэм ипащэ текIоныгъэр къыдэзыхыгъэм ыкIи ащ икомандэ афэгушIуагъ, тапэкIи мыщ фэдэ гъэхъэгъэшIухэр ашIынхэу афэлъэIуагъ.«Адыгеим мы спорт лъэпкъым хэхъоныгъэ щишIыным, дунаим щызэлъашIэрэ къэбэртэе-адыгэ шы лъэпкъым ишIуагъэкIэ шэн-хэбзэ шIагъоу тиIэхэр къэухъумэгъэнхэм тэркIэ мэхьанэшхо иI. Аужырэ илъэсхэм мы лъэныкъомкIэ бэ тшIагъэр. Шы спортым зиушъомбгъунымкIэ, ащ дакIоу зекIоным хэхъоныгъэ ышIынымкIэ а пстэури амалышIу зэрэхъущтым сицыхьэ телъ, — къыIуагъ КъумпIыл Мурат.МэфэкI зэхахьэм республикэм щыпсэухэрэр ыкIи ихьакIэхэр зэрищэлIагъэх. Ахэм апае IэпэIасэхэм яермэлыкърэ культурнэ программэ гъэшIэгъонрэ зэхащагъ. Джащ фэдэу аттракционхэм, нахьыжъхэм ыкIи кIэлэцIыкIухэм зызщагъэпсэфын алъэкIыщт чIыпIэхэм Iоф ашIагъ. Къэзэрэугъоигъэхэм ашIогъэшIэгъоныгъ клубэу «Щагъдыим» хэтхэм шыхэм атесхэу къашIыгъэ къэгъэлъэгъоныр.