Iэшъынэ А.
Шъолъыр шIэныгъэ конференциеу «Культурэ ыкIи бзэ зэфэшъхьафыбэ зыщагъэфедэрэ Урысыем лъэпкъ зыкIыныгъэм иконституционнэ лъапсэхэр ыкIи фитыныгъэхэр» зыфиIорэр АР-м и Лъэпкъ музей щыкIуагъ. Лъэпкъхэм языкIыныгъэ и Илъэс ар къыдыхэлъытагъ.
Iофтхьабзэм кIэщакIо фэхъугъэх политическэ шIэныгъэхэмкIэ Урысые ассоциациер, УФ-м ыкIи АР-м яобщественнэ палатэхэр, Адыгэ къэралыгъо университетымрэ правэмкIэ ащ иинститутрэ. Президент фондым игрант IэпыIэгъукIэ проектыр пхыращы.Конференцием хэлэжьагъэх къэралыгъо хэбзэ къулыкъушIэхэр, общественнэ ыкIи лъэпкъ-культурнэ зэхахьэхэм, шIэныгъэм ыкIи гъэсэныгъэм ялIыкIохэр, экспертхэр, аспирантхэр, магистрантхэр, студентхэр.Iофтхьабзэр къызэIуихыгъ ыкIи зэрищагъ АР-м и Общественнэ палатэ и Тхьаматэу Устэ Руслъан.— Урысыем щыпсэурэ лъэпкъхэм языкIыныгъэ гъэпытэгъэным фэIорышIэрэ конституционнэ лъапсэхэм ыкIи фитыныгъэхэм яшIыкIэ-амалхэр научнэ гупшысэ хэлъэу зэхэфыгъэнхэм, ахэмкIэ зигъо Iофыгъохэр гъэнэфэгъэнхэм, ащ дакIоу, культурэр ыкIи бзэр къызэтегъэнэгъэнхэм татегущыIэнэу тызэрэугъоигъ, — хигъэунэфыкIыгъ Устэ Руслъан.АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт лъэпкъ зэфэшъхьафхэм азыфагу илъ мамырныгъэр, зэкъошныгъэр гъэпытэгъэнхэмкIэ 2026-рэ илъэсыр зыкIыныгъэм и Илъэсэу зэрагъэнэфагъэм мэхьанэ зэриIэр къыхигъэщыгъ.— Урысыем итарихъ ухаплъэмэ, лъэпкъхэм яфитыныгъэхэм мэхьанэшхо зыщаратырэ къэралыгъоу сыдигъокIи щыт. ЦIыфхэр зэкъотхэу, зэгурыIохэу, урысыбзэр ябзэ шъхьаIэу щызэдэпсэух. ХэушъхьафыкIыгъэ дзэ операцием хэлэжьэрэ лъэпкъ зэфэшъхьафхэм къахэкIыгъэ зэолIхэм зэкIэми урыс дзэкIолIхэу залъытэжьы. Джа зэфыщытыкIэ пытэхэм атет гъогум Урысыер зэрэрыкIощтым сицыхьэ телъ, — къыIуагъ Долэ Долэт.Хэгъэгу зэошхом ТекIоныгъэр къызщыдахыгъэр илъэс 80 зэрэхъугъэм ихэгъэунэфыкIын чанэу хэлэжьэгъэ организациехэм ялIыкIохэм Комитетым ирэзэныгъэ тхылъхэр аратыжьыгъэх.ГущыIэр лъигъэкIотагъ политическэ шIэныгъэхэмкIэ докторэу, профессорэу Жэдэ Зуриет. Урысыем илъэпкъхэм языкIыныгъэ къэралыгъо лъэпкъ политикэм илъэныкъо анахь шъхьаIэу зэрэщытым ар къытегущыIагъ.Конференцием иIофшIэн секциехэмкIэ зэтеутыгъэу лъагъэкIотагъ.IЭШЪЫНЭ Сусан.