Теубытагъэ ыкIи пытагъэ хэлъ

Мыщ икъулыкъушIэхэм пшъэрылъ шъхьаIэу яIэр цIыфхэм якъэухъумэнрэ якъэгъэнэжьынрэ. IэпэIэсэныгъэшхо зыхэлъ къулыкъушIэхэм апсэ емыблэжьхэу яIофшIэн агъэцакIэ. ЛIыхъужъныгъэ ин зищыкIэгъэ сэнэхьатым зищыIэныгъэ езыпхыгъэхэм мы мафэм гущыIэ фабэхэр апэтэгъохых.

Илъэси 10 хъугъэу Iэшъынэ Мурат ищытхъу аригъаIозэ Урысые Федерацием ошIэ-дэмышIэ IофхэмкIэ и Министерствэ и ГъэIорышIапIэу Адыгэ Респуб­ликэм щыIэм и Мыекъопэ мэ­шIогъэкIосэ-къэгъэнэжьын частэу N 2-м Iоф щешIэ. ЦIыфхэм якъэ­гъэнэжьын фэгъэзагъэу IэпыIэгъу зищыкIагъэхэм апэу алъэIэсы.Мы къулыкъум Iоф щызышIэ­хэрэр чIыпIэ зэжъу ифагъэхэм IэпыIэгъу афэхъунхэм ренэу фэ­хьазырых. МашIом, псыкъиуным, чIыопс, техногеннэ нэшанэ зиIэ тхьамыкIагъохэм къыздахьыхэрэм ядэгъэзыжьынкIэ япшъэрылъхэр щытхъу хэлъэу агъэцакIэх. ЦIыф зэрымыс быбырэ пкъыгъохэм апкъ къикIэу машIоу къызэкIэнагъэм игъэкIосэжьын Мурат мызэу, мытIоу хэлэжьагъ. Мы уахътэм ТIуапсэ къулыкъур щехьы.

Мурат илIакъокIэ Гъобэкъуае щыщ. ИцIыкIугъом къыщыублагъэу IэпыIэгъу псынкIэр цIыфхэм аригъэкIыныр шэнышIу зэрэфэ­хъугъэм ишыхьатэу мы сэнэхьатыр къызэрэхихыщтымкIэ джэнджэш ыгу къихьагъэп. 2007-рэ илъэсым Мыекъопэ къэралыгъо технологическэ университетым мэшIогъэкIосэныр щынэгъончъэнымкIэ ифакультет къызызэIуа­хым, ащ чIэхьагъ.2013-рэ илъэсым еджэныр къызеухым, Урысыем ошIэ-дэмышIэ IофхэмкIэ и Министерствэ епхыгъэу я 495-рэ къэгъэнэжьын гупчэм дзэ къулыкъур щихьынэу кIуагъэ. Илъэс тешIагъэу Мые­къуапэ къыгъэзэжьыгъ, мэшIо­гъэкIосэ-къэгъэнэжьакIоу Красногвардейскэ дэт мэшIогъэкIосэ частым IофшIэныр щыригъэжьагъ. 2017-рэ илъэсым Мыекъуапэ имэшIогъэкIосэ частэу N 1-м къащэжьыгъ. 2019-рэ илъэсым хэгъэгу кIоцI къулыкъум илейтенантыцIэ къыфагъэшъошагъ. Мы уахътэм Мыекъуапэ имэшIо­гъэ­кIосэ къулыкъоу N 2-м икъэрэ­гъулэ ипащ, старшэ лейтенант.Илъэс зэкIэлъыкIохэм иIэпэIэсэныгъэ хигъахъозэ къырыкIуагъ, цыхьэу къыфашIыгъэр къыгъэ­шъыпкъэжьыгъ, иIофшIэн хэшIыкIышхо фыриI.Исэнэхьат епхыгъэу Мурат Урысые зэнэкъокъухэм ахэлажьэ. 2025-рэ илъэсым ар зыхэтыгъэ командэр Къыблэ федеральнэ шъолъырым ичемпион хъугъэ. Нэужым къалэу Барнаул щыкIо-гъэ Урысые чемпионатым хэлэжьагъ.Илъэс зэкIэлъыкIохэм щытхъу хэлъэу иIофшIэн зэригъэцакIэрэм фэшI щытхъу тхылъхэмкIэ мызэу, мытIоу къыхагъэщыгъ. Ащ нэмыкIэу мэшIогъэкIосэ-прикладной спортымкIэ зэнэкъокъухэм ха­гъэунэфыкIырэ чIыпIэхэр къа­щыдихыгъэх.Мурат иIофшIэн щынагъоу зэ­рэщытым, псэемыблэжьыныгъэ зэрэхэлъым ямылъытыгъэу ащ лIыхъужъэу зилъытэжьырэп. ИIоф­шIэн шIу елъэгъу, обществэмкIэ ащ мэхьанэшхо зэриIэр къы­хегъэщы.— СиIэпыIэгъу зыгорэм езгъэкIыным ренэу сыфэ­хьазыр, ащ кIуачIэ къысеты. ЦIыфхэм якъэгъэ­нэжьынкIэ Iофэу пшIэрэм уасэ къыфашIымэ ащ ­уегъэгушхо, гу кIуачIэ къыпхелъхьэ, ыпэкIэ улъе­гъэкIуатэ, — еIо Мурат.— ЦIыфхэм IэпыIэгъу афэхъугъэнымкIэ зисэнэхьат фэшъыпкъэ цIыф­хэм Мурат ащыщ, ащкIэ шъхьэкIэфэныгъэр къы­лэжьыгъ, — аIо иIофшIэгъухэм.КъэгъэнэжьэкIо сэнэхьатым урылэжьэным фэшI теубытагъэ ыкIи пытагъэ пхэлъынхэ, ащ дакIоу уипкъынэ-лыни ащ фэхьазырын фае. А нэшанэхэр зэкIэ Мурат хэлъ.ЦIыфхэм якъэгъэнэжьын фэгъэзэгъэ къулыкъухэм аIутхэм яIоф хэшIыкIышхо зэрэфыряIэм, теубытагъэрэ лIыгъэрэ зэрахэ­лъым яшIуагъэкIэ тиреспубликэ щыпсэухэрэм ящынэгъончъагъэ ухъумагъэ зэрэхъущтым уицыхьэ тебгъэлъы хъущт.Мы къулыкъум щылажьэхэрэм псауныгъэ пытэрэ щыIэкIэ-­псэукIэ дэгъурэ яIэнэу, япшъэ­рылъхэм ягъэцэкIэнкIэ гъэхъэ­гъэшхохэр ашIынхэу, шIоу щыIэр къадэ­хъунэу, мамырэу псэунхэу тафэлъаIо!КIАРЭ Фатим.