АР-м и Къэралыгъо Совет — Хасэм зичэзыу я LVI-рэ зэхэсыгъоу тыгъуасэ иIагъэм хэлэжьагъэх министрэхэм я Кабинет хэтхэр, федеральнэ ыкIи шъолъыр къулыкъу зэфэшъхьафхэм ялIыкIохэр, нэмыкIхэр. Iофтхьабзэр зэрищагъ Парламентым и Тхьаматэу Владимир Нарожнэм.
УФ-м и Правительствэ хэтхэм, Къэралыгъо Думэм афэгъэзэгъэ джэпсалъэхэр бэу мызыгъэгум аштагъэх. ХэушъхьафыкIыгъэ дзэ операцием, социальнэ Iофхэм ахэр афэгъэхьыгъэх. ГущыIэм пае, УФ-м зыкъэухъумэжьынымкIэ иминистрэ игуадзэу, хэушъхьафыкIыгъэ дзэ операцием хэлажьэхэрэм IэпыIэгъу ятыгъэнымкIэ Къэралыгъо фондэу «Хэгъэгум иухъумакIохэр» зыфиIорэм ипащэу Анна Цивилевам фэгъэзагъэр операцием хэлэжьагъэхэу, предприниматель Iофым ыуж ихьаным пае социальнэ зэзэгъыныгъэ зыдашIыхэрэм ахъщэ IэпыIэгъоу аратырэм фэгъэхьыгъ. Хэбзэгъэуцугъэм къызэрэщыдэлъытагъэмкIэ, ар сомэ мин 350-рэ мэхъу. Ахъщэр зэратырэм шэпхъэ гъэнэфагъэхэр ыгъэцэкIэнхэ фае, ахэм макIэп апэIухьэрэр.Депутатхэм зэралъытэрэмкIэ, а зэпстэур зигъэцакIэрэм ыуж сомэ мин 200 имыкъупэу къыфэнэжьы, ар предприниматель Iофыр ригъэжьэнымкIэ макIэ. Ащ фэшI хэушъхьафыкIыгъэ дзэ операцием хэлэжьагъэхэм социальнэ зэзэгъыныгъэм къыщыдэлъытагъэу аратырэ IэпыIэгъур сомэ мин 500-м нагъэсыным кIэщакIо фэхъугъэх.Сабый зэрыс унагъоу, псэукIэ амалэу иIэр нахьышIу ышIыным пае ны мылъкумрэ ипотекэмрэ зэдэзыгъэфедагъэхэм афэгъэхьыгъ УФ-м и Къэралыгъо Думэ хэплъэнэу агъэхьазырыгъэр. Ащ тетэу унагъом псэупIэ къыщэфи, ипотекэмкIэ чIыфэу ыштагъэр ыпщыныжьыгъэмэ, унэр ежь иунае мэхъу. Арэу щытми, джыри нахь зиушъомбгъуным фэшI ар ыщэжьынэу ыуж зихьэкIэ, банкэу ипотекэр зыщигъэпсыгъагъэм фитыныгъэ къыIихын фаеу законым итхагъ. Ащ пае сомэ мин 15-м къыщымыкIэу ахъщэ еты.Адыгеим и Парламент идепутатхэм унагъом псэупIэу къыщэфырэр иIагъэм нахь мыцIыкIоу, сабыйхэм псэукIэ амалэу яIэр нахь дэй мыхъурэмэ, банкым фитыныгъэ къыIихын имыщыкIагъэу къызщиIорэ зэхъокIыныгъэхэр ипотекэм фэгъэхьыгъэ федеральнэ хэбзэгъэуцугъэм ия 7-рэ статья фэшIыгъэн фаеу алъытагъ.Джащ фэдэу дзэкIолIхэм, ежь ишIоигъоныгъэкIэ зэзэгъыныгъэм кIэтхагъэу къулыкъу зыхьыхэрэм, УФ-м и УIэшыгъэ КIуачIэхэм пшъэрылъэу яIэхэм ягъэцэкIэн хэлажьэхэрэм, Лъэпкъ гвардием хэтхэм ыкIи ахэм яунагъохэм къэралыгъо ыкIи муниципальнэ мылъкум хэхьэрэ чIыгу Iахьхэр ятыгъэнхэмкIэ республикэ хэбзэгъэуцугъэм зэхъокIыныгъэхэр фэшIыгъэнхэм фэгъэхьыгъэр аштагъ. ЧIыгур зэратырэм тхылъхэм ягъэпсын ыкIи ятын нахь къызэрыкIо къыфэхъунхэм ар фытегъэпсыхьагъ. ЗэхъокIыныгъэхэм къызэращыдэлъытагъэмкIэ, джы фитыныгъэ къыратыным пае тхылъхэм мэфи 8 нахьыбэрэ ахэплъэщтхэп, ыпэкIэ мэзи 2 пIалъэу пылъыгъ. Джащ фэдэу тхылъхэр электроннэ шIыкIэм тетэу зищыкIэгъэ къулыкъум IэкIигъэхьанхэ фит хъугъэ.Депутатхэр зытегущыIагъэхэм ащыщ 2026-рэ илъэс бюджетым, 2027 — 2028-мкIэ агъэнэфагъэхэм зэхъокIыныгъэхэр афэшIыгъэнхэм фэгъэхьыгъэ хэбзэгъэуцугъэм ипроект. АР-м и Правительствэ итхьаматэ игуадзэу, финансхэмкIэ министрэу Виктор Орловым къызэриIуагъэмкIэ, бюджетым ихахъохэр мы илъэсым сомэ миллион 30-рэ мин 764,8-кIэ нахьыбэ мэхъу.А зэпстэуми анэмыкIэу АР-м и Къэралыгъо Совет – Хасэмрэ Донецкэ Народнэ Республикэм и Лъэпкъ Советрэ зэрэзэдэлэжьэщтхэм фэгъэхьыгъэ зэзэгъыныгъэм тегущыIэхи, дырагъэштагъ.
ХЪУТ Нэфсэт.